2 Kọrint 13 - Ñwed Abasi Ke Ikọ Ibibio Ayo Mfịn

Akpatre ndʌdutọñ

¹ Anye ami ado ayọhọ ñkenta a-ndiighe adise ndufo. “Afịd ikọ anaasọọñọ ada ke inua ntiense awo iba me ita.”

² Mmaabebem iso idʌt ndufo utọñ ke ini ñkebaaha ye ndufo ayọhọ ñkemba. Mmenyʌñ mmaana nnam ntodo idahami a-membaaha ye ndufo: Mmaanyọñ ndi, ndiifeene nnọ mbon emaekenam idiọọk ñkpọ ke ini akeboiyoke ye mbon mfen;

³ sia ndufo eyemme idiọọñọ ke Krais aboiyo anto miin atañ mme ikọ ami. Anye idooho mmem-mmem ke adinam ñkpọ ye ndufo, ado anie adudu ke atu ndufo.

⁴ Sia akpesʌk ado ekekọññọ anye ke krọs ke mmemidem, anye asʌk adodu uwem ke adudu Abasi. Kpa ntodo ñnyịn imimem idem ke anye, ado ke adudu Abasi, ñnyịn iyaidu uwem ye anye ke adinam ñkpọ inọọ ndufo.

⁵ Iduuñọ idem ndufo ise me ndufo eba ke mbuọdidem; itʌm idomo idem ndufo. Nte ndufo idiọọñọke ke Krais Yisọs adọdʌñ ke idem ndufo? Miidooho ntodo, ke akpanikọ, ndufo iboiyoke udomo.

⁶ Ndin mmedot anyen nte ke ndufo eyaediọọñọ ke ñnyịn iwuọhọ ubọk ñkaña.

⁷ Idahami ñnyịn ibọñ akam inọ Abasi mbaak ndufo idinam se idiọọk, idooho ma mme awo ikịt ñnyịn nte nti awo, ado ma ñnyịn inam se inen akpesʌk ado abaaha nte ñnyịn ima idue.

⁸ Ñnyịn ikanna adinam baaba ñkpọ ndomokeed adibiọọñọ akpanikọ, ado ida ke akpanikọ ikpọọñ.

⁹ Ñnyịn idat esịd ke ini imemme ado ndufo emesọñ idem; akam ñnyịn ado yak ndufo ekappa efọn ema.

¹⁰ Ntak ado ami ami ñwette mme ñkpọ ami ke ini ami membaaha ye ndufo; mbaak ke ini ndiidi ndisọñ ido ye ndufo ke ukara mmi, ukara a-Abọọñ akenọọhọ ate ndat nnam ndufo ekọt, idooho adidat isuan ndufo.

Akpatre ekọọm

¹¹ Ke akpatre, nditọete mmi, itie sʌñ. Yak akikere ndufo ado adikappa mfọn mma, ikpañ utọñ ke ebeeñe mmi, inie esịd keed, idʌñ emem-emem. Ndin Abasi ima ye emem ayaaba ye ndufo.

¹² Ikọọm keed aken ye adisana ntʌminua.

¹³ Afịd ikọd Abasi e-enọ ekọm.

¹⁴ Yak mfọn Abọọñ Yisọs Krais, ye ima Abasi ye ewana Adisana Sịbidịd eba ye afịd ndufo.