1 Yọọn 5 - Ñwed Abasi Ke Ikọ Ibibio Ayo Mfịn

Mbuọdidem ke Ayịn Abasi

¹ Afịd awo se inịm ke Yisọs ado Krais, ado se Abasi abon, awo ake adodo a-amaaha ete ama ayịn amọ ñko.

² Ami ke ñnyịn idat idiọọñọ ke ñnyịn imima nditọ Abasi: ke ñnyịn adima Abasi, nnyʌñ nnịm ibed amọ.

³ Ima Abasi ado ami: edinịm mme ibed amọ. Ndin ibed amọ idooho mbiomo,

⁴ sia, afịd awo se Abasi abon e-ekan ederimbod. Edikan ami ado se ikan ederimbod, mbuọdidem ñnyịn.

⁵ Anie ndin ado awo a-akanna ederimbod? Ibọhọke anye a-anịmme ke Yisọs ado Ayịn Abasi?

⁶ Ami ado anye a-akesañake ke mmọọñ ye iyiib adi, kpa Yisọs Krais. Anye ikisañake ye mmọọñ ikpọọñ idi, akesaña ke mmọọñ ye iyiib. Ndin Sịbidịd ado anditie ntiense, sia Sịbidịd ado akpanikọ.

⁷ Ntiense ita eba:

⁸ ado Sịbidịd, mmọọñ ye iyiib, ndin naña ita ami etañ uyo keed.

⁹ Adieke ñnyịn ibọọhọ ntiense awo, ntiense Abasi akpon akan sia ami ado ikọ ntiense Abasi, a-anye atiehe abaña Ayịn amọ.

¹⁰ Ake awo anịm Ayịn Abasi ke akpanikọ anie ikọ ntiense ami ke esịd amọ. Awo ake mmiinịmme anye ke akpanikọ, anam Abasi ado asʌhọ nsu, sia anye mmiinịmme ikọ ntiense atooho inua Abasi abaña Ayịn amọ ke akpanikọ.

¹¹ Ikọ ntiense ami ado: Abasi inọ ñnyịn nsi-nsi uwem, uwem ami anyʌñ aba ke Ayịn amọ.

¹² Awo anieeghe Ayịn anie uwem; awo a-mmiinieeghe Ayịn Abasi inieeghe uwem.

Akpatre ikọ

¹³ Ñwet ami inọ ndufo e-enịmme Ayịn Abasi ke akpanikọ ma ndufo ediọọñọ ke mmimọ iminie nsi-nsi uwem.

¹⁴ Ami ado nsọọñọidem a-ñnyịn inieeghe edisaña ñkpere Abasi: ke adieke ñnyịn ibeeñeke ñkpọ ake adodo anyʌñ akekem ye uduak amọ, anye a-akop.

¹⁵ Ndin adieke ñnyịn idiọọñọke ke anye a-akop mme ebeeñe ñnyịn, se ibebịp, ñnyịn imidiọọñọ ke ñnyịn imibọ se ikibeeñe.

¹⁶ Adieke awo ndomokeed akịtte ayịnete amọ naña anam idiọọkñkpọ a-ammiisụụhọ ke ñkpa, yak anye abọñ akam abo Abasi anọ anye uwem. Ntañ mbaña idiọọkñkpọ a-ammiisụụhọ ke ñkpa. Idiọọkñkpọ a-asuuhọ ke ñkpa mmọdo aba. Ami mbooho yak ebọñ akam ebaña anye a-asuuhọ ke ñkpa.

¹⁷ Afịd ndudue ado idiọọkñkpọ, ado aba idiọọkñkpọ a-ammiidooho idiọọkñkpọ a-asuuhọ ke ñkpa.

¹⁸ Ñnyịn imidiọọñọ ke awo ake adodo a-Abasi abonno ikemeke adika iso ke idiọọkñkpọ; Ayịn Abasi adooho Ete akebon, ado Andikpeme anye, ndin setan ikemeke adinam anye idiọọkñkpọ.

¹⁹ Ñnyịn imidiọọñọ ke ñnyịn ido nditọ Abasi ñko ke ukeed-ukeed ñkpọ ke iso isọñ asịne ke ukara andidiọọk.

²⁰ Imidiọọñọ ñko ke Ayịn Abasi adi anyʌñ inọ ñnyịn ifiọk naña ñnyịn ikeme edidiọọñọ andido akpanikọ. Ndin, ñnyịn idʌñ ke andido akpanikọ, kpa ke Ayịn amọ Yisọs Krais. Anye ado ñkukwere Abasi akpanikọ ye uwem nsi-nsi.

²¹ Mme ndima nditọ, isioño idem ndufo ikpọñ ndem.