1 Kọrint 11 - Ñwed Abasi Ke Ikọ Ibibio Ayo Mfịn

¹ Kpebe uwʌd ñkpọ mmi kpa naña ami ñkpebe uwʌd ñkpọ Krais.

Adifʌk iwuod ke ini ukpono Abasi

² Ami mmitoodo ndufo ke adintoiyo miin ke afịd ñkpọ ñko ye adimʌm mme ukpeebñkpọ kpa naña ñkekpọñ ammọ inọ ndufo.

³ Idahami, ñyem ndufo ediọọñọ ke Krais ado iwuod anọ awodeen, ñko awodeen ado iwuod anọ awonwaan, ndin Abasi ado iwuod anọ Krais.

⁴ Awodeen ake adodo a-abọññọ akam me atañ brọfesi ke ini anye afʌkkọ iwuod amọ, anọ iwuod amọ emiom.

⁵ Ñko awonwaan a-abọññọ akam me atañ brọfesi ke ini anye miifʌkkọ iwuod amọ, anọ iwuod amọ emiom, ke akpanikọ atie nte anye akpefatta-fat ided amọ.

⁶ Adieke awonwaan miifʌkkọ iwuod amọ akpena anye afat ided amọ; ado akpedo ado ñkpọ abuud anye adifat ided, yak anye afʌk iwuod.

⁷ Awodeen ikpinaaha afʌk iwuod amọ sia anye adooho ndukpọñ ye ubọọñ Abasi; ado awonwaan ado ubọọñ awodeen.

⁸ Sia awodeen ikitooho awonwaan idi, ado awonwaan aketo awodeen;

⁹ awo ikinyʌññọ ibot awodeen inọ awonwaan, ado ekebot awonwaan enọ awodeen.

¹⁰ Ke ntak ami, ye ke ntak mme enyere, akpena awonwaan anie idiọọñọ ukara ke iwuod amọ.

¹¹ Ado ke Abọọñ, awonwaan inieeghe unen idem amọ ikpọñ awodeen, awodeen ñko inieeghe unen idem amọ ikpọñ awonwaan.

¹² Sia kpa naña awonwaan aketo awodeen, ntodo ñko ke awodeen amana ato awonwaan. Ado ukeed ñkpọ ato Abasi.

¹³ Ibiire inọ idem ndufo ise: Nte adot awonwaan adibọñ akam nnọ Abasi ke ini iwuod amọ anaaha inwañ?

¹⁴ Nte edu ubonoñkpọ ikpeebe ñnyịn ibo ke awodeen akpenie anyan ided, ado ñkpọ abuud anọ anye,

¹⁵ ado ke awonwaan akpenie anyan ided, ado uku amọ? Sia enọ anye anyan ided nte ñkpọ adifʌk.

¹⁶ Awo akpenie mfaaña abaña ñkpọ ami, ñnyịn inieeghe ido mfen ikan ami, mme ufọkabasi ñko inyʌññọ inie.

Naña ekpenam ñkpọ ke ini udia Abọọñ

¹⁷ Ke mme ewʌhọ ami, ami nnieeghe itooro ndomokeed inọ ndufo, sia mme mboho ndufo anam idiọọk akan eti.

¹⁸ Akpa ñkpọ, mmekop ke ndufo emaediboho ke ufọkabasi, ubakka aba ke atu ndufo, ndin mmeyem adinịm mme ñkpọ ami ke akpanikọ.

¹⁹ Mfaaña ibaaha, sia ana mme awo edoñño nsio-nsio ma ediọọñọ mbon e-ebọọhọ unyịmme Abasi.

²⁰ Ndufo emaediboho keed, idooho ndidia Abọọñ ke ndufo edia,

²¹ sia awo keed idaaha ibet awo mfen adikeene adia, anam nọ awo keed akop uyʌkkọ, awo mfen adakka abiọñ, ndin ukọd anaam awo mfen.

²² Ado nte ndufo inieeñeke ufọk se ndufo edia enyʌñ enwọñ ndin ndufo edi? Me ado nte ndufo emiom ufọkabasi enyʌñ esuenne mbon a-mmiinieeghe ñkpọ? Nso-o ke ndiitañ ye ndufo? Me ñyaitooro ndufo? Utọ ado ibaaha!

²³ Se ñkebọ ke ubọk Abọọñ ke ñkenyʌñ ñkpọñ inọ ndufo: Abọọñ Yisọs ke akoneyo e-eketappa anye, amaaben uyo,

²⁴ ndin ke ini anye amaakenọ ekọọm, anye abuuñ uyo ado ate, “Ikpọkidem mmi ado mi, a-anieeghe ndufo; inam ntom ma entoiyo miin.”

²⁵ Kpa ke ukem usʌñ ado, ke emaekedia ndidia ndubi ema, anye amaaben ukpək ate, “Ukpək ami ado ufa edioomo ke iyiib mmi; enam ami, ini ake adodo ndufo enwọññọ ami, ediintoiyo miin.”

²⁶ Sia ini ake adodo a-ndufo etaaha uyo ami enyʌñ enwọñ kọọb ami, ndufo emesian ñkpa Abọọñ tutu anye atịmme adi.

²⁷ Ke ntodo, awo ake adodo a-ataaha uyo ami, me anyʌñ añwọñ ukpək Abọọñ ke usʌñ a-mmiidotto anam idiọọk ñkpọ abaña ikpọkidem ye iyiib Abọọñ.

²⁸ Awo ana aduunọ idem amọ ase ndin anye ata uyo ado anyʌñ anwọñ ukpək ado.

²⁹ Sia awo a-adiaaha a-nyʌññọ anwọñ ke ini anye miikiduuñọke ikpọkidem Abọọñ adia anyʌñ añwọñ ubiom ikpe anọ idem amọ.

³⁰ Anye ntak uwak ndufo ekoppo mmemidem enyʌññọ edọñọ, usʌk ndufo enyʌñ edaiya.

³¹ Ado adieke ñnyịn ikpiduuñọke idem ñnyịn ise ñnyịn ikpibaaha ke ubiomikpe.

³² Ke ini Abọọñ akpeeghe ikpe inọ ñnyịn, ñnyịn ibọ ntʌnọ mbaak ñnyịn ididiana ye mbon ederimbod isobo.

³³ Ke ntodo, nditọete mmi, emaediboho itie keed adidia ndidia, ida ibet emọ-emọ.

³⁴ Adieke abiọñ adọññọ awo ndomokeed, yak anye adia ñkpọ ke ufọk, mbaak ndufo emaesoobo adido ke ubiomikpe. Ndin mmaatịmme ndi, ñyaamaana nnọ mme item mfen.