1 Kọrint 9 - Ñwed Abasi Ke Ikọ Ibibio Ayo Mfịn

Mme unen Bọọd nte abọsịd

¹ Nte ami ndooho amanaisọñ? Nte ami ndooho ibed? Nte ami ñkịtte Yisọs Abọọñ ñnyịn? Idooho ndufo edo mfịd utom mmi ke Abọọñ?

² Akpesʌk ado mmeñkpedooho abọsịd nnọ mbon mfen, mmenịm mbo ke mmedo inọ ndufo! Sia ndufo edo idiọọñọ abọsịd mmi ke Abọọñ.

³ Ibọọrọ se nnie nnọ mbon e-etieeghe ke adimmbiom miin ikpe ado ami.

⁴ Ado nte ñnyịn inieghe unen adidia ñnyʌñ ñwọñ ñkpọ?

⁵ Ado nte ñnyịn inieeghe unen adisaña nnam utom ye anwaan a-anịmme Abasi ke akpanikọ, kpa naña ibed mbon ako ye nditọeka Abọọñ ñnyịn ye Kefas enañña?

⁶ Ado nte ami ye Banabas ikpọọñ inie adinam utom ndin idia ñkpọ?

⁷ Anie awo ikpe idem amọ akʌk inwana ekọñ? Anie awo akeme itọ inwañ ado idiaaha utịp inwañ ado? Anie awo ikpeme ufene ado inwọññọ mmọọñeba ufene ado?

⁸ Mme ntañ ami ke abʌkidem? Nte Ibed itañña ukem ami?

⁹ Sia ewet ke Ñwed Ibed Moses ete: “Kuubọp enañ inua ke ini anye akịmme isọñ utọ akpakpa.” Ado enañ ke Abasi akere ñkpọ abaña?

¹⁰ Ke akpanikọ anye atañ ami ibaña ñnyịn. Ih, anye atañ ibaña ñnyịn, sia andikịm isọñ amaakịm andinuak isọñ anyʌñ anuak, anam ke idodanyen abo ke mmimọ iyaiwana udodo.

¹¹ Adieke adooho ñnyịn imitọ ñkpasi sịbidịd ke atu ndufo, nte anekke asọñ adidọk ñkpọ idọk nto ndufo?

¹² Adieke mbon mfen edọkkọ utọ idọk emi ito ndufo, nte ñnyịn ikpikappa inekke inie unen adidọk ñkan? Ado ñnyịn ikikeeneke unen ami. Utu ke ado ñnyịn ikappa iyọ se idodo mbaak idibiọọñọ eti etob Krais.

¹³ Nte ndufo idiọọñọke ke mbon e-enamma utom tembịd edia eto tembịd, mbon ñko e-ekamake usan uwa ekeene ewana ke ndidia uwa?

¹⁴ Kpa ke ukem usʌñ ado, Abọọñ anọ ibed ate mbon e-ekwọrọke ikọ Abasi ana edia ñkpọ eto ikọ Abasi.

¹⁵ Ado ñnyịn ikikeeneke unen ami ndomokeed. Ñnyʌññọ ñwet ewʌhọ ami nọ ato do ndufo enam ñkpọ ntom ennọ miin. Mmebeeñe idem adikpa utu ke awo akpenam nọ ntre adikpọ inua ami.

¹⁶ Ado ñkemeke adikpọ inua, ke ini ami ñkwọrọke ikọ Abasi, sia ana ami ñkwọrọ ikọ Abasi. Asʌk adọdiọọk annọ miin adieke mme ñkwọrọke ikọ Abasi!

¹⁷ Ñkpekwọrọ ke ini awo miiñnyịkke-nyịk, mmenie ñkpọ ayịnutom, ado ekpeñnyenyịk atie nte nnam iso utom a-anaaha nnam.

¹⁸ Nso-o ndin ido udodo mmi? Ukweeñe ado: ke adikwọrọ ikọ Abasi mmekeme inam ado ke mfọn, ndin ke ntodo nsọọñọke unen mmi nte akwọrọ ikọ.

Se Bọọd akekama ubọkọ amọ anam

¹⁹ Akpesʌk ado ami ndo amanaisọñ, ndooho inie awo ndomokeed, mmekappa nnam idem mmi afʌn nnọ afịd-afịd awo nọ ato do ñkọ uwak-uwak ukpọñ.

²⁰ Mmeforo Yuu nnọ mme Yuu nọ ato do ñkọ mme Yuu. Mbon e-ebaaha ke idak ibed mmenyʌñ ñkappa ndo awo a-abaaha ke idak ibed (akpesʌk ado mbaaha ke idak ibed), nọ ato do ñkọ ukpọñ e-ebaaha ke idak ibed.

²¹ Mbon e-mmiinieeghe ibed mmenyʌñ ñkappa ntie nte awo a-mmiinieeghe ibed (akpesʌk ado ami mmembọkkọke ibed Abasi ado ami mba ke idak ibed Krais) nọ ato do ñkọ mme ukpọñ e-mmiinieeghe ibed.

²² Mmekappa ndo awo mmemidem nnọ mbon mmemidem, nọ ñkọ mbon mmemidem. Ami mmekappa ndo afịd ñkpọ nnọ afịd awo nọ ato do ke usʌñ ake adodo ami ñnyaaña usʌk.

²³ Ami nnam afịd ami ke ntak ikọ Abasi, nọ ato do ami ñkeene nwana ke mme edidiọñ ami.

Ufọn adinie mfara ke idem

²⁴ Nte ndufo idiọọñọke ke nduba, afịd awo emia nduba, ado awo keed kpọd asibọ utịb? Ifeghe nọ ato do ebọ utịb.

²⁵ Afịd awo se ika nduba ana enam ata eti mbeeñe idem. Ammọ enam ami nọ ato do ebọ anyanya a-mmiibaagha ke nsi-nsi; ado ñnyịn inam ami nọ ato do ibọ anyanya a-adiiba ke nsi-nsi.

²⁶ Ke ntom, ami mfegheke itọk nte awo a-mmiinieeghe iwuuk; ñnwanake anwan nte awo amia afịm.

²⁷ Iyo-o, ami nnọ idem mmi ufen, ñnyʌñ nnam anye ado ifʌn mmi nọ ado ke ini mmaakwọrọ nnọ mbon mfen, ami ke idem mmi ndiikpuuhọ enọ ado.