1 Yọọn 2 - Ñwed Abasi Ke Ikọ Ibibio Ayo Mfịn

¹ Ndima nditọ mmi, ñwet ñkpọ ami inọ ndufo mbaak ndufo idinam idiọọkñkpọ. Ado, adieke awo ake adodo anamma idiọọkñkpọ, ñnyịn iminie akpeemem ke ufọọd ñnyịn ye Ete, Yisọs Krais a-adooho Andinen.

² Anye ado uwa usio isop mme ndiọiñkpọ ñnyịn, ndin idooho ake ñnyịn ikpọọñ; ado ake afịd awo ke ederimbod.

Ima ye usua ke ufọọd mme andinịm ke akpanikọ

³ Ñnyịn inie ifiọk ke imidiọọñọ Krais adieke ñnyịn inịmme mme ibed amọ.

⁴ Awo ake adodo abooho, “Ami mmediọọñọ anye,” ado inamma se anye abo enam, ado asʌhọ nsu; ndin akpanikọ ibaaha ke idem amọ.

⁵ Ado adieke awo anịmme ikọ amọ ke akpanikọ, ima Abasi afọn ama ke idem amọ. Ndin ami ado usʌñ a-ñnyịn idiọọñọke ke iminie nsọọñọnda ye anye.

⁶ Awo ake adodo adʌññọ ke anye ana adu uwem ukem-ukem nte Yisọs akedu.

⁷ Mme ndima ufan, idooho ufa ibed ke ñwet inọ ndufo, ado kpa akaan ibed a-ndufo emadiọdiọọñọ tọọñọ ke editọọñọ.

⁸ Kpa ye ado, ufa ibed ke ñwet inọọ; akpanikọ amọ ayaarake ke uwem amọ ye ke uwem ndufo, sia ini akịm asʌk aboiyo ndin ata unwana a-ayayamma.

⁹ Awo ake adodo abooho ke idʌñ ke unwana ado anye asua ayịnete amọ asʌk adʌñ ke akịm.

¹⁰ Awo a-amaaha ayịnete amọ, adʌñ ke unwana, ndin ibaaha ñkpọ ke idem amọ a-adiinam nọ anye atuaha ukod.

¹¹ Ado awo a-asuaaha ayịnete amọ aba ke akịm, anyʌñ asaña ke akịm, idiọọñọke nte adutịn aka, sia akịm a-afʌk anye anyen.

Mme ntak anwette

¹² Ñwet ami inọ ndufo ndima nditọ mmi, sia e-efeen idiọọkñkpọ ndufo ato ke anyịñ amọ.

¹³ Mmewet inọ ndufo mme ete, sia ndufo emediọọñọ anye a-akebaaha tọọñọ ke editọọñọ. Ñwet inọ ndufo ñkparawa, sia ndufo emekan andidiọọk. Ñwet nnọ ndima ntəkayịn sia ndufo emediọọñọ Ete.

¹⁴ Ñwet inọ ndufo ndima nditọ, sia ndufo emediọọñọ Ete. Ñwet inọ ndufo, mme Ete, sia emediọọñọ anye a-akebaaha tọọñọ ke aditọọñọ. Ñwet inọ ndufo, mme ñkparawa, sia asịp ndufo asʌk asọsọọñ, ndin ikọ Abasi adʌñ ke idem ndufo, ñko ndufo emekan andidiọọk.

Kuuma ederimbod

¹⁵ Kuuma ederimbod ye mme ñkpọ se iba ke ederimbod. Awo ake adodo a-amaaha ederimbod, ima Ete ibaaha anye ke esịd.

¹⁶ Sia afịd ñkpọ se iba ke ederimbod, ndumek abʌkidem, ndumek anyen ye nduaak inua ke abaña se awo anie ye se anye anam, itooho Ete ado ato ederimbod.

¹⁷ Ederimbod ye afịd ndumek amọ ayaaboiyo afep, ado awo a-anamma se Abasi ama adu uwem ke nsi-nsi.

Ndʌdutọñ ke abaña adisịn Krais

¹⁸ Ndima nditọ, utịd ini ado ami; ndin sia ndufo emekop ke andibiọọññọ Krais asʌk adi, kpa idem idaha ami, uwak-uwak mme andibiọọññọ Krais ewuọọñọ ewọt idem. Ami anam ñnyịn idiọọñọ ke utịd ini ado ami.

¹⁹ Afịd ekewuọọñọ eto ke atu ñnyịn; ado ammọ idooho ake ñnyịn. Akpedo ekedo ake ñnyịn, ammọ ekpaekesọọñọ eda ye ñnyịn; ado ediwuọọñọ ammọ anam ñnyịn idiọọñọ ke ammọ ikidoññoke ake ñnyịn.

²⁰ Ado ndufo emaebọ uyet adan eto Andido Adisana, ñko afịd ndufo emediọọñọ akpanikọ.

²¹ Ñwette sia ndufo miidiọọñọke akpanikọ, sia emediọọñọ, emenyʌñ ediọọñọ ke nsu ba keed itooho akpanikọ.

²² Anie ido asʌhọ nsu? Awo abooho ke Yisọs idooho Krais. Utọ awo ado ado andibiọọññọ Krais, anye ado andikañ Ete ye Ayịn.

²³ Awo a-akañña Ayịn, asịn Ete; awo a-anyịmmeke Ayịn anyʌñ anyịmme Ete.

²⁴ Yak se ndufo ekekop tọọñọ ke editọọñọ asọọñọ asịnne ke uwem ndufo. Se ekekop tọọñọ ke editọọñọ akpesọọñọ asịnne ke uwem ndufo, ndufo eyaekaiso e-edʌñ ke Ayịn ye ke Ete.

²⁵ Se anye akenwọñọ inọọ ñnyịn, kpa nsi-nsi uwem.

²⁶ Ñwet ami mbaña mbon e-eyemme ediben ndufo ntịn usʌñ.

²⁷ Amaado ndufo, idiọọñọ uyet adan e-ekebọọhọ mmọdo asʌk aba ye ndufo, ufọn ibaaha awo ndomokeed adikpeeb ndufo ñkpọ aba. Ado naña idiọọñọ Adisana Sịbidịd amọ ikpeeb ndufo afịd ñkpọ, sia naña idiọọñọ Adisana Sịbidịd ado ado akpanikọ, idooho ñwo, kpa naña akekpeeb ndufo, eba ke anye.

Nditọ Abasi ye idiọọkñkpọ

²⁸ Idahami, ndima nditọ, ekaiso edʌñ ke anye, ma ke ini a-anye adiyaara idem amọ, ñnyịn ikan ida ke uko; idiinyʌññọ ikop abuud ke ini anye adidi.

²⁹ Adieke ndufo ediọọñọke ke anye ado adinen, ediọọñọ ndin ebo ke anye ado Andibon afịd awo e-enamma se inen.