1 Kọrint 15 - Ñwed Abasi Ke Ikọ Ibibio Ayo Mfịn

Adised ke ñkpa Krais

¹ Idahami, nditọete, ñyem aditoiyo ndufo mbaña ikọ Abasi se ami ñkekwọrọ inọ ndufo, a-ndufo ekebọọhọ, a-ndufo enyʌññọ edat nte ndaha ndufo.

² Ato ke eti etob ami ndufo ebọ adinyaaña, adieke ndufo esọọñọke eda ke se ñkekwọrọ inọ ndufo. Mmiidooho ntodo adinịm ke akpanikọ ndufo ado ukpọk.

³ Sia se ami ñkebọ ke ñkekpọñ inọ ndufo nte ata akpan ñkpọ: ke Krais amaakpa ke ntak idiọọkñkpọ ñnyịn, kpa naña ewet ke ñwed Abasi,

⁴ ke emaebuuk anye, ndin emaenam anye aset ke ayọhọ usen ita kpa naña ewet ke ñwed Abasi,

⁵ ndin ke anye amaayaara idem amọ awọt Bita ye mme mbed duob mme iba.

⁶ Ke ado aboiyoke, anye amaayaara idem awọt mme andinịm e-ewakka ekan awo ikie ition ke ini keed, uwak ammọ mmọdo ke uwem, akpesʌk ado usʌk emaedaiya.

⁷ Akema anye amaayaara idem awọt Yemsi, ndin afịd mme abọsịd,

⁸ ndin ke akpatre anye ayaara idem añwọt miin ñko, nte anye a-akemanake ke atikuo-atikuo usʌñ.

⁹ Sia ami ndo andisịp ñkan ke atu mme abọsịd, ndotto se ekpekood abọsịd sia mmaakọbọ ufọk Abasi.

¹⁰ Ado ato ke mfọn Abasi, ami ndo se ami ndo, ndin mfọn amọ ikidooho ke utak-utak. Iyo-o, mmaanam utom ñkan afịd mme abọsịd mbon ñko, idooho ke ukeme mmi, ado ato ke mfọn Abasi a-akebaaha ye ami.

¹¹ Se akeedodo, me ami-o me ammọ-ọ, se ñnyịn ikwọrọ ado mi, se ndufo ekenyʌñ enịm adodo.

Adised mme akpañkpa

¹² Adieke ekwọrọke ebo ke enam Krais aset ke ñkpa, usʌk ndufo enam die ebo ke adised ke ñkpa ibaaha?

¹³ Adieke adised ke ñkpa miibaaha awuọọñọ ke Krais ke idem amọ ikisette.

¹⁴ Ndin adieke Krais miikisette awuọọñọ ukwọrọ ikọ ñnyịn ye mbuọdidem ndufo ado ikpu-ikpu.

¹⁵ Ke akannakan ado, ekịt ñnyịn ndin nte idoñño mme nsu-nsu ntiense ibaña Abasi, sia ñnyịn iminọ ntiense ibaña Abasi ke anye akenam Krais aset ke ñkpa. Ado anye ikinamma anye aset, adieke ke akpanikọ mme andikpañña ñkpa miisette.

¹⁶ Sia adieke mme akpaññañkpa miisette, Krais ikemeke iset ñko.

¹⁷ Ndin adieke Krais miikisette, mbuọdidem ndufo ado ukpọk; esʌk enyịne ke idiọọkñkpọ ndufo.

¹⁸ Ndin mbon e-ekekpaññake ke Krais etak.

¹⁹ Adieke ñnyịn inieeghe idodanyen ke Krais ke uwem ami ikpọọñ-ikpọọñ, awuọọñọ mbọm ñnyịn aba ata eti-eti akan afịd mbon mfen.

²⁰ Ado Krais ke akpanikọ aset ke ñkpa, akpa mbunwịm mbon e-ekpaññake.

²¹ Sia ñkpa aketooho awo keed adi, adised ke ñkpa anyʌñ ato awo keed adi.

²² Sia ato ke Adam afịd awo ekpa, ñko ke Krais afịd awo eyaenie uwem.

²³ Ado anie ini amọ anie: Krais, akpa mbunwịm, ndin anye amaadi, mbon se ido ake amọ ediana.

²⁴ Ndin utịd ayaadi, ini se Krais adiikpọñ abio ubọọñ inọ Abasi Ete ke ini anye amaakesobo afịd adudu ye ukara.

²⁵ Sia ana anye akara tutu anye asịn mme asua amọ ke idak ikpad amọ.

²⁶ Akpatre asua e-ediisobo ado ñkpa.

²⁷ Sia anye, “asịn afịd ñkpọ ke idak ñkpad amọ.” Ndin emaebo, “Afịd ñkpọ” asịne ke idak amọ, ediọọñọ ke Abasi isịneke ke idak ado, sia anye akenịm ukeed ñkpọ ke idak Krais.

²⁸ Ke ini anye amaakenam ami, ndin Ayịn ayaasuuk iwuod anọ andikinịm afịd ñkpọ ke idak amọ, nọ Abasi ado afịd ke afịd.

²⁹ Adieke adised ke ñkpa miibaaha, mbon e-eduọkkọ mmọọñ enọ mme akpañkpa adinam die? Adieke mme akpañkpa miisette, ntak eduọkkọ mme awo mmọọñ enọ ammọ?

