Adiyaara 4 - Ñwed Abasi Ke Ikọ Ibibio Ayo Mfịn

Ebekpo ke abio ubọọñ Abasi

¹ Ke mme ñkpọ ami emaekeboiyo mmaakịt naña usʌñ ana inwañ ke abio ubọọñ Abasi. Ndin akpa uyo añkekoppo akebaaha nte uyom ekamba adukpʌñ anyʌñ ambo miin ate, “Saña dọọk di, yak ami uwọt mme ñkpọ se a-anaaha atịppe ke ini iso.”

² Ini keed Sịbidịd amamben miin, ndin sese mmaakịt ebekpo ke abio Abasi, awo anyʌñ atie ke ebekpo ado.

³ Andikitie do akeba nte yaspa ye rubi. Adʌkabasi a-abiotto emeraad amaakanna ebekpo ami akʌk.

⁴ Mme ebekpo edịp mme inaañ emaekanna ebekpo ami ekʌk ndin ñyobioawo edịp mme inaañ emaetie ke mme ebekpo ado. Ammọ ekesịne mfia afọñidem enyʌñ eyaara ntinya kood ke iwuod ammọ.

⁵ Mmreñ-mmreñ akep-kep ye ñdukuun uyo aduma emaeto iso mme ebekpo ami ewuọñọ. Ke iso ebekpo ami, utuenikañ itiaba asʌk asak akpọsọñ-akpọsọñ. Afịd ami edo Sịbidịd Abasi itiaba.

⁶ Ñko ke iso ebekpo ado ñkpọ nte inyañ kraasi, ayamma nte kristad. Ndin ke ufọọd ebekpo mme ñkanñkʌk amọ akedo mme aduuwem ñkpọ inaañ, e-ekeyọhọke mme anyen ke iso mme edem.

⁷ Akpa aduuwem ñkpọ akeba nte ekpe, ayọhọ iba akeba nte ayaara enañ, ayọhọ ita akenie iso awo, ayọhọ inaañ akeba nte nturukpuum a-afuurọke-fuurọ.

⁸ Ndin afịd mme aduuwem ñkpọ inaañ ami ekenieeñe mba itiokeed enyʌñ enieeñe mme anyen eyọhọ idem, kpa ye ke idak mba amọ. Uweemeyo mme okoneyo ammọ iduọkkọ adudu ke edibo, “ ‘Adisana, adisana, adisana, ado Abọọñ Abasi Andikpon Ñkan,’ amaakeba, a-abaaha aba, ami adooho asʌk atịmme adi.”

⁹ Ini ake adodo a-mme aduuwem ñkpọ ami enọọhọ anditie ke ebekpo a-aduuho uwem ke nsi-nsi ubọọñ mme ukpono,

¹⁰ mme ñyobioawo edịp mme inaañ eduọọñọ ke isọñ ke iso anditie ke ebekpo enyʌñ ekpono anye ami aduuho uwem ke nsi-nsi. Ammọ emaebon mme ntinya ammọ ke ebekpo ebo:

¹¹ “Afo amodot, Abọọñ mme Abasi ñnyịn, edibọ ubọọñ mme ukpono mme adudu, sia afo akebotto afịd ñkpọ, ndin ke unyịmme mfo emaebot ammọ, ammọ enyʌñ enie uwem.”