1 Kọrint 16 - Ñwed Abasi Ke Ikọ Ibibio Ayo Mfịn

Etịbe a-anieeghe mbon Abasi

¹ Ndin kebaña etịbe a-anieeghe mbon Abasi: Inam se ñkebo mbon ufọkabasi Kadesia enam.

² Ke akpa usen ke afịd udua, awo keed-e-keed akpena adiañña asaña-asaña akʌk anịm akeene se anye anie, abọọk anịm, ndin mmaadi adibọ, etịbe idiibaaha aba.

³ Ndin, mmaadisịm, ñyaanọ mme awo se ndufo emek ye ñwed adiben awo ñwọt ye enọ ndufo eben eka Yerusedem.

⁴ Adieke afọnnọ nte ke ana ami ñka, ammọ eyaeñkeene miin.

Mme ebeeñe idem mmi

⁵ Mmaaboiyo nto Masidonia ndi, ñyaadise ndufo, sia ndiisaña mboiyo ke Masidonia.

⁶ Akeme ido ñyaaba etək ye ndufo, akeme ido ñyaaba do afịd ini ekarika, ma ndufo esịn unwam ennọ ke isañ mmi, itie nte ñyem ikaka.

⁷ Ñyemme adidi usọp-usọp mboiyo; mmeyem adikpiba ñkpeene ye ndufo, ke Abasi anyịmmeke.

⁸ Ado ñyaaba ke Efisọs tutu akem ini Bentikọs,

⁹ sia ekamba usʌñ adinam eti utom abere annọ, uwak awo ñko mmọdo e-ebeeñeke idem adimbiọọñọ miin.

¹⁰ Timoti akpedi, ekịt ebo ke anye inieeghe ntak adikop ndịk adaña nte anye abaaha ye ndufo, sia anye anam utom Abasi, kpa naña ami nnam.

¹¹ Ke awo ndomokeed asịn anye. Isio anye unyọñ ke emem nọ anye atịmme ambịne miin. Nsʌk mbet anye ye mme nditọete mbon ñko.

¹² Ndin kebaña ayịneka ñnyịn Apọdọs: Mmaanekke mbo yak anye ye nditọete edibịne ndufo. Ado anye ikinyịmmeke adika idahami, ado ayaaka ufañ amaamaana iba.

¹³ Iba ke ñkpeme idem; isọọñọ ida ke mbuọdidem: ido mbon uko; isọñ idem.

¹⁴ Inam afịd ñkpọ ke ima.

¹⁵ Emediọọñọ ebo ke ufọk Sitefanas ekedo mme akpa mbon e-ekekappake esịd ke Akaya, ndin ammọ ewa idem ke adinwam mme ikọd Abasi. Mmekpeiye ndufo nte, nditọeka,

¹⁶ yak esuuk iwuod enọ utọ mbon ami ye afịd awo se idian ubọk inam utom inyʌñ iwa idem.

¹⁷ Mmaakop inemesịd ke ini Sitefanas, Fotunatus ye Akaikus ekedisịmme, sia ammọ emaeben se ikinana ñnyịn eto ndufo edi.

¹⁸ Ammọ emaedemme sịbidịd mmi ye ake ndufo ñko. Utọ mme awo ntom edot ukpono.

Akpatre ekọọm

¹⁹ Mme ufọkabasi ke ikpeghe Esia enọ ekọọm esọk ndufo. Akwida ye Brisida, ekọọm ndufo eti-eti ke Abọọñ, ukem ñko ato ufọkabasi a-asisooboke ke ufọk ammọ.

²⁰ Afịd-afịd nditọete mmi enọ ekọọm esọk ndufo. Ikọọm keed aken ke adisana ntʌminua.

²¹ Ami Bọọd, ñwed ekọọm ami ke ubọk mmi.

²² Adieke awo ndomokeed miimaaha Abọọñ, sueñ utọ awo ado! Di, O Abọọñ!

²³ Mfọn Abọọñ Yisọs aba ye ndufo.

²⁴ Ima mmi aba ye afịd ndufo ke Krais Yisọs, Amen.