2 Kọrint 10 - Ñwed Abasi Ke Ikọ Ibibio Ayo Mfịn

Nsọọnọ-nda Bọọd ke utom ukwọrọ ikọ amọ

¹ Ndat ifuuro-ifuuro ye mmem-mmem ido Krais nnịm ebeeñe ke iso ndufo. Ami Bọọd, a-nsibaaha idek-idek mmaatie iso ye iso ye ndufo, ado ndo nsọñ inua ke ini mmembaaha ye ndufo.

² Mmikpe ndufo ubọk nte mmaadi ke ñkañ ndufo, ke ado se ndisọñ inua ye ndufo, nte naña nduak adisọñ ye ubaak awo e-ebatta ete ke ñnyịn isaña naña abʌkidem ado.

³ Sia akpesʌk ado ñnyịn idʌññọ ke ederimbod emi, ñnyịn inwanake ekọñ naña ederimbod eñwana.

⁴ Sia ñkpọekọñ i-idatta inwana ekọñ, idooho ñkpọekọñ abʌkidem, ado utọ ñkpọ a-akoppo idem ke anyen Abasi, adiwuud mme ñkpọsọñ ufọkekọñ.

⁵ Ñnyịn iwuud akikere esịd awo ye afịd ñkoñ-ñkoñ ñkpọ ebenneke idem ke anyọñ eñwana ye ifiọk Abasi, inyʌñ imʌm afịd akikere ukad, inam ammọ esuuk iwuod enọ Krais.

⁶ Inyʌñ ibeeñe idem adinọ ufen ke afịd nsọñiwuod, ke ndufo emaesuuk iwuod ayọhọ-ayọhọ.

⁷ Ndufo ese ñkpọ anyọñ-anyọñ. Awo keed ake adodo a-adiọọñọke ate ke imọ ido ake Krais, yak anye atọọñọ ntak akekere ami ke esịd amọ ate, naña imọ ido ake Krais, kpa ntodo ke ñnyịn ido.

⁸ Akpesʌk ado ñkenamma inua mbọhọ mbaña adudu a-ñnyịn inieeghe ado Abọọñ akenọ adudu ado adidat nnam ndufo ekọt, idooho edidat nsobo ndufo, buud idiinamma.

⁹ Ado nnam ntodo, mbaak adiba nte ñyem idat mme deta mmi isịn ndufo ndịk.

¹⁰ Sia usʌk ammọ ebo ete, “Deta amọ adoppo anyʌñ anie adudu ado anye ke idem amọ ado ñkaña awo, ikọ inua amọ idooho ñkpọ.”

¹¹ Akpena utọ ibon ado ediọọñọ ebo ke se ñnyịn ido ke mme deta ñnyịn ke ini ñnyịn miibaaha, kpa ado ke ñnyịn idiido ke adinam ñnyịn imaiba ye ndufo.

¹² Ñnyịn inieeghe esịd adidat idem ñnyịn ndomo ye ubaak awo e-etooroke idem ammọ. Ke ini edomoke idem ye idem ammọ, enyʌññọ ekpe ikpe idem ammọ, ammọ inieeghe eti ifiọk.

¹³ Ado ñnyịn idiinamma inua iboiyo adaña, idiinam inua ikeene utom a-Abasi inọọhọ ñnyịn, adooho utom ñnyịn ye ndufo asịne do ñko.

¹⁴ Sia ñnyịn miiboiyoke adaña ke ñwọkinua ñnyịn naña akpedo, adieke ñnyịn miikpikidiighe do, ado ñnyịn imaidisịm do ye eti etob Krais.

¹⁵ Ñnyịn iboiyoke adaña ke ñnyịn adinam inua mbaña utom mbio mfen. Idodanyen ñnyịn ado, nte mbuọdidem ndufo akaaha iso akọt, mme adaña utom ñnyịn ke atu ndufo ayaakaiso atara;

¹⁶ ma ñnyịn ikikwọrọ eti etob ke mme itie mfen. Sia ñnyịn iyemme inam inua ke utom e-emaekenam ke abio mfen.

¹⁷ Ado, “Yak awo a-anamma inua anam ke Abọọñ.”

¹⁸ Sia idooho awo a-atooroke idem ke edat nte eti, ado awo a-Abọọñ atooroke.