Adiyaara 20 - Ñwed Abasi Ke Ikọ Ibibio Ayo Mfịn

Isua tọsịn keed

¹ Ndin ami mmaakịt naña enyere awuọ ato abio ubọọñ Abasi adi, akama ukpọhọde Abis, mme ekamba ñkprọñ ke ubọk amọ.

² Anye amaamʌm drakọn, akaan udʌkikọd ado, a-adooho andidiọọk, me Setan, anyʌñ akọp anye ke isua tọsịn keed.

³ Anye amaatop anye asịn ke Abis, ayịd usʌñ anyʌñ afiik ke ufịk ñkpọ, mbaak anye adibiaaña mme idịd aba tutu mme isua tọsịn keed edikem. Ado amaaboiyo, eyaetat anye eyaak ke etək-etək ini.

⁴ Ami mmaakịt mme ebekpo mbon e-emaekenọ adudu adibiire ikpe eketieeghe. Ndin mmaakịt ukpọñ mbon e-ekebiooho ammọ iwuod ke ntak ikọ ntiense Yisọs a-ammọ eketañña mme ke ntak ikọ Abasi. Amọ ikikponoke idiọọk unam mme mbiod amọ ikinyʌññọ ibọ idiọọñọ ke akpọiso mme ke ubọk ammọ. Ammọ emaeseed ke ñkpa ndin emaedu uwem enyʌñ ekeene Krais eda ukara ke isua tọsịn keed.

⁵ (Mbon se ikisʌhọ ke atu mme akpañkpa ikisette tutu ke isua tọsịn keed emaekeboiyo.) Ami ado akpa adised ke ñkpa.

⁶ Afọfọn anọ mbon e-enieeghe udeme ke akpa adised ke ñkpa. Ñkpa ayọhọ iba inieeghe adudu ke idem ammọ, ado ammọ eyaedoñño mme ndisana aku Abasi ye Krais ndin ammọ eyaekeene anye eda ukara ke isua tọsịn keed.

Ubiireikpe Setan

⁷ Ke mme tọsịn isuakeed emaeboiyo, eyaesio Setan ke ñkpakọb amọ

⁸ ndin anye ayaawuọ akebiaaña mme idịd ke mbeñ inaañ ederimbod, Kọk ye Makọk, adikoono ammọ mbon itie keed nọ enwana ekọñ. Ke ibad, ammọ ewak nte ntan ke mben inyañ.

⁹ Ammọ emaesaaña ke udịm ekpịkke ukpa ederimbod enyʌñ ekanna itie idʌñ nditọ Abasi ekʌk, abio a-anye amaaha. Ado ikañ amaato abio ubọọñ Abasi adita ammọ akwaad.

¹⁰ Ndin emaetop Setan a-akebiaañake ammọ esịn ke ibiok ikañ sọọfọ e-emaeketotop idiọọk unam ado mme nsu-nsu brọfed isịn. Eyaetʌkkọ ammọ uweemeayo mme akoneyo ke nsi-nsi nsi-nsi.

Ubiireikpe mme akpañkpa

¹¹ Ndin mmaakịt ata ekamba afia ebekpo ye awo andikitie ke anye. Isọñ mme ikpaanyọñ emaefeeñe ekpọñ iso amọ, ndin itie ikibaaha inọ ammọ.

¹² Ndin mmaakịt mbon e-emaekekpañña, ñkpoon ye ntək-ntək, naña eda ke iso ebekpo, emaenyʌñ ekụụmọ mme ñwed. Emaekʌppọ ñwed mfen a-adooho ñwed uwem. Mbon e-emaekekpañña ekebọ ubiire ikpe ammọ ekeene se ammọ ekenañña naña ekewet ke ñwed.

¹³ Akpa mmọọñ amaasaana mme akpañkpa sikisịne anye ke esịd, ndin ñkpa ye Abioekpo emaesaana mme akpañkpa se ikisịne ammọ ke esịd eyaak, ndin emaenọ awo keed-e-keed ubiireikpe akeene se anye akenam.

¹⁴ Ndin emaetop ñkpa ye Abioekpo esịn ke ibiok ikañ. Ibiok ikañ ado ñkpa ayọhọ iba.

¹⁵ Awo keed ake adodo a-anyịñ amọ mmiikiwereke ke ñwed uwem, emaetop esịn ke ibiok ikañ ado.