Adiyaara 13 - Ñwed Abasi Ke Ikọ Ibibio Ayo Mfịn

Idiọọk unam a-awuọọhọ ke inyañ.

¹ Ndin drakọn ado amaada ke mben akpa inyañ. Ndin ami mmaakịt naña idiọọk unam awuọ ke akpa inyañ. Anye akenie nnʌk duop mme iwuod itiaba, ntinya duop enyʌñ edudot ke mme nnʌk duop ado, ndin ke iwud keed-e-keed emaewet anyịñ isuuñọ.

² Idiọọk unam ado a-ñkekịtte akebit ekpeikọd, ado anye akenie ñkpad nte anawịd ekpe, inua amọ anyʌñ abiod ake amon ekpeikọd. Drakọn amaayaak adudu amọ ye ebekpo amọ ye akwa adudu amọ anọ idiọọk unam ado.

³ Keed ke atu mme iwuod idiọọk unam ado aketie nte akenie ata ekamba unan a-akpekekemeke iwot anye, ado unan ado amaakpa. Idem amaakpa afịd ederimbod ndin ammọ enyʌñ ekeene idiọọk unam ami.

⁴ Mme awo emaekpono drakọn ado sia anye amaayaak ukara amọ anọ idiọọk unam ado. Ammọ emaenyʌñ ekpono idiọọk unan ami enyʌñ ebịp ebo, “Anie awo itie nte idiọọk unam! Anie awo ikeme edinwana ekọñ mme anye?”

⁵ Emaenọ idiọọk unam ami inua aditañ mme ikọ asian-asian ye mme ikọ isuuñọ ye edidat ukara, ke afiọñ aba ye iba.

⁶ Anye amaakʌppọ inua amọ adisuuñọ Abasi, asuenne anyịñ amọ ye itie idʌñ amọ ye mme andidʌñ ke abio ubọọñ Abasi.

⁷ Emaenyʌñ enọ anye adudu adinwana ekọñ ye mme ndisana ikot Abasi ñnyʌñ ñkan ammọ. Ñko emaenọ anye adudu adikara afịd ubon awo, aduuk, usem mme idịd.

⁸ Afịd mme andidʌñ ederimbod eyaekpono idiọọk unam ado, afịd awo se ediiwette anyịñ ammọ isịn ke ñwed uwem a-anieeghe Ayịn Edọñ e-ekewotto tọọñọ ke ini ekebotto ederimbod.

⁹ Awo akenie utọñ yak anye akop.

¹⁰ Awo ake adodo a-akenaaha adʌk afʌn, ayaadʌk afʌn ado. Awo ake adodo a-akenaaha ewot ke afịd, eyaewot anye kpa ke afịd. Ñkpọ ami ayem ime, ediyọ mme nsọọñọnda eto mme ndisana nditọ Abasi.

Idiọọk unam a-awuọọhọ ke isọñ

¹¹ Ndin ami mmaakịt idiọọk unam mfen naña awuọ ke isọñ. Anye akenie nnʌk iba nte edọñ ado atañ ikọ nte drakọn.

¹² Anye akekama ukara anọ akpa idiọọk unam akenamma ederimbod ye mme andidʌñ ke esịd ekpono akpa idiọọk unam ami, e-ekamba unan iwuod amọ amaakekpa.

¹³ Ndin anye amaanañña mme ikpọ utịbe idiọọñọ, tutu asịm adinam ikañ asọiyọ ato abio ubọọñ Abasi adi isọñ ke iso afịd mme awo.

¹⁴ Ato ke ntak mme idiọọñọ ami a-anye akenaññake ke iwuod akpa idiọọk unam, anye amaabiaaña mme andidʌñ ke ederimbod. Anye amaanyịk ammọ ate ebot ubobod ñkpọ ke mbiod mme ke ukpono akpa idiọọk unam emaekenọ unan ke akañkañ ado anye asʌk adodu uwem.

¹⁵ Emaenyʌñ enọ anye adudu edinọ mbiod akpa idiọọk unam inweek uwem ma anye akan atañ ikọ anyʌñ anam ewood afịd mbon se mmiinyịmmeke adikpono mbiod ado.

¹⁶ Anye amaanyʌñ anyịk afịd awo, ntək mme ikpo, mme anie ñkpọ ye mme uweene, mme amanaisọñ ye mme ifʌn, edibọ idiọọñọ ke ubọk udom me ke akpọiso,

¹⁷ mbaak awo ndomokeed adikan adep me anyam ñkpọ ibọọhọke anye anie idiọọñọ a-adooho anyịñ idiọọk unam mme ibad anyịñ amọ.

¹⁸ Ñkpọ ami ayem ataifiọk. Awo ake adodo a-anieeghe ikike, yak anye abat nọmba idiọọk unam ado, sia ado nọmba awo. Nọmba amọ ado itiokeed itiokeed itiokeed (666).