2 Kọrint 9 - Ñwed Abasi Ke Ikọ Ibibio Ayo Mfịn

¹ Ufọn ibaaha ami adiwet inọ ndufo mbaña utom mfọn e-enamma enọ mme ndisana ikọd Abasi.

² Sia mmediọọñọ nte ke ndufo emenie udọñ adinwam, mmenyʌñ idat ndufo nduaak inua nnọ mbon Masidonia mbo ke tọọñọ isua ako ndufo ke Akaya emaebeeñe idem edinọ enọ; ndin eti udọñ ndufo amaademme udọñ uwak ammọ.

³ Ado mmedọñ mme nditọete adiwọt ke nduaak inua a-ñnyịn inamma ke ñkpọ ami idiwuọọhọ ikpuikpu, ado nọ ndufo ebeeñe idem naña ñkidọkkọ.

⁴ Mbaak ndusʌk mbon Masidonia ekpesaña ye ami edi, edikịt naña ndufo, miikibeeñeke idem. Ñnyịn, ntaññatañ ndufo, ikpaikop abuud akeene inua se ñnyịn ikiduaak.

⁵ Ntom ke ami ñkekere mbo ke afọn adikpeiye nditọete ubọk mbo yak ammọ embemiso edi ukañ ndufo, edibem iso ekweeñe ndutʌm enọ ntadubọk a-ndufo emaekenwọñọ adinọ. Ndin ayaado se enọ anye nte enọ ntadubọk, idooho anye e-enọọhọ ke afaad.

Esọọñọ enọ ntadubọk

⁶ Toiyo ami: Awo a-atọọhọ ke afaad adidọk ke afaad; awo a-atọọhọ ke ntadubọk, uwak-uwak ke anye adidọk.

⁷ Awo keed-e-keed akpena anọ naña anye akeduak ke esịd amọ, ke anọ mmeeñe-mmeeñe, me ke unyenyịk; sia Abasi amama awo a-anọọhọ ke inemesịd.

⁸ Ndin Abasi akeme inam afịd ufọn ikeene ndufo uwak-uwak, nọ ato ke afịd ñkpọ ke afịd ini ndufo enieeghe afịd se eyem. Ndufo eyaeyọhọ ke afịd nti utom.

⁹ Kpa naña ewet: “Ammọ etat ubọk enọ mme uwueene ñkpọ; adinenido ammọ aba ke nsi-nsi.”

¹⁰ Idahami, anye a-anọọhọ atọ inwañ ñkpasi atọ, a-anyʌññọ anọ uyo ata ayainọ ndufo ñkpasi etọ, ayaanyʌñ anam atọt, anyʌñ anam mfịd edinenido ndufo awak akan.

¹¹ Eyaenam ndufo enie ñkpọ ke afịd usʌñ nọ ndufo ekeme inọ ke ntadubọk ke afịd ini, ndin ato ke ñnyịn, enọ ntadubọk ndufo adat ekọọm asọk Abasi.

¹² Sia unam ñkpọ ami itreke ke adinọ ikọd Abasi se ammọ enana, ado adat uwak ekọm anọ Abasi.

¹³ Ke ntak utom mfọn a-ndufo edoññoke uwọdñkpọ, mme awo eyaetooro Abasi ke ñkopitem a-asañake ye nsuukiwuod e-enọọhọ eti etob Krais, a-ndufo ekenyịmmeke, enyʌññọ etat ubọk unọ enọ esọk ammọ ye afịd awo.

¹⁴ Ammọ ke idem ammọ ñko ebọñ akam inọ ndufo enyʌñ enie udọñ adisoobo ye ndufo ke ntak ekamba mfọn Abasi a-abaaha ye ndufo.

¹⁵ Ekọọm anie Abasi ke enọ Amọ a-awo miikanna ibʌk.