1 Yọọn 3 - Ñwed Abasi Ke Ikọ Ibibio Ayo Mfịn

¹ Ise utọ ekamba ima e-Ete imaaha ñnyịn, tutu ikood ñnyịn nditọ Abasi. Ndin kpa ado ke ñnyịn ido. Ederimbod idiọọñọke ñnyịn nte nditọ Abasi sia ammọ mikidiọọñọke anye.

² Ndima mme ufan, ñnyịn ido nditọ Abasi; ado Abasi iyaarake dion inọ ñnyịn se ñnyịn idiido. Se ñnyịn idiọọñọ ado ke Krais amaadi, ñnyịn iyaitie nte anye; iyainyʌñ ikịt naña anye aba.

³ Afịd awo se inie utọ idodanyen ami, e-enam idem ammọ asana, ukem-ukem naña anye ado Adisana.

⁴ Awo a-anamma idiọọk ñkpọ abiad ibed, ke akpanikọ, sia idiọọkñkpọ ado edibiad ibed.

⁵ Ado ndufo emediọọñọ ke akedi ma anye adiben mme ndiọiñkpọ ñnyịn afep. Ñko, idiọọk ñkpọ ndomokeed ibaaha anye ke idem.

⁶ Awo a-adʌññọ ke anye ikaaha iso inam idiọọk ñkpọ. Awo ake adodo a-akaaha iso anam idiọọkñkpọ ikịtte anye; inyʌññọ idiọọñọ anye.

⁷ Ndima nditọ ikiiyak awo itịn ndufo usʌñ. Awo a-anamma etiñkpọ ado adinen, ukem-ukem naña anye ado edinen.

⁸ Awo a-anamma idiọọk ado ke setan, sia setan ado anam idiọọk tọọñọ ke editọọñọ. Ayịn Abasi akedi ma adibiad ubọkutom setan.

⁹ Awo a-Abasi abonno idiikaaha iso inam idiọọk ñkpọ, sia ñkpasi Abasi mmọdo adʌñ anye ke idem; anye inyʌññọ ikan ikaiso inam idiọọkñkpọ, sia ato ke Abasi, anye a-amana ufa.

¹⁰ Ami ado usʌñ naña ñnyịn idiọọñọ mme andido nditọ Abasi ye nditọ setan. Awo a-mmiinamma se ifọn idooho ayịn Abasi; awo ammiinyʌññọ ima ayịnete amọ, idooho ake Abasi.

Uwak ke abaña ima ye usua

¹¹ Sia ami ado etop a-ndufo ekebọọhọ tọọñọ ke editọọñọ: Akpena ñnyịn ima emọ-emọ.

¹² Ekụụba nte Keen a-akedooho ake setan, ndin awot ayịneka amọ. Nso ikido ntak a-anye akewotto ayịneka? Sia mme ñkpọ se anye akenam ekedo ndiọi, ake ayịneka ekedo nnen-nnen.

¹³ Ekiiyak idem ikpa ndufo, nditọete, adieke ederimbod isuaaha ndufo.

¹⁴ Ñnyịn imidiọọñọ ibo ke imiwuọọñọ ke ñkpa, idʌk ke uwem, sia ñnyịn imima nditọete ñnyịn. Awo ake mmiinieeghe ima asʌk aka iso asịne ke ñkpa.

¹⁵ Awo ake adodo a-asuaaha ayịnete amọ ado awot awo. Ndin ndufo emediọọñọ ke awot awo ndomokeed inieeghe nsi-nsi uwem ke esịd amọ.

¹⁶ Ñnyịn idat ami idiọọñọ ima Abasi: Yisọs Krais amaayaak uwem amọ anọ ke ntak ñnyịn. Ñnyịn ñko, akpena iyaak uwem ñnyịn inọ ke ntak nditọete ñnyịn.

¹⁷ Adieke awo anieeghe inie ndin akịd ayịnete amọ abaaha ke unana, ado ituaaha anye mbọm, ima Abasi anam die aba ke uwem awo ado?

¹⁸ Nditọ mmi, yak awo akuuma uma ikpọk inua, yak ikap iwọt ima ke adinam ñnyịn ye ke akpanikọ.

¹⁹ Ntom ke ñnyịn idiọọñọ ke ñnyịn ida ke akpanikọ, ye naña ñnyịn idiinie emem ke iso amọ

²⁰ ini ake adodo esịd ñnyịn ibioomo ñnyịn ikpe. Sia Abasi akpon akan akikere esịd ñnyịn, anyʌñ adiọọñọ afịd ñkpọ.

²¹ Mme ndima ufan, adieke esịd ñnyịn miibioomo ñnyịn ikpe, ñnyịn iminie nsọọñọnda ke iso Abasi

²² inyʌñ ibọ ñkpọ ake adodo a-ñnyịn ibeeñeke anye, sia ñnyịn iminịm mme ibed amọ, inyʌñ inam ñkpọ se inem anye esịd.

²³ Ami ado ibed amọ: edinịm ke anyịñ Ayịn amọ, Yisọs Krais, inyʌñ ima keed aken naña ewʌhọ amọ akitemme ñnyịn.

²⁴ Mbon e-enịmme ewʌhọ Abasi edʌñ ke anye, anye anyʌñ adʌñ ke esịd ñnyịn, ato ke Sịbidịd a-anye akinọọhọ ñnyịn.