Adiyaara 2 - Ñwed Abasi Ke Ikọ Ibibio Ayo Mfịn

Ñwed e-enọọhọ ufọkabasi ke Efisọs

¹ “Wet nọ enyere ufọkabasi ke Efisọs: Ami ado mme ikọ anye a-akamake mme ntantaafiọñ itiaba ke ubọk udom anyʌñ asaña ke ufọọd eto kandịd nte kood itiaba.

² Ami mmediọọñọ mme utom mfo, mme ñwaidem ye ime a-afo anieeghe. Ami mmediọọñọ naña afo uduukanna uyọ mbon ndubịk, ndin afo amedomo mbon e-ebooho ke mmimọ idoñño mme abọsịd ase, ado idoññoke, edo mbon abiaaña.

³ Afo amenie ime anyʌñ abọ ukuud ke ntak anyịñ Mmi, ado ukpaaha mba.

⁴ Ado kpa ye ado, mmenie ikọ ye afo: Afo amekpọñ akpa ima a-afo akenieeghe.

⁵ Toiyo ndin ñkoñkoñ idaha a-afo aduọọhọ akpọñ! Kappa esịd nyʌñ tịmme kenam mme akpa utom a-afo akesinamma. Mmuukappake esịd, ñyaadubịne ndidooro eto kandịd mfo nsio ke itie amọ.

⁶ Ado e-ebat ami nte eti unọ fiin: Afo amesua ubọkutom mme Nikodaitan, a-ami ñnyʌññọ nsua.

⁷ Anye a-anieeghe utọñ yak anye akop se Sịbidịd adọkkọ mme ufọkabasi. Anye a-akanna ñyaanọ anye unen adidia nto mfịd eto uwem, a-adooho baradais Abasi.

Ñwed e-enọọhọ ufọkabasi ke Simina

⁸ “Wet nọ enyere ufọkabasi ke Simina: Ami ado mme ikọ anye a-adooho Akpa ye Akpatre, a-amaakekpa ndin atịmme adu uwem.

⁹ Ami mmediọọñọ mme ukuud mfo ye uweene mfo–ado afo ado imọ! Mmediọọñọ mme ndubiam mbon e-ebooho ke idoñño mme Yuu ke ini ammọ mmiidoññoke, ado edoñño itie ubọñ akam Setan.

¹⁰ Kuudịkke ubaña ukuud se a-afo uduubọ. Ami ñtañ unọ, andidiọọk ayaadọñ usʌk ndufo ñkpakọb, ke edidomo ndufo nse, ndin eyaebọ ndutʌkkọ ke usen duop. Esọọñọ eda, akpekọm ado ke ñkpa, ndin Ami ñyainọ ndufo anyanya uwem.

¹¹ Anye a-anieeghe utọñ, yak anye akop se Sịbidịd adọkkọ mme ufọkabasi. Anye a-akanna idiiktte ndutʌkkọ ñkpa ayọhọ iba.

Ñwed e-enọọhọ ufọkabasi ke Bekamọm

¹² “Wet ndin nọ enyere ake ufọkabasi Bekamọm: Ami ado mme ikọ anye a-akamake asọp iso iba eduad.

¹³ Ami mmediọọñọ itie nte afo adʌñ–itie a-Setan anịmme ebekpo amọ. Ado afo amemʌm anyịñ mmi akama. Ukunyʌññọ ukañ ikọ mmi, kpa ke ini Antipas, ata akpan ntiense mmi, e-ekewotto ke abio ndufo, ke itie idʌñ Setan.

¹⁴ Kpa ye ado, nsʌk ñkekịt idiọọk ñkpọ ke atu ndufo: Ndufo emenie mbon e-eyiireke ke ukpeebñkpọ Badam e-ekekpeebe Badak adinịm ñkpọiduọ ke usʌñ nditọ Isred ke adidia mme ndidia uwa ndem nyʌñ nsaña use ye usịn efịbe.

¹⁵ Esʌk enenie mbon ukama edu ukpeebñkpọ mme Nikodaitan.

¹⁶ Kappa esịd! Mmiidooho ntodo, ñyaadi ubịne fien usọp-usọp, ndin ñyaañwana ye ammọ mme eduad a-ansịneke miin ke inua.

¹⁷ Anye a-anieeghe utọñ yak anye akop se Sịbidịd adọkkọ mme ufọkabasi. Anye a-akanna ñyaanọ anye usʌk ndedịbe mana. Ñyaanyʌñ nnọ anye afia itiad ye ufa anyịñ a-adiiwere ke itiad ado, adooho awo andibọ ikpọọñ adidiọọñọ.

Ñwed e-enọọhọ ufọkabasi ke Tiatira

¹⁸ “Ndin wet nọ enyere ufọkabasi ke Tiatira: Ami ado mme ikọ Ayịn Abasi, a-mme ñkua anyen ammọ esakka nte edeme ikañ, ñkpad amọ ebit ufọfọb brọnsi.

¹⁹ Mmediọọñọ mme utom mfo, ima mme mbuọdidem mfo; adinam mme ime mfo, ndin se afo anam idaha ami akpon akan ake akpa.

²⁰ Kpa ye ado, aba ñkpọ a-andatta ubiom fiin ikpe: afo ameyọ awonwaan ado, Yesebeed, a-akoodo idem amọ brọfetes. Ato ke ukpeebñkpọ amọ, anye atịn mme mbed mmi usʌñ nọ esaña use, esịn efịbe enyʌñ edia ndidia uwa ndem.

²¹ Ndin mmenọ anye ufañ edikappa esịd ñkpọñ edu use ado anye inyịmmeke.

²² Sese ñyaatop anye nsịn ke ikʌk ukuud ñnyʌñ nsịn mbon e-esịnne efịbe mme anye ke ekamba ukuud, ibọhọke ammọ ekappa ekpọñ ndiọi edu ammọ.

²³ Ndin Ami ñyaawood nditọ ammọ. Ndin afịd mme ufọkabasi eyaediọọñọ ke Ami ndo andiduuñọ ekikere mme esịd ndin ñyaanọ awo keed-e-keed ñkpọ ayịnutom ñkeene naña mme utom ammọ ebaña.

²⁴ Ado idọkkọ ndufo mbon sisʌghọ ke Tiatira e-esịnne edu ukpeeb amọ, mmiinyʌññọ ikpeeb ndubio ndutəño ifiọk Setan, ‘Ami ndiinọọhọ ndufo mbiomo mfen ñkan ami.

²⁵ Ado etʌm se emaekenenie emʌm kama esọñ ubọk tutu ndi.’

²⁶ Ndin anye a-akanna anyʌñ anam uduak Mmi akesịm utịd ñyaanọ anye adudu adikara mme idịd.

²⁷ ‘Anye ayaakara ammọ ye esañ ukwak; ayaaboom ammọ ñkeñe-ñkeñe nte ñkpọ e-edommo ke mbad’ kpa naña Ami ñkebọọ adudu nto Ete Mmi.

²⁸ Ami ñyanyʌñ nnọ anye ntantaafiọñ usieere.

²⁹ Anye a-anieeghe utọñ yak anye akop se Sịbidịd adọkkọ mme ufọkabasi.