1 Kọrint 7 - Ñwed Abasi Ke Ikọ Ibibio Ayo Mfịn

Ke abaña ndọ

¹ Idahami kebaña se ndufo ekewet ebịp: Afọfọn awodeen atre adinie ewana ye awonwaan.

² Ado sia use ye efịbe ekponno eti-eti; yak awodeen keed adọ anwaan amọ, awonwaan anyʌñ anie ebe amọ.

³ Ebe ana anam ubiọñ utom ndọ anọ anwaan amọ, anwaan ñko ana anam kpasʌk ntodo.

⁴ Idem anwaan inieeghe anye ikpọọñ, anie ebe amọ akọrọ. Kpa ke ukem usʌñ ado, idem ebe inieeghe anye ikpọọñ, anie anwaan amọ akọrọ.

⁵ Ikiinyịm keed aken idem, ibọhọke ado ke unyịmme ndufo, ñko ke etək-etək ini, nọ ndufo ekan enọ idem ndufo ayọhọ-ayọhọ ke adibọñ akam. Emaekweeñe emaana eba keed mbaak Setan adidomo ndufo idomo ato ke unana mfadidem.

⁶ Ntañ ami nte unyịmme mmi, idooho nte ewʌhọ.

⁷ Ñkpaama afịd ideen ekpeba nte ami. Ado awodeen keed-e-keed anie asaña-asaña enọ amọ ato Abasi; awo keed anie enọ anyem, awo mfen anie enọ ñnwen.

⁸ Yak ndọkkọ mbon a-amiidọọhọ ndọ, mme ebekpa ye mme ibaanakpa nte: afọn ammọ ekuudọ ndọ, nte ami.

⁹ Ado akpedo ammọ ikanna inie mfadidem, yak ammọ edọ ndọ, sia afọn adidọ ndọ ñkan adikpa ke iwʌd.

¹⁰ Mmenọ mbon e-edọọhọ ndọ ewʌhọ ami (idooho ami, ado Abasi): Anwaan inaaha adiañña akpọñ ebe amọ.

¹¹ Anye akpediañña inaaha anye adọ ndọ aba, me idooho ntodo anye anam emem ye ebe amọ. Ebe ñko inaaha asio anwaan amọ ndọ.

¹² Ndọkkọ mbon ako nte (ami, idooho Abọọñ): Adieke ayịneka awodeen anieeghe anwaan a-mmiinịmme Abasi ke akpanikọ ado anwaan ado anyịmme adidʌñ ye anye, inaaha anye asio anye ndọ.

¹³ Awonwaan ñko akpenie ebe a-ammiinịmme Abasi ke akpanikọ ado ebe ado anyịmme adidʌñ ye anye, inaaha anye asio anye ndọ.

¹⁴ Sia enam ebe a-ammiinịmme Abasi ke akpanikọ asana ato ke anwaan a-anịmme Abasi ke akpanikọ, ñko enam anwaan a-ammiinịmme Abasi ke akpanikọ asana ato ke ebe a-anịmme Abasi ke akpanikọ. Mmiidooho ntodo nditọ ndufo edoñño mbubiam, ado naña aba ado, nditọ esana.

¹⁵ Ado adieke anye a-ammiinịmme Abasi ke akpanikọ anyọññọ, yak anye anyọñ. Ibed ibọppọ nditọeka ke Abasi animme ke akpanikọ ke ndak ado; Abasi abo yak ñnyịn idʌñ ke emem.

¹⁶ Afo anwaan anam die adiọọñọ me afo uduunyaaña ebe mfo? Ñko, afo anam die adiọọñọ me afo ebe uduunyaaña anwaan mfo?

Ke abaña ukpəhọ ndagha

¹⁷ Daña akpedodo, yak keed amʌm itie ke uwem a-Abọọñ anịmme anọ anye ye ake Abasi akekoodo anye. Ibed ami ke ami nnịm ke afịd ufọkabasi.

¹⁸ Nte emaenenịm awo mboppo ndin anye abọ edikood? Inaaha anye akappa ado edʌd. Inaaha anye amaana akappa akedo edʌd. Akpedo awo ikinịmme mboppo ndin anye abọ ikood, inaaha anye anịm aba.

¹⁹ Adinịm mboppo me aditre adinịm mboppo idooho ñkpọ ndomokeed. Adinịm ibed Abasi ado akpan ñkpọ.

²⁰ Yak awo aba ke itie anye akebaaha mbemiso anye abọ ikood Abasi.

