1 Kọrint 13 - Ñwed Abasi Ke Ikọ Ibibio Ayo Mfịn

¹ Adieke ami nsemme usem mme awo ye ake mme enyere, ado nnieeghe ima, ami nnam uyom nte akpañ-kpañ.

² Adieke ami nnieeghe enọ brọfesi ñnyʌñ ñkan ndiọọñọ mme ndịbe-ndịbe ñkpọ ye ifiọk, mmaana nnie mbuọdidem a-akemeke idiime mme ikpọ abod, ado nnieeghe ima, awuọọñọ ikpu-ikpu.

³ Adieke ami mbenne afịd inie mmi nnọ mme uwueene mmaana nsaana idem mmi nte yak efọp, ado nnieeghe ima, udod indoroke ba keed.

⁴ Ima ado ime, ima afọn ido. Inieeghe udu, inyʌññọ iduaak inua, ikokkoke idem.

⁵ Idiọọhọ ido, iyemme ufọn idem amọ, isọppọ iyadesịd, ibatta nnamndue.

⁶ Ima ikoppo inem ke idiọọk, ado adaara ke akpanikọ.

⁷ Afịd ini ima akpekpeme, anịm ke akpanikọ, anie idodanyen, anie nsọọñọnda.

⁸ Ima akenanam ikpuuhọ. Ado ke itie nte brọfesi aba, ami ayaatre; itie nte nsio-nsio usem ebañña, eyaedobo; itie nte ifiọk aba, ayaaboiyo ifep.

⁹ Sia ñnyịn idiọọñọ ubaak-ubaak, inyʌñ itañ brọfesi ubaak-ubaak,

¹⁰ ado ke ini ayọhọ ifiọk amaakem, ubaak ifiọk ayaasop.

¹¹ Idaha a-ñkedooho etəkayịn, ñketañ ikọ nte etəkayịn, ñkpọ akeñnwaña miin nte etəkayịn, ñkekere ñkpọ nte etəkayịn. Ñkekpon ndo ekamba awo, ami ñkpọñ ñkpọ ntəkayịn.

¹² Idahami ñnyịn ikịt ñkpọ ndukpọñ-ndukpọñ nte ikịt ke ukịdiso; ini amaakem iyaikịt iso ye iso. Idahami ndiọọñọ ubaak-ubaak; idahado ñyaadiọọñọ ayọhọ-ayọhọ kpa naña endiọọñọ miin ayọhọ-ayọhọ.

¹³ Ndin idahami ñkpọ ita ami esʌhọ: mbuọdidem, idodanyen ye ima. Ado andikpon ñkan ke atu mme ñkpọ ami ado ima.