2 Kọrint 5 - Ñwed Abasi Ke Ikọ Ibibio Ayo Mfịn

Adibed ufa ikpọkidem

¹ Sia ñnyịn imidiọọñọ ite adieke atayad a-ñnyịn idʌññọ ke isọñ awuudoke, iminie nsi-nsi ufọk ke abio Abasi inọọhọ, a-awo miidatta ubọk ibọp.

² Sia ke ini inaaha ke atayad ami, isʌk ikuun iyem adidʌk nsịne ke itie idʌñ ake Abasi,

³ sia imaisịne afọñ, awo idikịtte ñnyịn ifed.

⁴ Ke akpanikọ ñnyịn inaaha ke atayad ami iba ke ñkuun sia ifeefịghe ñnyịn ke esịd; ami iwuọhọ ite yak efuọrọ ñnyịn ikpọkidem eduọọk, ado iyem esịn ñnyịn ñkpọ itie idʌñ ñnyịn ke hefịn, nọ atodo uwem aben ikpọkidem amen.

⁵ Ado andikibeeñe ñnyịn nnịm nnọ ñkpọ ami ado Abasi, a-akenọọhọ ñnyịn Sịbidịd nte ubiọñ anọ se idiidi ke ini iso.

⁶ Ke ntom, ñnyịn ikookop isọñesịd afịd ini, inyʌñ idiọọñọ ibo, adaña ini ñnyịn ibaaha ke ikpọkidem, ñnyịn ibaaha ye Abọọñ;

⁷ Sia isaña ke mbuọdidem idu uwem, isañake ke ñkịd ke anyen.

⁸ Ñko ñnyịn imitʌm inịm ke akpanikọ, ami mbo, ikpainyʌñ ima adikpọñ ikpọkidem ami ñkeba ke ufọk ye Abọọñ

⁹ Ami anyʌñ asịn ñnyịn inwana, me iba ke ufọk ke ikpọkidem, me imikpọñ anye, adinem anye esịd.

¹⁰ Sia afịd ñnyịn inie adiwuọ nda ke iso itie ikpe Krais; ma awo keed-e-keed abọ utịp a-akemme ye se anye akenam ke ikpọkidem, ke ñkpọ ado adooho eti, me anyʌññọ ado idiọọk.

Utom unam emem

¹¹ Sia ñnyịn imidiọọñọ se ado adibaak Abọọñ, ñnyịn imidomo adikpe ye awo. Se ñnyịn ido ana inwañ-inwañ ke iso Abasi, iminyʌñ inie idodanyen ite iñwaña ndufo ke esịd akikere ndufo ñko.

¹² Ñnyịn itọọñọke ntak itooro idem inọ ndufo, ado itañ maeinọ ndufo ntak adidat ñnyịn ibuuro mbuuro, ma ndufo enie se ebọọrọ ammọ e-ebụụroke se ekịt ke anyen, idooho se isịne ke esịd.

¹³ Sia adieke iwuod iboiyoke ñnyịn, naña usʌk awo ebo, awuọ ado anọ Abasi, anyʌñ ado ñnyịn inie eti iwuod, ado afọn ye ndufo.

¹⁴ Sia ima Krais inoonək ñnyịn; sia iminịm ke awo keed akekpa anọ afịd awo, ke ntodo afịd awo emaekpañña.

¹⁵ Ndin anye akenyʌñ akpa anọ afịd awo mbaak mbon e-ebaaha ke uwem ekụụdu uwem aba enọ idem ammọ, ado edu uwem enọ anye akekpaaha anọ ammọ, anyʌññọ aset.

¹⁶ Ke ntodo, tọọñọ ke ami ñnyịn iseeghe awo ke anyen abʌkidem, Akpesʌk ado ikidatta Krais ke anyen abʌkidem, ñnyịn idatta anye aba ke utọ usʌñ ado.

¹⁷ Ke ntodo, adieke awo abaaha ke Krais, emaebot anye adufa, ñkaan ñkpọ emaeboiyo efep; sese eyekappa edo ndufa.

¹⁸ Ado afịd ñkpọ ato Abasi, a-akenamma ñnyịn itie ke emem ye anye ke Krais, a-akenyʌññọ inọ ñnyịn utom, abo ñnyịn inam awo aba ke emem ye anye:

¹⁹ abo ke Krais, Abasi asʌk anam ederimbod aba ke emem ye anye, inyʌññọ ibat ndudue mme awo inọ ammọ, ado amaaben ikọ adikappa mba ke emem ye anye inọ ñnyịn ate ikwọrọ.

²⁰ Ntom ke ñnyịn ido mme isʌñutom Krais nte ñkpọ a-Abasi adatta ñnyịn akpe ndufo ubọk. Ñnyịn imikpeiye ndufo ke iwuod Krais: Ibono ke emem ye Abasi.

²¹ Abasi akenam anye a-miikinieeghe idiọọkñkpọ akappa ado idiọọkñkpọ ke ntak ñnyịn; mbaak ato do ñnyịn ke anye ikappa ido edinenido Abasi.