2 Kọrint 12 - Ñwed Abasi Ke Ikọ Ibibio Ayo Mfịn

Ñkukịd Bọọd ye mfịna amọ

¹ Ana ñka iso nduaak inua. Akpesʌk ado udod ba keed miibaaha, ñnyaaka iso ntañ mme ñkukịd ye mme adiyaara a-atooho Abọọñ.

² Mmediọọñọ awo keed a-akebaaha ke Krais, e-ekebenne edọọk ayọhọ anyọñ ita ke isua duop mme inaañ akeboiyoke. Me akedo ke ikpọkidem me amaakpọñ ikpọkidem, ndiọọñọke, Abasi adiọọñọ.

³ Ndin mmediọọñọ mbo ke awo ami, me ke ikpọkidem, me emaesio ke ikpọkidem, ado Abasi adiọọñọ,

⁴ emaeben anye edʌk ke Baradais. Anye amaakop uwak ñkpọ i-inua miikikanna itañ, mme ñkpọ a-miikiyakka awo atañ.

⁵ Ami ñyaanam inua mbaña awo ntodo, ado ndiinamma inua mbaña idem mmi, ado ñyaanam inua mbaña mmemidem mmi.

⁶ Akpekọm ñkpemek adinam inua ñkpedooho ndisịme, ke ntak a-adooho se ñkpetañ ado akpanikọ. Ado nnamma, mbaak awo adikere ñkpọ a-akponno ambaña miin naña anye akịd se ami nnam ye se ntañ.

⁷ Sia se eyaara ennọ miin akpon eti-eti, ke ntodo, mbaak ndiwọt idem mbọhọ, emaensịn miin ñkukịm ke abʌkidem, enịm isʌñutom Setan adintuai.

⁸ Mmaakpeiye Abasi ñke nta nte yak aben ñkpọ ami añkpọñ.

⁹ Ado anye andọkkọ miin ate, “Mfọn mmi ukem fiin udeme sia enam adudu mmi afọn ama ke mmemidem.” Ke ntodo, ñyaanam inua ñkan naña ñkenanam ke idadesịd mbaña mmemidem mmi, nọ ato do adudu Krais andodo ke idem.

¹⁰ Ke ntak Krais, mmedaara ke mmemidem ye esuenne, ye nsọñọñkpọ ye ukọbọ, ke mfịna, sia ke ini idem am-memme, idahado ke nnekke ñkop nsọọñidem.

Bọọd akere abaña mbon Kọrint

¹¹ Mmekappa ndo ndisịme; ado ndufo ekennək esịn do. Akpena ndufo ekentooro miin, sia ami nsịppesịp ñkan mme “ikpọ ndịk abọsịd,” akpesʌk ado ami mendooho ñkpọ ndomokeed.

¹² Ami mmesọọñọ nda ke adinam ñwọt ndufo idiọọñọ eti abọsịd, ñkọrọ mme idiọọñọ, ñkpọ ñkpaidem ye utịbe ñkpọ.

¹³ Ekesaña die eba ke usuuk itie ekan mme ufọkabasi mfen, sia ami ñkedooho mbiomo inọ ndufo? Edakka do innọ miin ke ndudue ami.

¹⁴ Idahami mmebeeñe idem edidi ndise ndufo ayọhọ ñke nta ndin ñyemme ido mbiomo inọ ndufo; sia se ñyem idooho inie ndufo, ado iyem ndufo idem. Sia ntək nditọ ikpinịmme ñkpọ inọ ete ye eka ammọ, ado mme ete ye eka ekpenịm enọ nditọ.

¹⁵ Ndin ñnyaabiad, ke inemesịd, afịd se nnie ye idem mmi ñko inọ ndufo. Adieke ima ami imaaha ndufo adiọññọdiọñ akpon nte ima a-ndufo emaaha miin adiidọdiọñ isịp?

¹⁶ Daña akpedodo, ñkedooho mbiomo inọ ndufo, ado nte awo ñkara, ñkedat ñkara ikan ndufo ubọk.

¹⁷ Anie nte ñkedat ba awo keed a-ñkedọññọ utom ke ñkañ ndufo ifiik ndufo?

¹⁸ Ami ñkenyịk Taitọs nte adi ukañ ndufo nnyʌñ ndọñ ayịnete awodeen keed nte asaña ye anye. Taitọs ikifiihe ndufo, nte amaifiik? Nte ñnyịn ikinamma ñkpọ ke Sịbidịd keed inyʌñ isaña ke usʌñ keed?

¹⁹ Iba ndufo nte ke afịd se inwana itañ ami ado ñnyịn adinyaaña idem ñnyịn ke iso ndufo? Ñnyịn itie ke iso Abasi itañ mme ikọ ami nte mbon e-ebaaha ke Krais; ndin afịd se inam, mme ndima ufan, ado adisọọñọ ndufo idem.

²⁰ Sia mmenie ndịk nte ke ini ndiidi, ndiidikịtte ndufo naña ñkpeyem ndufo eba, ndufo ñko idiiñkịtte miin naña ekpeyem ami mba. Mmenie ndịk mbaña utọk, ye ufịb ye ifiopesịd, ye ubakka, ye ubiaad anyịñ ye idiọọk ibaaña, ye ñkokkoidem ye mfịna, ke ufọọd ndufo.

²¹ Mmenie ndịk ke mmaatịmme ndi Abasi mmi ayansụụk idem ke iso ndufo, ndin ñyaakop mfʌghọ mbaña uwak awo e-ekenaññake mme ndiọiñkpọ ke ini a-akeboiyoke ado ikappake esịd inyʌññọ itua ñkpọfiọk, ikpọñ mbubiam ido ammọ ye use ye adinam ñkpọ ye unana mfadidem.