²¹ Nte afo akedo afʌn idaha a-akebọọhọ ikood? Kuuyak ado ufịna fiin, ado adieke akanna awuọ ke ufʌn, nam ntodo.

²² Sia awo a-akedooho afʌn idaha anye akebọọhọ ikood mbuọdidem ke Abọọñ, awuọ ufʌn ake Abasi; ke ukem usʌñ ado, awo a-akedooho amanaisọñ ke ini anye akebọọhọ ikood, ado afʌn Krais.

²³ Ekidep ndufo ke ekọmudua; ikiido ifʌn inọ awo.

²⁴ Nditọete, yak awo keed-e-keed a-abọọrọke ikood Abasi, atie ke itie se Abasi akood anye anọ.

Ke abaña mbon a-mmiidọọhọ ndọ

²⁵ Ke abaña ubọikpa mbon se mmiidọọhọ ndọ, nnieeghe ibed nto Abasi, ado mmenọ item nte awo a-adotto ukpono ato mbọm Abasi.

²⁶ Ato ke ntak mfịna se iba idahami, ami ñkere ke afọn ndufo aditie naña ndufo etie ado.

²⁷ Nte amedọ ndọ? Kuuyem adiwuọ ke ndọ. Nte afo udọọhọ ndọ? Kuuyem anwaan.

²⁸ Ado adieke adọọhọ ndọ, afo unamma idiọọkñkpọ; adieke abọikpa adọọhọ ndọ, anye inamma idiọọkñkpọ. Ado mbon se idọ ndọ eyaenie uwak mfịna ke uwem ami, ndin ñyemme ndufo enie utọ mfịna ado.

²⁹ Nditọete, se ñnwana itañ ado, ke ini aməho. Tọọñọ ke ami, yak mbon se inie ibaan edu uwem nte mbon e-mmiinieeghe;

³⁰ mbon se ifʌhọ, nte ammọ ifʌhọke, mbon se idaara, nte ammọ idaarake; mbon se idep ñkpọ, etie nte idooho ammọ enie ñkpọ ado;

³¹ mbon se idat ñkpọ ederimbod inam ñkpọ, keeduọ edʌk mme ñkpọ ado. Sia ederimbod ami naña aba ami asʌk aboiyo afep.

³² Ñkpaama ndufo ekuunie ayeemensia. Awodeen ake mmiidọọhọ anwaan asịn akikere ke ñkpọ Abọọñ, naña anye akpekan anem Abọọñ esịd.

³³ Ado awodeen se idọ anwaan, asịn akikere ke ñkpọ ederimbod, naña anye akpekan anem anwaan amọ esịd,

³⁴ ndin akikere amọ ababakka. Awonwaan a-mmiidọọhọ ebe, a-mmiinyʌññọ idiọọñọ awodeen akpa, asịn akikere ke ñkpọ Abọọñ: se anye ayem ado adiwa idem nnọ Abọọñ ke ikpọkidem ye ke sịbidịd. Ado anwaan ndọ asịn akikere ke ñkpọ ederimbod, naña anye akpekan anem ebe amọ esịd.

³⁵ Ntañ ami ke ufọn ndufo, idooho adibọbọp ndufo, ado nọ edu ke eti usʌñ, inieeghe ubakka ke esịd ke adinam ñkpọ nnọ Abọọñ.

³⁶ Adieke awo akereke ke eduuwem imọ isañake ikikem kebaña abọikpa a-anye akebịppe ndọ, ndin iwʌd amọ anekke akpon, anye ñko akere ke akpena idọ ndọ, yak anye anam se anye ayem. Anye inamma idiọọkñkpọ. Yak ammọ enam ndọ.

³⁷ Ado awo amaakenam ñkpembiire ke esịd amọ, inyʌññọ inie unyịk ndomokeed ado anie iwuuk anyʌñ abiire ke imọ ibooho idọ abọikpa a-mmiidiọọñọke awodeen akpa, awodeen ado ñko anam etiñkpọ.

³⁸ Ke ntodo, andidọ abọikpa a-mmiidiọọñọke awodeen akpa anam etiido, ado anye a-mmiidọọhọ akap afọfọn akan.

³⁹ Awonwaan adiana ye ebe amọ adaña nte anye aduuho uwem. Ado adieke ebe amọ akpaaha, anye anie unen adidọ awo mfen anye amaaha, ado ana awo ado ado awo Abasi.

⁴⁰ Ke akikere mmi, anye ayaakop inemesịd akan, anye akpetre adidọ, anyʌñ atie naña anye aba. Mmekere ke ami ñko mmenie Sịbidịd Abasi.