1 Kọrint 14 - Ñwed Abasi Ke Ikọ Ibibio Ayo Mfịn

Ifiọk ukpono Abasi

¹ Saña ke usʌñ ima nyʌñ nekke wʌddọ mme enọ Sịbidịd, akpan-akpan enọ brọfesi.

² Sia awo ake adodo a-asemme nsio-nsio usem isemme inọ awo ado asem anọ Abasi. Ke akpanikọ, iñwañake awo ndomokeed se anye atañ; anye atañ mme ndịbe-ndịbe ñkpọ ke Sịbidịd.

³ Ado awo a-atañña brọfesi atañ anọ mme awo nọ enie nsọọñọnda, nsọọñọidem ye idọñesịd.

⁴ Awo a-asemme ke usem anọ idem amọ ukpeeb, ado awo a-atañña brọfesi adịppe idaha ufọkabasi.

⁵ Ñkpemaama nọ afịd ndufo esem nsio-nsio usem, ado ñkpaanekke ñyem ndufo etañ brọfesi. Awo se itañ brọfesi akoñ idaha akan awo se isem nsio-nsio usem, ibọhọke anye ñko akan akappa ma adidịppe idaha ufọkabasi.

⁶ Ndin idahami nditọeka, adieke ami ndieeghe ndisem nsio-nsio usem, nso-o ufọn ke nnie inọ ndufo, ibọhọke ami nsaña ye adiyaara me ikọ brọfesi me ikọ ukpeeb?

⁷ Ikpidat udomo ñkpọ ke mme ñkpọ se ikeme inam uyom nte ufefịd ñkpọ me ndido, awo adinam die idiọọñọ se ekwọ adieke anye mmiidiọọñọke mme nsio-nsio uyo se idọñọ ke esịd?

⁸ Ñko, adieke uyo abukpoñ miiñwañake awo, adinam die inie mbeeñe idem inọ ekọñ?

⁹ Ukem ami ke ado ye ndufo. Ibọhọke esem usem se afịd awo ekop, adinam die idiọọñọ se ndufo etañ? Ikọ ndufo adiiba nte awo atañ ikọ anọ afịm.

¹⁰ Ado akpanikọ ke nsio-nsio usem ebañña ke ekondo, ado ibaaha anye a-mmiinieeghe se awuọọñọ.

¹¹ Adieke mmeñkoppo se awo atañ, ami ndo asenawo nnọ awo ado, anye ñko ado asenawo annọ miin.

¹² Ukem ami ke ado ye ndufo. Sia ndufo enieeghe udọñ adinie mme enọ Sịbidịd, inwana usʌñ adidịppe idaha ufọkabasi.

¹³ Ke ntak ado, yak awo a-asemme nsio-nsio usem abọñ akam abọ ukeme adikan ñkappa se anye atañ.

¹⁴ Sia adieke ami mbọññọ akam ke asen usem, ado sịbidịd mmi abọñ akam, ado esịd mmi inieeghe mbunwịm.

¹⁵ Ndiinam die? Ana mbọñ akam ke sịbidịd mmi ñnyʌñ mbọñ ke esịd mmi; ana ñkwọ ikwọ ke sịbidịd mmi ñnyʌñ ñkwọ ke esịd mmi.

¹⁶ Adieke afo atooroke Abasi ke sịbidịd mfo, awo mfen a-abaaha ke atu ado adinam die isọọñọ ke edibo, “Amen” inọ itooro mfo, ke ini anye mmiidiọọñọke se afo atañ abaña?

¹⁷ Akeme ido anọ ekọọm ke akpanikọ, ado awo ako idiidịppeke idaha amọ.

¹⁸ Mmekọọm Abasi nte ami mmekan nsem nsio-nsio usem ñkan afịd-afịd ndufo.

¹⁹ Ado ke esịd ufọkabasi ñkpekap mma itañ ikọ ition se idiidịppe idaha mme awo utu ke ntañ ikọ tọsịn duop ke asen usem.

²⁰ Nditọete, itre adikere ñkpọ nte ntəkayịn. Akpedo ke usʌñ idiọọk ñkpọ idoñño ntəkayịn, ado ke akikere ndufo idoñño ñkpoon awo.

