Adiyaara 10 - Ñwed Abasi Ke Ikọ Ibibio Ayo Mfịn

Enyere mme etək-etək ikpañwed

¹ Ndin mmaakịd ekamba enyere mfen naña ato abio ubọọñ Abasi asọiyọ adi. Anye akesịne ntọñanyọñ nte afọñidem, me adʌkabasi ke anyọñ iwuod amọ; iso amọ akebit utịn, ndin mme ukod ammọ ekebiod mme abai ikañ.

² Anye amaakama etək ikpañwed a-akekʌppọke ana ke ubọk amọ. Anye amaawụụk ukod udom ke inyañ, ukod ufien amọ ke abod.

³ Anye amaasio ekamba uyo nte ekpe akuun. Ke anye amaakebọñ ñkpo, mme uyo mme aduma itiaba emaetañ ikọ.

⁴ Ke mme aduma itiaba ado emaeketañ ikọ, mmaayem ediwet se ammọ eketañ, ado mmaakop uyo a-aketooho ke abio ubọọñ Abasi naña abo, “Kʌp, fik nịm, mme ikọ se mme aduma itiaba ado etañ, kuuwewet unịm.”

⁵ Ndin enyere a-ami ñkekịtte naña ada ke inyañ mme ke abod adịppe ubọk udom ammọ ke abio ubọọñ Abasi.

⁶ Ndin anye amaanwọñọ ke anyịñ andidu uwem ke nsi-nsi nsi-nsi, andikibot mme anyọñ mme afịd se idọñọ ke esịd amọ, ederimbod ye afịd se idọñọ ke esịd amọ, mme inyañ ye afịd se idọñọ ke esịd amọ, anyʌñ abo, “Ubiad ini idiibaaha aba.

⁷ Ado ke mme usen ayọhọ enyere itiaba adiifịt adukpʌñ amọ, eyaenam afịd-afịd mme ndedịbe ñkpọ Abasi ema, kpa nte anye amaaketatañ anọ mme isʌñutom ye mme brọfed amọ.”

⁸ Ndin uyo ammaakekokop naña ato abio ubọọñ Abasi atañ ikọ ini keed mfen mme ami ate: “Ka, ben ikpañwed ado a-akʌppọke ana ke ubọk enyere a-adaaha ke inyañ mme ke abod.”

⁹ Ndin ami mmaaka ñkebịp enyere ado mbo annọ etək ikpañwed ado, anye amambo miin, “Bọ mi nyʌñ ta. Ayaanam ekpa idịp mfo akpakpaiya, ado ayaunem nte adan akwọọk ke inua.”

¹⁰ Ami mmaasio etək ikpañwed ado ke ubọk enyere ado nta. Anye amaanem nte adan akwọọk ke inua, ado ke mmaaketa mma, idịp mmi amaakappa akpakpaiya.

¹¹ Ndin emaembo ete, “Ana afo amaana atañ brọfesi abaña uwak uduod awo, mme idịd, mme usem ye mme ndidem.”