Adiyaara 15 - Ñwed Abasi Ke Ikọ Ibibio Ayo Mfịn

Mme enyere itiaba ye unọmọ itiaba

¹ Mmaakịt ke abio ubọọñ Abasi ekamba utịbe idiọọñọ mfen: enyere itiaba ye mme akpatre unọmọ itiaba, akpatre sia ke ammọ iyadesịd Abasi a-akweeñe.

² Ndin mmaakịt se ikitie nte akpa mmọọñ kraasi a-abuaahake mme ikañ, mbon e-ekedaaha ediana akpa mmọọñ ado ekedo mbon e-emaekekan idiọọk unam mme mbiod amọ ye nọmba anyịñ amọ. Ammọ emaekaama ndido a-Abasi akenọọhọ ammọ

³ enyʌñ ekwọ ikwọ Moses, isʌñutom Abasi, mme ikwọ Ayịn Edọñ, “Mme adinam mfo akpoon anyʌñ adoñño utịbe ñkpọ, Abọọñ Abasi Andikpon Ñkan. Mme usʌñ mfo enen enyʌñ edoñño akpanikọ, Adidem mme idịd.

⁴ Mme anie mmiiduufegheke fiin, O, Abọọñ! Inyʌñ inọ anyịñ mfo ubọọñ? Sia Afo ikpọọñ ado adisana. Afịd mme idịd eyaedukpono fiin, sia eyaara mme nti utom mfo.”

⁵ Ami amaakeboiyo, mmakịt ke abio ubọọñ Abasi nte tembịd a-adooho tabanakịd ntiense, akʌkkọ.

⁶ Mme enyere itiaba e-ekamake mme unọmọ itiaba emaewọwuọọñọ eto tembịd edi. Ammọ ekesiine nsasana, ñyayama dinen enyʌñ ebọọbọ ñkpaha nte kood ekanna ikpanesịd ammọ.

⁷ Ndin keed ke atu mme aduuwem unam inaañ ado amaanọ mme enyere itiaba mme bọwịd nte kood e-emaekeyọhọ mme ifiopesịd Abasi, a-aduuho uwem ke nsi-nsi ye nsi-nsi.

⁸ Ndin tembịd amaayọhọ mme nsʌñikañ a-atooho ubọọñ Abasi mme adudu amọ ndin awo ndomokeed ikikanna idʌk tembịd tutu mme unọmọ itiaba ake mme enyere itiaba ekekweeñe.