Adiyaara 17 - Ñwed Abasi Ke Ikọ Ibibio Ayo Mfịn

Babidọn, awonwaan akpara ke idiọọk unam

¹ Keed ke atu enyere itiaba a-akenieeghe bọwịd itiaba amaadi adimbo miin ate, “Di, ke ñyakuwọd fiin ufen ekamba akpara ado, anye a-atieeghe ke uwak mmọọñ

² Mme ndidem ederimbod emaesiin efịbe mme anye, ndin ukọd efịbe amọ amaanaam mme andidʌñ ke isọñ.”

³ Ndin enyere amaamben miin ke Sịbidịd asio aka ke akpa ntatan. Do mmaakịt awonwaan naña atie ke ndad-ndad idiọọk unam e-ekefʌkkọ anye mme anyịñ isuuñọ, akenyʌññọ anie iwuod itiaba mme nnʌk duop.

⁴ Afọñ a-awonwaan ado akesịneke akedo bọbịd ye ndad-ndad, akenyʌñ asesem nte kood, ye nsọñudua itiad mme ñkwa. Anye amaakama kọọb kood ke ubọk amọ a-akeyọhọke ye ndubiam ñkpọ ye mbad efịbe amọ.

⁵ Emaewet anyịñ ami ke akpọiso amọ: ndedịbe ñkpọ utịbe akwa Babidọn andido eka mme akpara ye mme ñkpọ mbubiam ederimbod.

⁶ Ami mmaakịt ke iyiib mme ndisana ikot Abasi amaanaam awonwaan ami, iyiib mbon e-eketieeghe ikọ ntiense enọ Yisọs. Ke mmaakekịt anye, idem amaañkpa tutu.

⁷ Ndin enyere ado amaambo: “Nso-o inam idem ukpa fiin ntom? Ami ñyaanam unwaña fiin ndedịbe ñkpọ a-abañake awonwaan ami mme idiọọk unam a-anye awatta a-anyʌññọ anie mme iwuod itiaba ye mme nnʌk duop.

⁸ Idiọọk unam a-afo akekịtte, a-amaakebaba ini keed ko, ibaaha aba idahami, ndin ayaawuọ ato Abis adinọ anye adʌk nsobo amọ. Mbon e-edʌñọke ke ederimbod e-emiikiwette anyịñ ammọ ke ñwed uwem tọọñọ ke aditọọñọ ederimbod eyaeba ke ata ñkpaidem ke ini ammọ ediikịt idiọọk unam ado, sia ini keed anye ama aba, idahami anye ibaaha, ado ayaamaana adi.

⁹ “Ñkpọ ami ayem iwuod ikike. Mme iwuod itiaba ado edoñño mme ntək abod itiaba awonwaan ami atieeghe.

¹⁰ Ammọ enyʌñ edoñño mme ndidem itiaba. Ition eduọññọ, keed mmọdo, anye ako idieeghe diin; ado anye amaadi, ana adiba ke etək-etək ini.

¹¹ Idiọọk unam ado a-akebaaha ini keed koo, a-mmiibaaha idahami aba, ado ayọhọ edidem itiaita. Anye asịne ke atu itiaba ado ndin ayaaka nsobo amọ.

¹² “Mme nnʌk duop a-afo akekịtte edoñño mme ndidem duop a-mmiibọọhọ mme abio ubọọñ ammọ diin, ado eyaebọ adudu edikara nte ndidem ye idiọọk unam ke awa keed.

¹³ Ammọ enie uduak keed ndin eyaeyaak adudu mme ukara ammọ enọ idiọọk unam.

¹⁴ Ammọ eyaenwana ekọñ mme Ayịn Edọñ, ado Ayịn Edọñ ayaakan ammọ sia anye ado Abọọñ mme mbọọñ ye Adidem mme ndidem, ndin mbon e-emaekekood, emek, enyʌñ edoñño mme ibed e-ebuọttọ idem mme anye eyaeba mme anye.”

¹⁵ Ndin enyere amaambo miin, “Mme akpa mmọọñ a-afo akekịtte nte akpara ado atie edoñño mme awo, atu awo, mme idịd ye mme usem.

¹⁶ Idiọọk unam ado mme nnʌk duop ado eyaesua akpara ado. Ammọ eyaesobo anye enyʌñ esuuk anye ifed; enyʌñ eta abʌkidem amọ enyʌñ efọp anye ke ikañ.

¹⁷ Sia Abasi asịn ke esịd ammọ ate ammọ enam uduak amọ ema ke edinyịmme edinọ idiọọk unam ami adudu adikara, tutu ikọ Abasi adisu.

¹⁸ Awonwaan a-afo akekịtte do ado ekamba abio a-akarake mme ndidem ederimbod.”