1 Kọrint 2 - Ñwed Abasi Ke Ikọ Ibibio Ayo Mfịn

¹ Ke ini ñkedieeghe ibịne ndufo, ñkedieeghe ye akpọsọñ udọọñ ikọ ye akpọsọñ ifiọk ke ini ñketañña ikọ ntiense mbaña Abasi.

² Sia mmaabiire aditre adidiọọñọ ñkpọ ndomokeed ke ini a-mbaaha ye ndufo ke mmibọhọke Yisọs Krais ye adikọñ anye ke eto krọs.

³ Ñkedi ibịne ndufo ke mmemidem ye ndịk ye akpọsọñ ñnyekidem.

⁴ Etop mmi ye ukwọrọ ikọ mmi ikisañake ye aniọñ ye nnem inua, ado akeben adudu Sịbidịd anam uwọdñkpọ,

⁵ mbaak mbuọdidem ndufo akụụsịne ke ifiọk awo, ado asịne ke adudu Abasi.

Aniọñ Abasi ake Sịbidịd ayaarake

⁶ Kpasʌk ado, imisʌk ineme ikọ aniọñ inọ mme adiọọñọ idem awo, ado idooho aniọñ emana mfịn me ake mme andikara ayo mfịn, e-ediwuọọñọ ikpu-ikpu.

⁷ Iyoo, ñnyịn itañ ikọ ibaña ndedịbe aniọñ ake Abasi, aniọñ e-emaekedịp, a-Abasi akebeeñeke anịm anọ ubọọñ ñnyịn ke editọọñọ.

⁸ Ikinwañake mme andikara ayo ami ba keed sia akpedo amaanwaña ammọ, ammọ ikpikikọññọ Abọọñ ubọọñ ke eto.

⁹ Ado naña ewet: “anyen ndomokeed ikịtte, utọñ ndomokeed ikoppo, esịd awo ndomokeed ikereke se Abasi abeeñe anịm anọ mbon se ima anye.”

¹⁰ Ado Abasi ayaara iwọt ñnyịn ke Sịbidịd amọ. Sịbidịd aduunọ afịd-afịd ñkpọ, kpa ye ntəño-ntəño ñkpọ Abasi.

¹¹ Anie ke atu ndufo adiọọñọ akikere esịd awo ke mmiibọhọke sịbidịd esịd idem awo ado? Ke ukem usʌñ ado awo ndomokeed idiọọñọke akikere Abasi ke mmiibọhọke Sịbidịd Abasi.

¹² Ñnyịn ibọọhọ sịbidịd ake ekondo ado ibọ Sịbidịd ake atooho Abasi nọ ato do anekke iñwaña ñnyịn se Abasi inọ ñnyịn ke ntadubọk.

¹³ Se ñnyịn itañ ado ami, idooho ikọ ake ifiọk awo ikpeebe ñnyịn, ado ye ikọ ake Sịbidịd akpeebe, atañ abaña akpanikọ ake Sịbidịd ato ke ikọ Sịbidịd.

¹⁴ Awo mmiinieeghe Sịbidịd ibọọhọ ñkpọ a-atooho Sịbidịd Abasi sia atie anye ndisịme-ndisịme, ñko ikanna inwaña anye sia ediọọñọ mme ñkpọ ami eto Sịbidịd.

¹⁵ Awo anieehe Sịbidịd akeme inọ ubiireikpe mbaña afịd ñkpọ, ado anye ke idem amọ ibaaha ke idak ubiireikpe awo ndomokeed.

¹⁶ Sia, “Anie awo adiọọñọ akikere Abọọñ nọ anye akeme ikpeeb Abasi ñkpọ?” Ado ñnyịn inie akikere Krais.