2 Kọrint 7 - Ñwed Abasi Ke Ikọ Ibibio Ayo Mfịn

¹ Sia ñnyịn iminie mme enwọñọ ami, nditọete, yak ñnyịn iyet se ideghe abʌkidem ye sịbidịd ifep ke idem ñnyịn, inam adisana ido ñnyịn afọn ama ke adibaak Abasi.

Idaara Bọọd kebaña adikappa esịd ufọkabasi

² Nam ufañ aba ke esịd ndufo inọ ñnyịn. Ñnyịn idueeghe ba awo keed, inyʌññọ ibiat awo ndomokeed, inyʌññọ itʌk awo ndomokeed.

³ Ntañña ami adibiad ndufo, sia mmaatoto ntañ ke ndufo emenie itie ke esịd ñnyịn, ke ñnyịn idodu uwem, idu ye ndufo, inyʌñ ikpaghañkpa, ikpa ye ndufo.

⁴ Isọñesịd a-ami nnieeghe ke idem ndufo akpon, mbuuro a-mbuuroko ibaña ndufo anyʌñ akpon, nyọhọ ye idọñesịd nnyʌñ nnie ayọhọ idadesịd ke afịd ukuud mmi.

⁵ Sia ke ini ikisịmme Masidonia, ñnyịn ikinieeghe nduọkadudu ke abʌkidem, emaefịna ñnyịn ke afịd-afịd ñkañ, anwan ke esion, ndịk ke esịd ufọk.

⁶ Ke afịd ami, Abasi a-adọññọ mbon ukuud esịd amaidọñ ñnyịn esịd ke ini Taitọs adiighe,

⁷ adidi amọ ikpọọñ, adat idọñesịd a-anye akebọọhọ ke ubọk ndufo isọk ñnyịn ñko. Anye ama idọkkọ ñnyịn abaña udọñ ndufo enieeghe ennọ miin, ye akpọsọñ mfʌghọ ndufo, naña ndufo enekke ekere embaña miin. Ado amaanam idadesịd mmi atọtʌm akpon akan naña akedo.

⁸ Adieke aketooho ke deta mmi ndufo efʌghọ, kpa ye ado, ntuaaha ñkpọfiọk. Ado ñketua ñkpọfiọk ke naña mmaakekịt ke deta ado amaanam ndufo efʌghọ, ke etək ibio-ibio ini.

⁹ Ado idahami, mmedat esịd, idooho sia mmainam ndufo efʌghọ, ado sia mfʌghọ ndufo amaanam nọ ekappa esịd. Sia ndufo efʌghọ nte akemme ye uduak Abasi, mbaak ba ñkpọ ndomokeed adinam ndufo ato ñnyịn.

¹⁰ Sia mfʌghọ ke ido Abasi anam awo akappa esịd a-adatta adinyaaña anọ awo, inyʌññọ isaña ye utua ñkpọfiọk, ado mfʌghọ ederimbod adat ñkpa adi.

¹¹ Sese mfʌghọ a-atooho Abasi adat adi ke idem ndufo: ke adinie esịd akpanikọ, ke adibeeñe idem adikañ idem ndufo, ke iyadesịd, ke adikop ndịk, ke adinie udọñ, ke adikere se ikpido mfịna, ke adikịt ke enam unen. Ke afịd-afịd usʌñ ndufo emewọt idem nte mbon e-esanake ke ñkpọ ami.

¹² Ke ntodo, se ñkewet inọ, ñkewette ke abaña anam ndudue, ñkenyʌññọ ñwet ke ntak awo ekedueeghe; ado ñkewet mbo ayaara inọ ndufo ke iso Abasi naña ndufo enekke ekere ebaña ñnyịn.

¹³ Afịd ami ado se inọ ñnyịn idọñesịd. Ndin ke ufọọd idọñesịd ake ñnyịn, ndat esịd mbọhọ mbaña idadesịd Taitọs, sia afịd ndufo emenam sịbidịd amaana ademme enye ke idem.

¹⁴ Sia adieke ñkebuuroke mbuuro nnọ anye ibaña ndufo ke usʌñ ake adodo, ndiaaha abuud, ado naña afịd se ikitañ ye ndufo adooho akpanikọ, kpa ntodo ñko, afịd mbuuro a-mbuuroke nnọ Taitọs mbaña ndufo awuọ ado akpanikọ.

¹⁵ Ndin anye adọọdiọñ ima ndufo ke esịd amọ ke ini anye atoiyoke naña afịd ndufo ekoppo uyo amọ, enyʌññọ edat anye ke ndịk ye ñnyekidem.

¹⁶ Mmedaara sia mmenie ayọhọ mbuọdidem ke idem ndufo.