³⁰ Ndin ñnyịn ntom, ntaha ñnyịn isiooho idem ñnyịn inyan anwa-anwa?

³¹ Kwa usen ami ñkịt ñkpa ke anyen, akpanikọ ke ntañ, nditọete, kpa naña nduaak inua ke ntak ndufo ke Krais Yisọs Abọọñ ñnyịn.

³² Adieke ñnwanake ye mme afai unam ke Efisọs ke ntak awo, nso-o ido udod mmi? Adieke mme akpañkpa miisette, “Yak ñnyịn idia inyʌñ inwọñ, sia ñkpọñ ñnyịn iyaikpa.”

³³ Ke awo atịn ndufo usʌñ: “Idiọọk nsaña ababiat eti edu.”

³⁴ Itịmme ika eti iwuod ndufo naña ekpeba, inyʌñ itre adinam idiọọkñkpọ: ado aba mbio a-ammiinieeghe ifiọk ibaña Abasi, ntañ ami nọ buud imʌm ndufo.

Ikpọkidem adised

³⁵ Awo akeme ibịp, “Mme akpañkpa enam die eset? Nso-o uto ikpọkidem ke ammọ ediinie?”

³⁶ Ata ndisịme! Se awo atọ ikemeke aditịppe ibọhọke ñkpọ ado akpa.

³⁷ Awo amaatọ ñkpọ, idooho se anye adidọk ke anye atọ, ñkpasi kpọd ke etọ, me ake akpakpa me ñkpọ mfen.

³⁸ Ado Abasi anọ anye idem naña anye abiire, ndin anye anọ nsio-nsio ñkpasi asaña-asaña idem.

³⁹ Afịd ikpọkidem idooho ukem: Awo anie utọ idem keed, unam anie mfen, inuen utọ mfen, iyak utọ mfen.

⁴⁰ Idem ake anyọñ mmọdo, ake isọñ mmọdo ñko; ado uyai idem ake anyọñ ado isio-isio, ake idem isọñ anyʌñ ado isio-isio.

⁴¹ Utịn anie asaña-asaña uyai amọ, afiọñ ñko anie asaña-asaña uyai amọ ye mme ntantaafiọñ ñko; ntantaafiọñ keed akpəho ye ntantaafiọñ mfen ke uyai.

⁴² Ukem ami ke adido ke adised mme akpañkpa. Idem e-etọọhọ ado se ikeme ibiara, ado adiset nte se miibiarake;

⁴³ etọ ke esuenne, adiset ke ubọọñ; etọ ke mmemidem, adiset ke adudu;

⁴⁴ etọ ke abʌkidem, adiset ke idem sịbidịd. Adieke abʌkidem abaaha, ana idem sịbidịd ñko anyʌñ aba.

⁴⁵ Ke ntodo ewet: “Akpa awo Adam amaakpa ado adu uwem awo,” akpatre Adam, ado anọ uwem sịbidịd.

⁴⁶ Idooho sịbidịd aketo adi, ado abʌkidem, ke ado aboiyoke sịbidịd adiana.

⁴⁷ Akpa awo akedo ntọñ isọñ, ayọhọ awo iba ato anyọñ.

⁴⁸ Kpa naña awo abʌkidem akeba, kpa ntodo ke mbon e-etooho ederimbod ebañña; naña awo anyọñ aba, ntodo ñko ke mbon anyọñ ebañña.

⁴⁹ Kpa naña ñnyịn inie mbiod awo isọñ, ntodo ñko ke idiinie mbiod awo a-atooho anyọñ.

⁵⁰ Ñtañ inọ ndufo, nditọeka, nte ke abʌk ye iyiib ikemeke adinie udeme ke abio ubọọñ Abasi, me mbiara adinie udeme ke se miibiarake.

⁵¹ Ikpañ utọñ, ami idọkkọ ndufo ndịbe-ndịbe ñkpọ: idooho afịd ñnyịn idiikpa, ado afịd ñnyịn iyaikpəhọ

⁵² ke adibọp anyen ntat, ke akpatre adukpoñ amaasio uyo, mme akpañkpa eyaeset ye uwem a-miimbiarake ndin ñnyịn iyaikpəhọ.

⁵³ Sia mbiara ana akappa ado se miibiarake, ikpa-ikpa ñko anie uwem.

⁵⁴ Ke ini mbiara amaakpa ikappa ido se miibiarake, ikpa-ikpa ñko anie uwem, ndin se ekewet ayaadisu: “Adikan aben ñkpa amen.”

⁵⁵ “O ñkpa, adikan mfo anye-e? O ñkpa, ifọd mfo anye?”

⁵⁶ Ifọd ñkpa ado idiọọkñkpọ, adudu ñkpa ado ibed.

⁵⁷ Ado ekọọm anie Abasi! Anye inọ ñnyịn adikan ato ke Abọọñ ñnyịn Yisọs Krais.

⁵⁸ Ke ntom, ndima nditọete mmi, isọọñọ ida. Ikiiyak ñkpọ ndomokeed inyeeñe ndufo. Afịd-afịd ini, isịn idem ndufo ayọhọ-ayọhọ ke utom Abọọñ, sia emediọọñọ ke ñwaidem ndufo idooho ke utak-utak.