1 Yọọn 4 - Ñwed Abasi Ke Ikọ Ibibio Ayo Mfịn

Adikañ mme ntịppe ñkpọ

¹ Mme ndima ufan, ikiinịm afịd sịbidịd, ado edomo mme sịbidịd se me eto Abasi, sia uwak-uwak brọfed nsu ewuọọñọ edʌk ederimbod.

² Ndufo ediidat ami idiọọñọ Sịbidịd a-atooho Abasi: Afịd-afịd sịbidịd a-anyịmmeke abo ke Yisọs Krais adi ke abʌkidem nte awo ato Abasi,

³ ado afịd sịbidịd a-mmiinyịmmeke ibo ke Yisọs Krais amaadi ke ederimbod nte awo, itooho Abasi. Mme utọ sịbidịd ami edoñño mme andibiọọññọ Krais, a-ndufo imaikikookop ke eyaedi, ndin idaha ami, utọ sịbidịd ami mmọọ aba ke ederimbod.

⁴ Mme ndima nditọ mmi, ndufo eto Abasi ndin ke ntak ami, ndufo emekan ammọ, sia anye abaaha ke idem ndufo akpon akan anye a-abaaha ke ederimbod.

⁵ Ammọ edoñño mbon ederimbod ke ntak ado ammọ etañ ikọ nte mbon ederimbod, ndin ke ntak ado ñko ederimbod ekpañ utọñ enọ ammọ.

⁶ Ñnyịn ido nditọ Abasi, ndin awo a-adiọọñọke Abasi akpañ utọñ inọ ñnyịn; ado awo a-mmiidiọọñọke Abasi ikoppo ikọ ñnyịn. Ami ke ñnyịn idat ami idiọọñọ Sịbidịd akpanikọ ye sịbidịd nsu.

Ima Abasi ye ima ñnyịn

⁷ Mme ndima ufan, yak ñnyịn ima keed aken, sia ima ato Abasi, ndin awo ake adodo a-anieeghe ima ado ayịn Abasi, anye anyʌñ adiọọñọ Abasi.

⁸ Awo ake mmiinieeghe ima idiọọñọke Abasi, sia Abasi ado ima.

⁹ Edat ami eyaara ima a-Abasi anieeghe inọ ñnyịn, ke anye edinọ ikpọọñ Ayịn amọ adi ke isọñ, nọ atoodo ñnyịn inie uwem ito anye.

¹⁰ Daña ima aba adodo, itooho sia ñnyịn immima Abasi; ado sia anye amaima ñnyịn, anyʌñ asio Ayịn amọ adọñ ate adido usio isop ndiọiñkpọ ñnyịn.

¹¹ Ndima mme ufan, sia Abasi imaaha ñnyịn ntom, ana ñnyịn ñko ima emọ-emọ awo.

¹² Awo ndomokeed akenam ikịtte Abasi ke anyen; ado adieke ñnyịn imaaha emọ-emọ awo, Abasi adʌñ ke esịd ñnyịn anyʌñ anam ima Abasi afọn ama ke uwem ñnyịn.

¹³ Ñnyịn idiọọñọ ke ñnyịn imidʌñ ke anye, ke anye ñko adʌñ ke idem ñnyịn, ke anye amaakenam ñnyịn inie udeme ke Sịbidịd amọ.

¹⁴ Ñnyịn imikịt, iminyʌñ ido ntiense ibo ke Ete akedọñ Ayịn amọ ate adi nte Andinyaaña ederimbod.

¹⁵ Awo ake adodo a-anyịmmeke abo ke Yisọs ado Ayịn Abasi, Abasi adʌñ ke idem amọ; anye anyʌñ adʌñ ke Abasi.

¹⁶ Ke ami, ñnyịn imidiọọñọ, inyʌñ inie mbuọdidem ke ima a-Abasi anieeghe inọ ñnyịn. Abasi ado ima, Awo ake adodo adʌññọ ke ima adʌñ ke Abasi, Abasi anyʌñ adʌñ ke anye.

¹⁷ Ke utọ usʌñ ami ke enam ima Abasi afọn ama ke esịd ñnyịn, nọ atodo ñnyịn ikan edinie uko ke usen ikpe, sia ke ederimbod ami ñnyịn ibiod anye.

¹⁸ Ndịk ibaaha ke ima. Ado ata ima abebịn ndịk asio, sia ndịk asaña ye ufen. Awo a-afegheke ndịk inieeghe mfọnmma ke ima.

¹⁹ Ñnyịn ima sia anye amaabem iso ima ñnyịn.

²⁰ Adieke awo ndomokeed abooho, “Mmema Abasi” ado asua ayịnete amọ, anye ado asʌhọ nsu. Sia awo a-mmiimaaha ayịnete amọ a-anye akịtte ke anyen, ikemeke ima Abasi a-anye mmiikịtte.

²¹ Ndin anye inọọ ñnyịn ibed ami: Awo ake adodo a-amaaha Abasi, ana anye ama ayịnete amọ ñko.