Adiyaara 5 - Ñwed Abasi Ke Ikọ Ibibio Ayo Mfịn

Ikpañwed ye Ayịn Edọñ

¹ Ndin ami mmañkịt ke ubọk udom anditie ke ebekpo, ikpañwed e-emaekewet ñkpọ ke naña edem iba, ekʌp enyʌñ efiik ke ufiikñkpọ itiaba.

² Ndin ami mmakịt ata eka isua enyere keed asʌk abọọñ ke ekamba uyo abo, “Anie idot adibom ufiikñkpọ itiaba ñnyʌñ ñkʌppọ ikpañwed ami?”

³ Ado ikibaaha awo ndomokeed ke anyọñ me ke isọñ me ke idakisọñ a-akekanna adikʌppọ me adise esịd ñwed ado.

⁴ Ami mmaatua, ntua sia ikibaaha awo ndomokeed a-akedotto adikʌppọ ikpañwed ado ñnyʌñ nse se isịne ke esịd.

⁵ Ndin keed ke atu mme ñyobioawo amaambo miin ate, “Kuutua! Kase, Ekpe esiin Yuda, a-adooho adʌñ Defid akan. Anye akeme adikʌppọ ñwed ñnyʌñ mbom mme ufiikñkpọ itiaba ado.”

⁶ Ndin mmaakịt Ayịn Edọñ a-akebaaha nte emaewoowot, naña ada ke ufọọd ebekpo, mme aduuwem ñkpọ inaañ ye ñyobioawo nte eda ekanna anye ekʌk. Anye akenie nnʌk itiaba ye anyen itiaba, e-edoññoke mme Sịbidịd Abasi itiaba e-ekedọññọ ewuọọñọ eka ke ederimbod.

⁷ Anye amaadi adisio ikpañwed ado ke ubọk udom andikitie ke ebekpo.

⁸ Ke anye amaakebọ ikpañwed ado, mme aduuwem ñkpọ inaañ ye mme ñyobioawo edịp mme inaañ emaeduọññọ ke iso Ayịn Edọñ. Afịd ammọ keed-e-keed emaekaama ndido mme usan nte kood e-eyọhọke mme insensi e-edoññoke akam inua mme ndisana ikot Abasi.

⁹ Ndin ammọ emaekwọ ufa ikwọ ete: “Afo amedot adibọ ikpañwed, ñkʌppọ ñwed nyʌñ mbom mme ufiikñkpọ amọ, sia emaekuwowot Fiin ndin Afo amaadat iyiib mfo adep uduod awo asio ke mme aduuk, ubon awo, ye usem, ye idịd ayaak anọ Abasi.

¹⁰ Afo amenam ammọ edoñño abio ubọọñ ye mme aku ma enam utom Abasi, ndin ammọ eyaekaara ke ederimbod.”

¹¹ Ndin mmaase ñnyʌñ ñkop uyo uwak-uwak mme enyere, ke tọsịn ke tọsịn mme tọsịn duop ke itie tọsịn duop. Ammọ emaekanna ebekpo ye mme aduuwem ñkpọ ye mme ñyobioawo.

¹² Ke akpọsọñ uyo ammọ emaekwọ: “Ayịn Edọñ e-emaekewot adot adibọ adudu ye inie, ye ikike ye udịd, ye ukpono, ye ubọọñ ye itooro.”

¹³ Ndin ami mmaakop naña afịd-afịd ñkpọ se Abasi akebot ke ederimbod ke anyọñ me ke isọñ me ke idakisọñ me ke akpa mmọọñ ye afịd ñkpọ se isiine ke esịd ammọ ekwọ ete: “Yak itooro me ukpono me ubọọñ me odudu enie anye a-atieeghe ke ebekpo anyʌñ anie Ayịn Edọñ, ke nsi-nsi, nsi-nsi!”

¹⁴ Mme aduuwem ñkpọ inaañ emaebọọrọ, “Amen,” ndin me ñyobioawo emaeduọññọ ke isọñ enọ ukpono.