Adiyaara 6 - Ñwed Abasi Ke Ikọ Ibibio Ayo Mfịn

Mme ufiikñkpọ

¹ Ami mmaase naña Ayịn Edọñ akʌppọ akpa ufiikñkpọ ke atu mme ufiikñkpọ itiaba ado. Ndin mmaakop naña keed ke atu mme aduuwem ñkpọ inaañ ado ataña ke uyo a-akebiotto aduma ate, “Di!”

² Mmaase ndin ñkịt naña afia enañ mbakara ada ke iso mmi! Andidoro ke anye amaakama utịgha, emaenyʌñ enọ anye anyanya, anye anyʌñ awat awuọ nte uko ke ekọñ a-awuọọhọ aka adikan ke ekọñ.

³ Ke Ayịn Edọñ amaakekʌppọ ufiikñkpọ ayọhọ iba mmaakop naña aduuwem ñkpọ ayọhọ iba abo “Di!”

⁴ Ndin enañ mbakara mfen, adat nte ekamba edeme ikañ, amaawuọ adi. Emaenọ andiwad anye adudu ediben emem nsio ke ederimbod ndin anam mme awo eduwotto idem ammọ. Emaenọ anye ata ekamba akañkañ.

⁵ Ke Ayịn Edọñ amaakekʌppọ ayọhọ ufiikñkpọ ita, mmaakop naña aduuwem ñkpọ ayọhọ ita abo “Di!” Mmaase ñnyʌñ ñkịt naña abubịd enañ mbakara ada ke iso mmi! Andiwad anye akekama udomo ñkpọ iba ke ubọk amọ.

⁶ Ndin mmaakop ñkpọ nte uyo a-atooho keed ke atu mme aduuwem ñkpọ inaañ ado ate, “Udomo abakpa keed ke utom usen keed, udomo baadi ita ke utom usen keed, ndin ikiibiad adan mme ukọd!”

⁷ Ke Ayịn Edọñ amaakekʌppọ ayọhọ ufiikñkpọ inaañ, mmaakop naña aduuwem ñkpọ ayọhọ inaañ abo “Di!”

⁸ Mmaase ñnyʌñ ñkịt naña iyeed-iyeed enañ mbakara ada ke iso mmi. Ekekoot andiwad anye Ñkpa, ndin Abioekpo asaña adiana anye ke edem. Emaenọ ammọ adudu ediwot ubeñ ederimbod keed ke itie inaañ ke akañkañ, ke akañ mme idiọọk udọñọ ye mme ndiọi unam ikọd ke ederimbod.

⁹ Ke anye amaakekʌppọ ufiikñkpọ ayọhọ ition mmaakịt ke idak itie uwa, ukpọñ mbon se ekewot ke ntak ikọ Abasi ye ikọ ntiense ammọ ekemʌmmọ ekama.

¹⁰ Ammọ emaekood ke akpọsọñ uyo ete, “Adikpeene die, Abọọñ Andikara, Adisana mme Akpanikọ, ndin Afo akpe ikpe mme andidʌñ ke ederimbod anyʌñ asio usieene iyiib ñnyịn e-ekeduọkkọ?”

¹¹ Ndin emaenọ ammọ keed-e-keed afia afọñidem, enyʌñ ebo ammọ yak esʌk emaana ebet etək-etək tutu mme ibed ye mme nditọete ammọ ke Krais e-ekenaaha ewood, nte ammọ ñko, ekem ibad.

¹² Mmaase naña anye akʌppọ ufiikñkpọ ayọhọ itiokeed. Ekamba unyekisọñ amaatịppe. Utịn amaakappa abre nte afọñ ikpo e-edatta ided ebod enam, afiọñ afịd-afịd amaakappa adat nte iyiib,

¹³ ndin mme ntantaafiọñ emaeduọññọ eto ikpaanyọñ ebono ke isọñ nte mfịd fik idiọọk ini ebeghe ke eto fik a-akpọsọñ afịm anyeeñeke.

¹⁴ Ikpaanyọñ amaañwụụno nte ikpañwed anwụụno, emaenyʌñ ebenne afịd abod mme isuọ esioño ke itie ammọ.

¹⁵ Ndin mme ndidem ederimbod mme nditọ mbọọñ mme ikpo adaiso ekọñ, mme imọ awo, mme akop adudu ye mme ifʌn mme afịd-afịd amanaisọñ emaedịbe ke mme aba mme ke idak itiad ke abod.

¹⁶ Ammọ emaenyʌñ ekood mme ikpọ abod mme itiad ebo, “Duọ ifʌk ñnyịn, nyʌñ idịp ñnyịn ke iso anditie ke ebekpo ye iyaresịd Ayịn Edọñ.

¹⁷ Sia ekamba usen iyadesịd amọ adikem, ndin anie idiikan ida?”