2 Kọrint 8 - Ñwed Abasi Ke Ikọ Ibibio Ayo Mfịn

Enọ e-ebọọhọ enọ ikọd Abasi

¹ Nditọete mmi, ñnyịn iyem ndufo ediọọñọ ebaña mfọn a-Abasi akenọọhọ ke mme ufọkabasi ke Masidonia.

² Akpesʌk ado ammọ ekebaaha ke ata akpọsọñ idomo ukuud, akwa idadesịd ye akwa unana ammọ amaawuọ awọd idem ke mfọọn ubọk enọ ammọ.

³ Sia ndo ntiense ke ammọ emaenọ ñkpọ naña ammọ ekekan, tutu enọ eboiyo naña ukeme ammọ ado. Ke unyịmme ammọ,

⁴ ammọ ibeeñe ñnyịn, ete yak ñnyịn inọ mmimọ mfọn adikeene nnie udeme ke adikama mme nsaña ikọd Abasi.

⁵ Ammọ ikinamma naña ñnyịn ikidot anyen; ado ammọ ekebem iso eyaak idem enọ Abọọñ, enyʌñ eyaak idem esịn ñnyịn ke ubọk naña Abasi ama.

⁶ Ke ntodo ke inọ Taitọs uyo ibo, sia anye amaaketọọñọ utom mfọn ami, anye akpekap anam ama ke ufọọd ndufo.

⁷ Ado naña ndufo eboiyo iso ke afịd ñkpọ, ke mbuọdidem, ke utañ ikọ, ke ifiọk, ke unam ñkpọ ke afịd esịd, ye ima a-ndufo imaaha ñnyịn, eboiyo iso ñko ke utom mfọn adinọ enọ.

⁸ Mbooho ke nnịm nte ewʌhọ, ado nda udọñ esịd mbon mfen nte edidomo nse uwọt ñkpọ naña ima ndufo ado akpanikọ.

⁹ Sia ndufo emediọọñọ mfọn Abọọñ ñnyịn Yisọs Krais, ke akpesʌk ado anye akedooho imọ, ado ato ke ntak ndufo anye amaakappa ado uwueene nọ ato ke uwueene amọ ndufo ekappa edo mme imọ.

¹⁰ Ami ado item se ifọn ye ndufo ikan ke ñkpọ ami: Isua ako, ndufo ekedo akpa, idooho ke edinọ ikpọñ, ado ke adinie udọñ adinam ntodo ñko.

¹¹ Idahami ikweeñe utom ado ima; ma ado kpa naña ndufo ekenyịmme ke ayọhọ esịd adinam, ekan enam ema, akeene ukeme ndufo.

¹² Sia adieke unyịmme esịd abaaha, enọ a-anem Abasi esịd, akeene se awo anie, idooho se anye mmiinieeghe.

¹³ Se ntañ iwuọhọ ebiommo mbon mfen mbiomo, eben ifiik ndufo; ado awuọ ate enam ukem-ukem.

¹⁴ Ke idahami, uwak ake ndufo ayaanọ se ammọ eyem; ma uwak ake ammọ anyʌñ anọ se ndufo eyem. Ndin ke akpatre ndukemme aba, utʌk idiibaaha,

¹⁵ kpa naña ewet ebo, “Andiwoppo uwak-uwak inieeghe nọ awak abọhọ, andiwoppo etək-etək inyʌññọ inanana.”

Enọ Taitọs aka akabọ enọ

¹⁶ Ado ekọọm anie Abasi, a-sịnne ke esịd Taitọs ukem akikere ibaña ndufo naña ami nnie.

¹⁷ Sia Taitọs amaakop ñkpeubọk ñnyịn, ndin anyʌñ asʌk anyịmme ke udọñ esịd amọ adidi ukañ ndufo ye ata inemesịd.

¹⁸ Ñko isʌk inọ ayịnete a-afịd mme ufọkabasi etooroke ke utom amọ ke abaña eti etob asaña ye anye adi.

¹⁹ Inyʌññọ itreke ado, ado mme ufọkabasi ekenyʌñ emek anye ebo ado nsaña ñnyịn ke utom mfọn a-ñnyịn inamma, adinọ Abasi ke idem Amọ ubọọñ nnyʌñ ñwọt udọñ ñnyịn adinwam.

²⁰ Itọọtʌm ikpeme, mbaak awo adinie se atañ idian ñnyịn ibaña ekamba enọ ami.

²¹ Sia ana isuuk anyen ikere se idot, ke iso Abọọñ ye ke iso awo ñko.

²² Ñko iminyʌñ idian ayịnete ñnyịn ñnwen a-ñnyịn ikidomokedomo ke umiañ ini idiọọñọ ke anye asịn inweek eti-eti ke utom ami, ndin idahami anyʌñ adọọdiọñ asịn esịd ke utom ami akpan-akpan sia anye anie mbuọdidem ke ukeme ndufo.

²³ Amaado Taitọs, anye ado awo ñwuana utom ye ami, anye asaña ye ami anam ñkpọ inọ ndufo; kebaña nditọete mbon ñko, ammọ edoñño mme isʌñutom ufọkabasi, ammọ edoñño ubọọñ enọ Krais.

²⁴ Enam ñkpọ ke iso afịd mme ufọkabasi ewọt ammọ ima ndufo ye ntak i-idatta ndufo inam inua.