2 Kọrint 6 - Ñwed Abasi Ke Ikọ Ibibio Ayo Mfịn

¹ Nte mbon i-inamma utom keed inọọ Abasi, ñnyịn ikpe ndufo ubọk ite, ikiiyak mfọn Abasi a-ndufo ebọọhọ awuọ utak-utak;

² sia anye abo ntom ate, “Mmauyie fiin ke ini mfọnido mmi. Mmaanyʌñ unyaaña fiin ke usen adinyaaña.” Sese, ini mfọn Abasi ado ami; sese usen adinyaaña ado ami.

Nsọñọñkpọ Bọọd

³ Ñnyịn inịmme ubiọñọ baaba keed ke usʌñ ndufo, mbaak awo aditañ ñkpọ abiat utom a-ñnyịn inamma.

⁴ Ado ke akpaimọ usʌñ imiwọt ndufo ke ido ata mme asañautom Abasi: ke akwa ume ime, ke ini ntịme, ke ukuud ye ke mbaba,

⁵ ke ntiim, ke ñkpakọb, ke itie afai, ke akpọsọñ utom, ke utaba idap, ke ukpa abiọñ,

⁶ ke adisana ido, ke ifiọk, ke anyan ime, ke mfọnido; ke Adisana Sịbidịd ye ke ata ima,

⁷ ke ikọ akpanikọ, ke adudu Abasi; ye ñkpọekọñ adinenido ke ubọk udom ye ufiin,

⁸ ke ini ukpono ye ke ini esuenne, ke idiọọk etop ye ke eti etob; ibat ñnyịn nte mbon abiaaña, ado ñnyịn ido mbon akpanikọ;

⁹ ibat ñnyịn ke mbon awo miidiọọñọke, ado afịd awo idiọọñọ ñnyịn; nte mme akpañkpa, ke ini ibaaha ke uwem, nte mbon e-emiaaha ado iwottowot;

¹⁰ edat ñnyịn nte mbon mfʌghọ, ado iba ke idadesịd afịd-afịd ini; nte uwueene ado inam uwak awo enie inie; nte mme anana ñkpọ ke ini inieeghe afịd ñkpọ.

¹¹ O mbon Kọrint, ñnyịn imineme nneme inwañ-inwañ ye ndufo, inie ñnwaña-ñnwaña esịd ye ndufo.

¹² Ñnyịn imitat esịd ima ndufo ado ndufo itatta esịd ndufo ima ñnyịn.

¹³ Inọ ñnyịn usieene akemme se ikinọ ndufo, ntañ ami nte ñtañ nnọ nditọ mmi. Inie nwaña-nwaña esịd ye ñnyịn.

Ndʌdutọñ ke abaña ukpono ndem

¹⁴ Ikiidian idem ndufo ye mbon a-ammiinịmme ke akpanikọ. Nso-o ewana ke adinenido anie ye ukwañ ido? Me nso-o ewana ke unwana anie ye akịm?

¹⁵ Nso-o ndʌk ke Krais anie ye Bediad? Nso-o udeme ke andinịm ke akpanikọ anie ye awo a-ammiinịmme ke akpanikọ?

¹⁶ Nso-o edioomo ke tembịd Abasi anie ye ndem? Sia ñnyịn ido tembịd Abasi uwem. Kpa naña Abasi abo ate: “Ñyaadʌñ ye ammọ ñyaanyʌñ nsaña ke atu ammọ, ndin ñyaado Abasi ammọ, ammọ eyaenyʌñ edo ikọd mmi.”

¹⁷ Ke ntodo, “Iwuọọñọ ke atu afịd ammọ inyʌñ iba ke idem ndufo isio-isio, Abasi atañ. Ikiinyʌñ ituuk ñkpọ ndek ba keed; ndin ñyaidaara ndufo.”

¹⁸ Ñko, “Ñyaado Ete ndufo ndin ndufo eyaedo nditọ ideen ye nditọ ibaan mmi, ntom ke Abọọñ Andikpon Ñkan abo.”