1 Kọrint 12 - Ñwed Abasi Ke Ikọ Ibibio Ayo Mfịn

Ke abaña mme enọ sịbidịd

¹ Ndin nditọete, ñyemme ndufo enana ifiọk ebaña mme enọ Sịbidịd.

² Ndufo emediọọñọ ke idaha ndufo ekedoññoke mme akpono ndem, ke nsio-nsio usʌñ, ndufo ekenam ñkpọ ekeene ndadusʌñ mme imuum ndem.

³ Ke ntak ado, ami ibo ndufo nte ke ibaaha awo a-atañña ikọ ke ndadusʌñ Sịbidịd Abasi a-akemeke edibo ate, “Adọdiọọk anọ Yisọs,” awo ndomokeed inyʌññọ ikeme ibo, “Yisọs ado Abọọñ,” ke mmibọhọke ke Adisana Sịbidịd.

⁴ Mme nsio-nsio enọ ebañña, ado Sịbidịd ado keed.

⁵ Nsio-nsio utom ebañña, ado Abọọñ ado keed.

⁶ Nsio-nsio adinam ebañña ado kpa Abasi keed anam afịd utom ke idem afịd awo.

⁷ Enọ awo keed-e-keed adiyaara Sịbidịd nọ ato do anam ufọn anọ afịd awo.

⁸ Ato ke Sịbidịd enọ awo keed etop aniọñ, enọ awo mfen etop ifiọk kpasʌk ke Sịbidịd keed ado,

⁹ enọ awo mfen mbuọdidem kpa ke Sịbidịd keed ado, enọ awo mfen enọ adikọk mme udọñọ kpa ke Sịbidịd keed ado,

¹⁰ awo mfen enọ utịbe adudu, awo mfen enọ utañ brọfesi, awo mfen enọ adiduuñọ mme sịbidịd, awo mfen enọ enọ aditañ ikọ ke nsio-nsio usem, awo mfen esʌk enọ enọ adikappa mme nsio-nsio usem.

¹¹ Afịd-afịd ami ado mme utom Sịbidịd keed ami, anye anyʌñ anọ awo keed-e-keed akeene naña anye ama.

Idem keed, uwak ndido

¹² Idem ado keed ado anie uwak ndido; akpesʌk ado ndido idem awakka, afịd ado anam idem keed. Ukem ami ke ado ke Krais.

¹³ Sia ekeduọk afịd ñnyịn mmọọñ ke Sịbidịd keed esịn ke idem keed me ido mme Yuu me mme Yentaid, afʌn me amanaisọñ, ekenyʌñ inọ afịd ñnyịn Sịbidịd keed ami inwọñ.

¹⁴ Ndin idem inieeghe ndido keed, anie uwak ndido.

¹⁵ Adieke ukod akpebooho ate, “Sia ami mmendooho ubọk, ami ndooho ubaak idem,” ibooho ito ke ntak ado anye atre adido ndido idem.

¹⁶ Adieke utọñ akpebooho ate, “Sia ami mmendooho anyen, ami ndooho ubaak idem,” ibooho ito ke ntak ado anye atre adido ndido idem.

¹⁷ Adieke afịd idem akpedooho anyen, ekpenam die ekop ñkpọ? Adieke afịd idem akpedooho utọñ, ekpenam die enuuno ñkpọ?

¹⁸ Ado Abasi a-aneeñe ndido abono ke idem, keed-e-keed, kpa naña anye akeyem nọ ammọ eba.

¹⁹ Adieke afịd-afịd ndido akpedooho ndido keed kpọd, idem ndin akpeba ke mmọ?

²⁰ Naña aba ado, ndido ewak, ado idem ado keed.

²¹ Anyen ikemeke ibo ubọk “Ami uyemme fiin!” Iwuod ñko ikanna ibo ukod, “Ami uyemme fiin!”

²² Utu ke ado, ndido idem ekappa eba nte ammọ isọọñọke idem, ammọ ekappa edooño atịp atua,

²³ ndin mme ndido a-ñnyịn ikereke ke inieeghe ukpono ke ñnyịn ikappa inọ asaña-asaña ukpono. Mme ndido awo miibenne isio inyan ke ekap ededịp,

²⁴ ke ini adooho ndido idem se ekịt inieeghe utọ asaña-asaña ukpono ado. Ado Abasi a-awuaak mme nsio-nsio ndido idem awo akappa aben akaakan ukpono anọ mme itie a-mmiikinieeghe,

²⁵ mbaak ubakka ndomokeed adiba ke afịd idem, ado nọ mme ndido ekere ñkpọ ebaña keed eken.

²⁶ Adieke ndido keed anieeghe mfịna, afịd ndido enie mfịna ado ye anye; adieke ndido keed abọọhọ ukpono, afịd ndido edaara ye anye.

²⁷ Ndin ndufo edo idem Krais, ndufo keed-e-keed edo ndido idem ado.

²⁸ Ndin ke ufọkabasi, Abasi amek ke akpa itie mme abọsịd, udiana mme brọfed, ayọhọ ita mme andikpeeb, ndin mme anam utịbe ñkpọ, ndin mbon se inie enọ ukọk udọñọ, mbon e-ekemeke inwam mbon mfen, mbon enieeghe enọ ndadusʌñ, ye mbon e-esemme nsio-nsio usem.

²⁹ Nte afịd awo edo mme abọsịd? Afịd edoñño mme brọfed? Me afịd awo enam utịbe ñkpọ?

³⁰ Me afịd enie enọ ukọk udọñọ? Nte afịd esem nsio-nsio usem? Nte afịd ekan ekappa mme usem?

³¹ Mbo yak enekke eyem mme enọ se ifọn ikan afịd mme enọ mfen. Ndin ami ñyaiwọt ndufo ata eti usʌñ afọnnọ akan.