2 Kọrint 4 - Ñwed Abasi Ke Ikọ Ibibio Ayo Mfịn

Mmemidem idahami ye uwem adised

¹ Sia adooho ke mbọm Abasi, ñnyịn iminie utom ami adinam, esịd iduọọhọ ñnyịn.

² Utu ke ndo, ñnyịn imisịn mme ndedịbe-ndedịbe ido e-ekamake abuud; isañake ke ñkara, inyʌññọ idat nsu idian ye ikọ Abasi. Ado ke adiwọt se ido akpanikọ anwa-anwa ke inam afịd awo ediọọñọ ke esịd ammọ, ke ñnyịn inaanam se inen ke iso Abasi.

³ Ado eti mbʌk ñnyịn akpedịbe awo ke anyen, adịbe mbon e-etakkatak.

⁴ Abasi ayo ami amaanam ekike mbon e-emmiinịmme ke akpanikọ akịm, mbaak unwana eti etob ubọọñ Krais, a-adooho mbiod Abasi, adiyamma anọ ammọ.

⁵ Sia idooho idem ñnyịn ke ñnyịn ikwọrọ, ado Yisọs Krais, ite, anye ado Abọọñ, ite ido nditọufọk ndufo ke ntak Yisọs.

⁶ Sia Abasi akenọọhọ uyo ate, “Yak unwana ayama ke akịm,” amaanam unwana amọ ayama ke esịd ñnyịn ma anye anwaña awo anyen adidiọọñọ ubọọñ Abasi ke iso Yisọs Krais.

⁷ Ado ñnyịn ikama nsọñudua ñkpọ ami ke abañ mbad adiwọt nte ke andikpon ñkan adudu ami ato Abasi, itooho ñnyịn.

⁸ Enekke ifiik ñnyịn ke afịd usʌñ, ado awo ikọkọkọk; ifịna ñnyịn, ado ñnyịn iduọọhọ idodanyen;

⁹ ikọbọ ñnyịn, ado Abasi ikpọññọ ñnyịn; imia ñnyịn eduọọk ke isọñ, ado idatta uwem ñnyịn.

¹⁰ Afịd ini isʌk ikama ñkpa Yisọs ke ikpọkidem ñnyịn isaña, ma uwem Yisọs awuọ awọd idem ke ikpọkidem ñnyịn.

¹¹ Sia afịd ini esʌk edaadat ñnyịn ye uwem eyaak enọ ñkpa kebaña Yisọs, ma uwem Yisọs awuọ awọt idem ke abʌkidem ñnyịn adooho ayaakpa.

¹² Ntom ndin ke ñkpa asʌk anam utom ke idem ñnyịn, ado uwem asʌk anam utom ke idem ndufo.

¹³ Ado sia ñnyịn inieeghe sịbidịd mbuọdidem keed ye anye a-awette ate, “Mmaanịm ke akpanikọ mmetañ,” ñnyịn ñko iminịm ke akpanikọ, inyʌñ itañ,

¹⁴ sia ñnyịn imidiọọñọ ke anye a-akenamma Abọọñ Yisọs aset ke ñkpa, ayaanam ñnyịn ñko iset ye Yisọs; ayaanyʌñ idat ñnyịn ye ndufo anịm ke iso Amọ.

¹⁵ Afịd ami ado ke ufọn ndufo, ma mfọn asịmme ata uwak awo anam nọ ekọọm ayọhọ aduọi anọ Abasi ubọọñ.

¹⁶ Ke ntak ntom esịd iduọọhọ ñnyịn; ado akpesʌk ado naña ikpọkidem ñnyịn a-akpaaha, ke esịd-esịd, asʌk akappa ado ufa ke usen ke usen.

¹⁷ Sia nyayakka ukuud ñnyịn abaaha idahado-idahado edọdiọñ enam ñnyịn inie nsi-nsi ubọọñ e-ekponno enyʌñ edoppo ekan afịd ammọ.

¹⁸ Sia ñnyịn miidọññọ anyen, sia se awo akịd ke anyen ikpeeneke, ado se awo mmiikịtte ke anyen ayaakpeene ke nsi-nsi.