Adiyaara 21 - Ñwed Abasi Ke Ikọ Ibibio Ayo Mfịn

Ufa abio ubọọñ Abasi ye ufa ederimbod

¹ Ndin mmaakịt ufa abio ubọọñ Abasi ye ufa ederimbod. Sia akpa abio ubọọñ Abasi ye akpa ederimbod emaeboiyo efep, ndin akpa mmọọñ ikibaaha aba.

² Ami mmaakịt Adisana Abio, ufa Yerusedem, naña awuọ ke abio ubọọñ ato Abasi adi, emaebeeñe anye idem nte ufa anwaan ndọ a-amaakesịne uyaiya afọn abeeñe idem abet ebendọ.

³ Ndin mmaakop ekamba uyo a-atooho ebekpo naña abo, “Se, idaha ami itie idʌñ Abasi aba ye mme awo, anye ayaadʌñ ye ammọ. Ammọ eyaedoñño mbon amọ, ndin Abasi ke Idem amọ ayaadʌñ ye ammọ, anyʌñ ado Abasi ammọ.

⁴ Anye ayaakwọọkkọ mmọọñayịd asio ammọ ke anyen. Ñkpa mme mfʌhọ mme ayịd mme ubiak idibaagha aba sia akaan edu unañña ñkpọ eboiyo efep.”

⁵ Anye a-aketieeghe ke ebekpo amaabo, “Ami mmenam afịd ñkpọ ado ufa!” Ndin anye ate, “Wet ami nịm sia mme ikọ ami edot se enịm ke akpanikọ, enyʌñ edoñño akpanikọ.”

⁶ Anye amaambo miin ate: “e-Enam ema. Ami ndo Arfa ye Omeka, Ntọọñọ ye Utịd. Anye i-itọñ asatta, ñyaanọ enye mmọọñ idịm uwem anwọñ mbọọhọ akʌk.

⁷ Anye a-akanna adinie afịd ami ndin Ami ñyaado Abasi amọ, anye ayaado ayịn mmi.

⁸ Ado mme mbon nduen, mbon e-mmiinịmme ke akpanikọ, mbon ndubiam, mme awodawo, mme esịn efịbe ye mme asaña akpara, mme anam utom mayịk, mme akpono ndem ye afịd mme asʌhọ nsu, itie ammọ adido ke ibiok ikañ sọọfọ. Ado ayọhọ ñkpa iba.”

Abufa Yerusedem, anwaan ndọ Ayịn Edọñ

⁹ Keed ke atu mme enyere itiaba e-ekekamake mme bọwịd e-ekeyọhọke ye mme akpatre unọmọ itiaba ado amaadimbo miin ate: “Di yak uwọt fiin ufa anwaan ndọ, anwaan Ayịn Edọñ.”

¹⁰ Ndin anye amamben miin ke Sịbidịd awuọ aka ekamba anyan abod akeñwọt Adisana Abio a-akewuọọhọ ke ikpaanyọñ ato Abasi adi,

¹¹ anye akeyaayama ke ntak ubọọñ Abasi, akenyʌñ asesem nte nsọñudua yuwed, nte yaspa, asana nte kristad.

¹² Anye akenie ekamba anyan ndibene e-ekesioho inuaatop duop mme iba. Mme enyere duop mme iba emaenyʌñ eda ke mme inuaatop ado. Ke mme inuaatob ado emaeweed mme anyịñ esion Isred duop mme iba.

¹³ Mme inuaatob ita ekeba ke usakka utịn, ita ke adoro, ita ke usuuk mme ita ke usoputịn.

¹⁴ Ndibene abio ado akenie itiad idakisọñ duop mme iba, ke idem ammọ emaeweed mme anyịñ mme abọsịd Ayịn Edọñ duop mme iba.

¹⁵ Enyere andikitañ ikọ mme ami amaakama esañ udomo ñkpọ kood adidomo abio ado ye mme inuaatob ye ndibene amọ.

¹⁶ Ekebọp abio ado nọ mbañ amọ inaañ ado ukem-ukem, uniọñ amọ akedo ukem mme ubom amọ. Anye amaadomo abio ye esañ udomo ñkpọ anyʌñ akịd ke akedo ikie tọsịn duop mme iba (12,000) ke unyọọñ, ubom amọ mme udakka ñkpọñ isọñ akenyʌñ ado ukem.

¹⁷ Enyere amaadomo ndibene amọ akịd ke akedoppo kubịd ikie mme aba ye inaañ (144) ke udomo awo, a-enyere ado akekamake.

¹⁸ Ekenam ndibene ke yaspa, abio ke idem amọ ekebọp ke ata kood a-akeyamake nte kras.

¹⁹ Ekedat afịd nsio-nsio nsọñudua itiad ediọñ mme itiad idakisọñ abio ado. Akpa itiad idakisọñ akedo yaspa, ayọhọ iba akedo safaiya, ayọhọ ita kaasedoni, ayọhọ inaañ emeraad,

²⁰ ayọhọ ition sadoniks, ayọhọ itiokeed kanedian, ayọhọ itiaba krisodait, ayọhọ itiaita berid, ayọhọ usʌkeed topas, ayọhọ duob krisopas, ayọhọ duop mme keed yasin, ayọhọ duop mme iba ametisi.

²¹ Mme inuaatob duob ye iba ado ekedoñño nsọñudua mme duob ye iba. Ekedat nsọñudua mme ami enam mme inuaatob keed-e-keed. Ekekama ata nsasana kood a-akebaaha nte Kras e-ekemeke idat ñkịt iso enam ekamba akpọusʌñ abio ado.

²² Ami ñkekịtte tembịd ke abio ado sia Abọọñ Abasi Andikan Ñkan ye Ayịn Edọñ edoñño tembịd amọ.

²³ Abio ado iyemme utịn mme afiọñ ediyama ke anye sia ubọọñ Abasi anọ anye unwana, ndin Ayịn Edọñ ado utuenikañ amọ.

²⁴ Mme idịd ediisaña ke unwana amọ, ndin mme ndidem ederimbod eyaeben ubọọñ ammọ edʌk ke esịd ammọ.

²⁵ Ibaaha usen ndomokeed ediibet usʌñ amọ sia akoneyo idiibaaha ke udo.

²⁶ Eyaeben ubọọñ mme ukpono mme idịd edʌk edi udo.

²⁷ Ñkpọ ndomokeed a-mmiisanake idiidʌkkọ do, awo ndomokeed a-anamma ñkpọ abuud mme ñkara idiidʌkkọ do, ibọhọke mbon emaekeweewet anyịñ ammọ ke ñwed uwem Ayịn Edọñ.