Adiyaara 7 - Ñwed Abasi Ke Ikọ Ibibio Ayo Mfịn

Ufiikñkpọ ke akpọiso awo 144,000

¹ Ke ami amaakeboiyo, ami mmaakịt mme enyere inaañ naña eda ke mbeñ ederimbod inaañ, enyʌñ emʌm mme afịm e-etooho mbeñ inaañ mbaak ekama afịm ndomokeed adifịme ke isọñ me ke inyañ me ke eto ndomokeed.

² Ndin mmaakịt enyere mfen naña ato usakka utịn adi, anyʌñ akama ufiikñkpọ ndundu Abasi. Anye amaakood mme enyere inaañ e-ekenọọhọ adudu ebo editʌkkọ isọñ ye mme akpa inyañ ke akpọsọñ uyo:

³ “Ikiidutʌkkọ isọñ mme inyañ ye mme eto tutu ñnyịn inịm idiọọñọ ke akpọiso mme isʌñutom Abasi ñnyịn.

⁴ Ndin ami mmaakop ibad mbon emaekenịm ammọ idiọọñọ: ekedo 144,000 e-eketooho afịd ubon nditọ Isred.

⁵ “Se ikito ufọk Yuda akedo 12,000, ake ufọk Ruben 12,000, ufọk Kaad 12,000,

⁶ ufọk Asa 12,000, ufọk Naftadi 12,000, ufọk Manase 12,000,

⁷ ufọk Simiọn 12,000, ufọk Difai 12,000, ufọk Isakka 12,000,

⁸ ufọk Sebudọn 12,000, ufọk Yosef 12,000, ufọk Benyamin 12,000.

Ekamba atu awo e-esiineke mfia afọñidem

⁹ “Ke mme ñkpọ ami emaekeboiyo mmaakịt ke iso mmi akamba atu awo a-awo ndomokeed mmiikpikanna ibat naña eba, afịd mme idịd, aduuk, usem mme afịd ubon awo naña eda ke iso ebekpo ye ke iso Ayịn Edọñ. Ammọ ekesiine mfia afọñidem enyʌñ ekaama mme ndak ayob ke ubọk.

¹⁰ Ndin ammọ emaetua ke akpọsọñ uyo, “Edinyaaña anie Abasi ñnyịn, a-atieeghe ke ebekpo mme Ayịn Edọñ.

¹¹ Afịd mme enyere emaeda ekanna ebekpo, mme ñyobioawo ye mme aduuwem ñkpọ ekʌk. Emaeduọññọ ekʌp iso ke isọñ ke iso ebekpo ekpono Abasi,

¹² enyʌñ ete: “Amen! Itooro ye ubọọñ ye ikike ye ekọọm ye ukpono ye adudu ye ukeme enie Abasi ñnyịn ke nsi-nsi nsi-nsi. Amen!”

¹³ Ndin keed ke atu mme ñyobioawo amaambịp miin ate, “Mbon e-esiineke mme mfia afọñidem, ami ammọ edoñño mme anie, ammọ eketo uke edi?”

¹⁴ Ami mmaabọọrọ nte, “Ete! Afo amediọọñọ.” Ndin anye abo “Mbon ami edoñño mbon e-ewuọọñọke ke ekamba ukuud edi, ammọ emaeyeed mme afọñidem ammọ enyʌñ enam efia ke iyiib Ayịn Edọñ.

¹⁵ Ado anam, “ammọ eba ke iso ebekpo Abasi enyʌñ enam utom enọ anye ke uweemeayo mme akoneyo ke tembịd amọ; ndin anye a-atieeghe ke ebekpo ayaatat atayad amọ afʌk ammọ.

¹⁶ ‘Ammọ idiikpaaha abiọñ aba, ammọ idiikpaaha nsaditọñ aba, eyo idimiaaha ammọ,’ akpọsọñ ufiob idinyʌññọ ituuk ammọ.

¹⁷ Sia Ayịn Edọñ a-abaaha ke ufọọd ebekpo ayaado akpemedọñ anọ ammọ; ‘ayaaben ammọ aka idịm mmọọñ uwem.’ ‘Ndin Abasi ayaakwokko afịd mmọọñayịd afep ke anyen ammọ.’ ”