1 Kọrint 6 - Ñwed Abasi Ke Ikọ Ibibio Ayo Mfịn

Ikpe ke ufọọd mme andinịm ke akpanikọ

¹ Adieke keed ke atu ndufo anieeghe utọk ye emọ-emọ, nte anen anye adiben ikọ ado ñka esob a-mmiidiọọñọke Abasi utu ke anye aben aka iso ikọd Abasi?

² Ado nte ndufo idiọọñọke ke mme anịm Abasi ke akpanikọ ediikpe ikpe ederimbod? Ado akpedo afo uduukpe ikpe ederimbod, ado nte ndufo ikanna ikpe ntək ikpe?

³ Ndufo idiọọñọke ke ñnyịn idiikpe ikpe inọ mme enyere? Nwaa-anwa ado, mme ñkpọ uwem ami!

⁴ Ke ntodo, adieke ndufo enieeghe ntuagha ke abaña utọ ñkpọ ami, emek mme akpe ikpe ke atu ntək awo ndufo ke esịd ufọkabasi?

⁵ Ntañ ami nọ buud inam ndufo. Ado nte ibaaha awo ke atu ndufo a-adiọọñọke ñkpọ akem se akpe ikpe ke atu mme andinịm Abasi ke akpanikọ?

⁶ Utu ke ado, ayịneka aben ayịneka aka ikpe ke esop, kpa ke iso mbon a-mmiinịmme Abasi ke akpanikọ!

⁷ Ndufo adinie ikpe ke atu ndufo awọt ke ikakan ndufo ukeed-ukeed. Ntaha afo muuyakka nọ awo udue fiin-e? Ntaha afo muuyakka nọ awo utʌk fiin-e?

⁸ Utu ke ado, ndufo ke idem-idem ndufo etʌk awo enyʌñ edue awo, enyʌñ enam ami ye nditọete ke Krais.

⁹ Nte ndufo idiọọñọke ke idiọọk awo ndomokeed idiidʌkkọ abio ubọọñ Abasi? Ikiiyak awo ibiaaña ndufo: mme anam use, mme akpono ndem, mme asịn efịbe, mme akpara ideen, mme mbon e-enieeghe ewana ye emọ-emọ idem ammọ,

¹⁰ mme inọ, mme akpammịn, mme abia-mbia, mme mbon ñwo idiinieeghe udeme ke abio ubọọñ Abasi.

¹¹ Se usʌk ndufo ekedoñño ado ado. Ado emaiyet ndufo, enam esana enyʌñ inọ unen ato ke anyịñ Abọọñ ñnyịn Yisọs Krais ye ke Sịbidịd Abasi ñnyịn.

Use ye efịbe

¹² Afo ate, “Mmenie unen adinam afịd ñkpọ,” ado idooho afịd ñkpọ afọn. “Mmenie unen adinam afịd ñkpọ,” ado ndiidʌkkọ afʌn nnọ ñkpọ ndomokeed.

¹³ Afo ate “Ndidia ana anọ idịp, idịp ñko ana anọ ndidia, ado Abasi ayaasobo naña mmọ iba.” Ikpọkidem inaaha inọ use ye efịbe, ado ikpọkidem anie Abọọñ, Abọọñ ñko anie ikpọkidem.

¹⁴ Ke adudu amọ Abasi amaanam Abọọñ aset ke ñkpa. Anye ayaanam ñnyịn ñko iset ke ñkpa.

¹⁵ Nte ndufo idiọọñọke ke idem ndufo edoñño mme ñkek idem Krais? Nte ana mben mme ñkek idem Krais ñkedian ye mbon use ye efịbe? Nwaña nsa-o!

¹⁶ Nte ndufo idiọọñọke ke awo a-anieeghe ewana ye awo use ye efịbe akappa ado keed ye anye ke ikpọkidem? Sia ewet ete: “Iba eyaekappa edo abʌk keed.”

¹⁷ Ado awo ake adianna idem ye Abasi ado keed ye anye ke sịbidịd.

¹⁸ Feghe kpọñ use ye efịbe. Afịd-afịd idiọọkñkpọ mfen se awo anam, inamma ituuk idem amọ, ado awo ake anamma use ye efịbe anam idiọọkñkpọ atuuhọ idem amọ.

¹⁹ Nte ndufo idiọọñọke ke idem ndufo ado itie ukpono Adisana Sịbidịd i-isịneke ndufo ke idem, e-ebọọhọ eto Abasi? Idooho ndufo enie idem ndufo;

²⁰ emaedep ndufo ke ekọmudua. Ke ntak ado idat idem ndufo inọ Abasi ukpono.