²¹ Ke Ibed awet ate: “Ayaato ke mme awo e-esemme mme isen usem ye ke ñkpọkinua mme isenawo Ami nyaatañ ikọ nnọ ibon ami. Ado kpa ye ado ammọ idiinọọhọ ñkpañutọñ,” Abọọñ abo.

²² Adisem nsio-nsio usem ado idiọọñọ, idooho inọ mbon e-enịmme Abasi ke akpanikọ, ado ado idiọọñọ anọ mbon se miinịmme Abasi ke akpanikọ; brọfesi, ñko, inieeghe mbon a-ammiinịmme Abasi ke akpanikọ; ado anie mme andinịm ke akpanikọ.

²³ Adieke afịd ufọkabasi ebohoke keed ndin afịd awo esem nsio-nsio usem, ndin ubaak awo eba adooho se etañ iñwañake ammọ me mbon a-ammiinịmme Abasi ke akpanikọ, edʌk edi ke ini enamma utọ adinam ami, nte ammọ idiibooho ke ndufo emedamma?

²⁴ Ado adieke awo a-ammiinịmme Abasi ke akpanikọ me awo a-aduuñọkeduuñọ adʌkkọ adi ke ini afịd awo etañña brọfesi, eyaewọt anye ke anye ado anam idiọọkñkpọ, ñko ke afịd awo eyaebiom anye ikpe,

²⁵ ndin mme ndịbe ñkpọ esịd amọ ayaaña anwa-anwa. Anye ndin ayaaduọ ke isọñ akpono Abasi, anyʌñ abo, “Ke akpanikọ, Abasi mmọdo ke atu ndufo!”

Ukpono ke usʌñ a-adotto

²⁶ Nso-o ndin ke ñnyịn ikeme adibo, nditọeka? Ndufo emaediboho, afịd awo enie ikwọ, me ikọ ukpeebñkpọ, me adiyaara, me nsio-nsio usem me adikappa. Ana enam afịd ami adidịppe idaha ufọkabasi.

²⁷ Adieke awo asemme asen usem, awo iba, ñwak mbọhọ awo ita, akpena esem, awo keed-e-keed, ndin ana awo akappa.

²⁸ Andikappa miibaaha, andisem usem anaadop uyo ke ufọkabasi, asem anọ idem amọ ye Abasi.

²⁹ Brọfed iba me ita akpena etañ ikọ, ndin mbon ñko ana enekke edomo se ammọ etaña.

³⁰ Adieke eyaarake brọfesi enọ awo se itie-tie awo andikito ntañ ana atre.

³¹ Sia afịd ndufo emekeme aditañ brọfesi awo ke adiana ke adiana, nọ afịd awo ekan ebọ ukpeeb enyʌñ enie nsọọñọnda.

³² Mme sịbidịd atañ brọfesi ana esuuk iwuod enọ mme brọfed.

³³ Sia Abasi idooho Abasi ndutịme ado Abasi emem, kpa nte adooho ke afịd mbono ikọd Abasi.

³⁴ Ibaan ikpinaaha esio uyo ke esịd ufọkabasi. Inaaha ammọ etañ ikọ, ado ana eba ke idak nsuukiwuod, kpa naña ibed atañ.

³⁵ Adieke ibaan enieeghe mbịme ebaña ñkpọ ake adodo, yak ammọ ebịp mme ebe ammọ ke ufọk; sia ado ñkpọ abuud awonwaan aditañ ikọ ke esịd ufọkabasi.

³⁶ Nte ikọ Abasi aketo ndufo asaka? Me ado nte ndufo ikpọọñ ke ikọ Abasi asịm?

³⁷ Adieke awo akereke ate ke imọ ido brọfed me inie enọ sịbidịd, yak anye anyịmme ke se ami ñwet ami ado ewʌhọ Abasi.

³⁸ Adieke anye asịnne ikọ ami, eyaenyʌñ esịn anye.

³⁹ Ke ntodo, nditọete mmi, isọp idem aditañ brọfesi, ikiinyʌñ ikpan adisem nsio-nsio usem.

⁴⁰ Ado yak enam afịd ñkpọ ke usʌñ a-adotto.