Adiyaara 14 - Ñwed Abasi Ke Ikọ Ibibio Ayo MfịnAyịn Edọñ mme 144,000 1 Ndin mmaase ñnyʌñ ñkịt Ayịn Edọñ naña ada ke iso mmi ke Abod Sayọn ye mme awo 144,000 e-emaekewet anyịñ Ayịn Edọñ mme anyịñ Ete amọ ke mme akpọiso ammọ. 2 Ndin mmaakop uyom naña ato abio ubọọñ Abasi a-akeyomoke nte ndufuud mmọọñ mme nte aduma asakka. Uyom mfen añkekoppo akeba nte ikwọ ndido a-mme andibre ebreke. 3 Ndin ammọ emaekwọ ufa ikwọ ke iso ebekpo ye ke iso mme aduuwem ñkpọ unam inaañ ye mme ñyobioawo ado. Awo ndomokeed ikikanna ikpeeb ufa ikwọ ado ibọhọke mme awo 144,000 ado e-emaekefak esio ke ederimbod. 4 Mbon ami ekedo mbon a-mmiikisappake idem ammọ ye ibaan, sia emaenịm idem ammọ ke edisana. Ammọ esʌk ekeene Ayịn Edọñ nte anye akaaka. Emaedep ammọ esio ke atu awo, ete ke ammọ edo akpa mfịd enọ Abasi ye Ayịn Edọñ. 5 Nsu ndomokeed ikibaaha ammọ ke inua; ammọ enana ndo. Mme enyere ita 6 Ndin mmaakịt enyere mfen naña afụụro ke ufọọd afịm, ndin anye amaanie nsi-nsi eti etob adikwọrọ nnọọ mme andidʌñ ke ederimbod: afịd mme idịd, aduuk, usem mme afịd ubon awo. 7 Anye amaabo ke akpọsọñ uyo, “Baak Abasi nyʌñ nọ anye ubọọñ sia awa ubioro ikpe amọ adikem. Kpono anye a-akenamma mme ikpaanyọñ, ederimbod akpa inyañ, ye mme idịm mmọọñ.” 8 Ayọhọ enyere iba amaakeene anye abo, “ ‘Aduọ! Ekamba Babidọn aduọ,’ anye a-akenamma afịd mme idịd enwọñ mmịn edamma mme efịbe amọ.” 9 Ayọhọ enyere ita amaakeene ammọ ndin abo ke akpọsọñ uyo: “Adieke awo ndomokeed akponoke idiọọk unam mme mbiod idem amọ, anyʌñ abọ idiọọñọ ke akpọiso mme ke ubọk amọ, 10 anye ñko ayaanwọñ ifiobesịd Abasi nte ukọd e-emaeketọkkọ idọñ ayọhọ kọọb iyadesịd amọ. Eyaedutʌkkọ anye ke ikañ sọọfọ ke iso mme ndisana enyere mme Ayịn Edọñ. 11 Ndin nsʌñikañ ndutʌkkọ ammọ adọọk anyọñ ke nsi-nsi nsi-nsi. Nduọkadudu ibaaha uweeme me akoneyo inọ mbon e-ekponoke idiọọk unam ado ye mbiod amọ, ye awo ake adodo a-abọọhọ idiọọñọ anyịñ amọ.” 12 Ñkpọ ami ayem ime ye adiyọ nto mme ndisana awo e-enịmme mme ibed Abasi enyʌñ esọñọ eda ke Yisọs. 13 Ndin mmaakop uyo naña ato ke abio ubọọñ Abasi abo: “Wet: Afọfọn anọ mme akpañkpa e-ekpaaha ke Abọọñ tọọñọ ke ami.” “Ih,” Sịbidịd abo, “ammọ eyaeduọk adudu ke utom ammọ sia mme adinam ammọ eyaekeene ammọ.” Idọk ye uyịmme miin ake ederimbod 14 Mmaase, nnyʌñ ñkịt ke iso mmi afia ntọñanyọñ, ndin andikitie ke ntọñanyọñ ami akeba nte ayịn awo ayara ntinya kood ke iwuod amọ anyʌñ akama usọb ikwa ke ubọk amọ. 15 Ndin enyere mfen amaawuọ ke tembịd adikood andikitie ke ntọñanyọñ ke akpọsọñ uyo, ate: “Ben usọb ikwa mfo tọọñọ adikpeeñe ukpeeñe, sia ini idọk adikem sia ukpeñe ederimbod adad.” 16 Ndin andikitie ke ntọñanyọñ amaakanna usọb ikwa ukpeeñe amọ akpeeñe ukpeeñe ederimbod. 17 Enyere mfen amaawuọ ke tembịd Abasi ke abio ubọọñ Abasi adi, anye ñko amaakama nsọsọbọ usọb ikwa ukpeeñe. 18 Enyere mfen a-asiseeghe ñkpọ abaña ikañ, ato itie uwa adi anyʌñ akood andikikama usọb ikwa ukpeeñe ke akpọsọñ uyo: “Ben ikwa ukpeeñe mfo nyʌñ kpịkke mme ayọ kreb siooño ke fain ederimbod, sia kreb a-adat.” 19 Enyere ado amaatop usọb ikwa amọ akanna anyʌñ akpịkke mme kreb ederimbod atop adọñ ke akwa udʌñ unuak ukọd ifiobesịd Abasi. 20 Emaetịm ammọ enuak ke udʌñ unuak ukọd ke uwuọñkpọñ abio, ndin iyiib amaaduọkkọ ato udʌñ unuak ukọd, awak tutu adọọk akeda ke idaha inua enañ mbakara anyʌñ anyọọñ ke nte stedia 1,600. |
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.
Biblica, Inc.