Adiyaara 18 - Ñwed Abasi Ke Ikọ Ibibio Ayo Mfịn

Eseme ke abaña aduọ Babidọn.

¹ Ke ami amaakeboiyo mmaakịt enyere keed mfen naña asọiyọ ato abio ubọọñ Abasi adi. Anye amaanie ekamba adudu, ndin ederimbod amaayama ato ntak uyai amọ.

² Anye amaabọñ ke akpọsọñ uyo ate: “ ‘Aduọ! Ekamba Babidọn aduọ!’ Anye adido itie idʌñ ndiọi sịbidịd mme nde mme ndiọi sịbidịd ekaiyake, itie mme afịd ndiọi ye mme ndubiam inuen ekaiyake, itie ndedek unam.

³ Sia afịd mme idịd emaekeñwọọñ inaam ukọd efịbe amọ. Mme ndidem ederimbod emaesịn efịbe mme anye, ndin ikpọ mme anyam udua ke ederimbod emaekappa emọinyọ ato ke uwak ñkpọ udia uwem amọ.”

Nnọitem adifeghe mbọkọ ubiireikpe Babidọn

⁴ Ndin mmaakop naña uyo mfen ato abio ubọọñ Abasi abo, “ ‘Ewuọọñọ edi ekpọñ anye, ikọd Mmi mbaak,’ ndufo edikeene ewuaana ke mme ndiọiñkpọ amọ mbaak ndufo idinyʌñ ibọọ mme unọmọ amọ ndomokeed;

⁵ sia mme ukwañ ñkpọ amọ edọọk ekesịm abio ubọọñ Abasi, ndin Abasi atoiyo mme ndubịk amọ.

⁶ Itịmme inọ anye se anye akenọ, ikpe anye ukpa iba se anye akenam. Waak nọ anye ke udomo kọọb amo ñkemba

⁷ Nọ anye adaña ndutʌkkọ mme mfʌhọ nte ubọọñ ye mme ñkpọuto udia uwem se anye akenọ idem amọ. Ke esịd amọ anye asʌk awọk inua, ‘Ami ntie nte abọọñanwan; Ami ndooho ebekpa, ndin ndiinyʌññọ mba ke mfʌhọ.’

⁸ Ke ntodo, ke usen keed mme unọmọ amọ eyaekan anye ubọk: ñkpa, mfʌhọ mme akañ. Ikañ ayaata anye asobo sia Abọọñ Abasi andibiire ikpe nnọ anye ado Andikpon ñkan.

Ñwuoro ita asịmme Babidọn

⁹ “Ke ini mme ndidem ederimbod e-ekesiine efịbe ye anye, e-ekenyʌññọ ewuaana ke mme ñkpọuto udia uwem amọ ediikịt nsʌñikañ a-afọppọ anye, ammọ eyaetuañña enyʌñ efʌhọ ke ntak amọ.

¹⁰ Ke akpọsọñ ndịk adinam ammọ edikịt ndutʌkkọ amọ, ammọ eyaeda nsan-nsan etua anye. “ ‘Adọdiọọk unọ fiin! Adọdiọọk unọ fiin o ekamba abio, O Babidọn, akop adudu abio! Ke idak awa keed, nsobo mfo adi!’

¹¹ “Mme ikpọ anyam udua ederimbod eyaetuañña enyʌñ efʌhọ anye sia awo ndomokeed ideppe mme ñkpọ udua ammọ aba,

¹² mme ñkpọ udua kood, sịrifa, nsọñudua itiad ye mme ñkwa; mfọọn dinen, bọbịd, srịk ye ndad-ndad afọñ; afịd-afịd utọ eto sitrọn, ye mme nsio-nsio ñkpọ e-edatta nnʌk eniin enam, nsọñudua eto brọnsi, ukwak ye mabịd;

¹³ mme ñkpọ udua sinamọn ye spaisi, insensi, miir, frankinsensi, ukọd ye adan ọdif, frawa uyo ye abakpa e-etʌmmọ ekọk; mme enañ ye edọñ; enañ mbakara ye ukpadñkpọ; mme ikpọkidem awo ye mme ukpọñ awo.

¹⁴ “Ammọ eyaebo, ‘Mfịd a-afo akeyemme ukpọñ fiin. Afịd inie mme uyai inie mfo e-esoomo, idiitịmmeke ubịne aba.

¹⁵ Mme ikpọ anyam udua e-ekesinyamma mme ñkpọ enyʌñ enam inie ammọ eto anye ediidada ke anyanusʌñ ese anye, ekop ndịk ke ukuud amọ. Ammọ eyaetuañña enyʌñ efʌghọ,

¹⁶ ndin etañ ke ọkpọsọñ ete: “ ‘Adọdiọọk unọ fiin! Adọdiọọk unọ fiin! O ekamba abio a-akesisịneke dinen, bọbịd ye ndad-ndad anyʌñ asesem ye kood ye nsọñudua itiad ye mme ñkwa.

¹⁷ Ke awa keed kpọd utọ ekamba inie ado adʌk nsobo!’ “Afịd mme awad inyañ mme afịd mme andisika isañ ke nsʌñikañ, mme awat nsʌñikañ, mme afịd mbon uyem idịp udia nto mmọọñ eyaeda nsan-nsan.

¹⁸ Ke ini ammọ ediikịt nsʌñikañ a-atooho edifọp anye, eyaesio ñkpọ, ‘Akenaanam mme aba abio nte utọ ekamba abio ami?’

¹⁹ Ammọ eyaeduọk ntọñ ke mme iwuod ammọ, ndin ke ntuaaña mme mfʌhọ eyaebọñ ñkpo ebo: “ ‘Adiọọk unọ fiin! Adọdiọọk unọ fiin, ekamba abio, itie a-afịd mbon se ikinie ubom ke akpa mmọọñ, e-ekedidooho mme enie inie ato ntak imọ amọ! Ke awa keed emaesịn anye ke nsobo!’

²⁰ “Nem esịd baña anye, afo ikpaanyọñ! Inemesịd ndisana awo ye mme abọsịd ye mme brọfed! Abasi akpe ikpe amọ ke afịd se anye akinam ndufo!”

Ata akpatre ñwuoro Babidọn

²¹ Ndin ata akob adudu enyere amaabenne ata ekamba itiad a-akekponno nte ekamba itiad ukọkñkpọ atop asịn ke akpa mmọọñ anyʌñ abo: “Ke utọ afai ami ke ediitop Babidọn iduọọk, ndin awo ndomokeed idiikịtte anye aba.

²² Awo idiikoppo aba uto fiin ikwọ mme ebre ndido ye mme akwọ ikwọ, mme afịd ifiom ye mme afịd adukpəñ. Awo idiinyʌññọ ikịt mme anam utom usọ ke ekwere mfo aba. Awo idiinyʌññọ ikop aba uyom ukọkñkpọ uto fiin.

²³ Ñko awo idiinyʌññọ ikịt aba unwana ikañ a-atooho utuenikañ naña ayama uto fiin, awo idiikoppo uyo ebendọ ye eke anwaan ndọ aba. Mme anyam udua mfo akekpoon ekan afịd awo ke ederimbod. Ato ke ntak mme ifọd mfo afịd mme idịd emaewakka ekpọñ usʌñ.

²⁴ Ke esịd amọ emaekịt iyiib mme brọfed ye ake mme ndisana awo Abasi, ye ake afịd awo se ekewood ke ederimbod.”