1 Kọrint 10 - Ñwed Abasi Ke Ikọ Ibibio Ayo Mfịn

Ndʌdutọñ a-atooho mbʌk nditọ Isred

¹ Sia ami mmeñyemme ndufo, nditọete, enana ifiọk ebaña ete mme eteete ñnyịn ekeba ke idak ntọñanyọñ ndin ke ammọ ñko emaesaña eboiyo ke akpa inyañ.

² Ekeduọk afịd ammọ mmọọñ esịn ke idak adudu Moses ke ini ntọñanyọñ akekannake ammọ akʌk, ammọ enyʌñ esaña ke inyañ.

³ Afịd ammọ ekedia ukem ndidia sịbidịd,

⁴ enyʌñ enwọñ ukem ñkpọ sịbidịd a-akesañake ye ammọ; itiad ado akedo Krais.

⁵ Kpa ye ado, Abasi ikinemme esịd ye uwak ammọ, emaesuan akpo ammọ ke akpautatan.

⁶ Mme ñkpọ ami eketịppe nọ ato do ado ukpeebñkpọ inọ ñnyịn itre adisịn esịd ñnyịn ke idiọọkñkpọ naña mbon ado ekenam.

⁷ Ikiido mbon ukpono ndem, naña ubaak ammọ ekedo; nte ewette, “Ammọ esuuk etie edia, eta, enwọñ enyʌñ ekeene ewana ke usọrọ mbon a-mmiidiọọñọke Abasi.”

⁸ Inaaha ñnyịn inam use kpa naña usʌk ammọ ekenam, a-akenamma ke usen keed tọsịn edịb ye ita ekpañña.

⁹ Inaaha ñnyịn idomo Krais ise, naña usʌk ammọ ekenam, ndin udʌkikọd amaakọñ ammọ awot.

¹⁰ Ikiinyʌñ idukuunọ, naña usʌk ammọ ekedukuunọ, ndin enyere nsobo amaasobo ammọ.

¹¹ Mme ñkpọ ami aketịppe anọ ammọ nte ukpeebñkpọ, enyʌñ ewet enịm nte ñkpọ ndʌdutọñ inọ ñnyịn mbon e-enieeghe idodanyen utịd ini iso.

¹² Adieke akereke ke imọ imisọọñọ ida, nekke da mbaak ududuọ!

¹³ Ibaaha idomo i-isịmme ndufo a-adooho akenam isịmme awo mfen. Abasi ado anam akpanikọ; anye idiiyakka ndufo enie idomo se ikpon ikan se ekeme adiyọ. Ado ke ini edʌkkọ idomo, anye ayaasio usʌñ nọ ato do ekan eyọ idomo ado.

Usọrọ ndem ye ndidia abọọñ

¹⁴ Ke ntak ado mme ufan, ifeghe ikpọñ ukpono ndem.

¹⁵ Ami ntañ ikọ nnọ mme adiọọñọ idem awo; duuñọ se ami ntañ se.

¹⁶ Nte ukpək ekọọm a-ñnyịn inọọhọ ekọọm idooho ewana ke iyiib Krais? Awuọ uyo a-ñnyịn ibuuñọ idooho ewana ke ikpọkidem Krais?

¹⁷ Sia idem uyo keed aba, ñnyịn ñko i-idooho uwak, ido idem keed, sia afịd ñnyịn iwuana ke uyo keed ado.

¹⁸ Kere baña mbon Isred. Nte mbon e-ediaaha ndidia uwa inieeghe ewana ke itie uwa?

¹⁹ Nte ami mbo ke uwa e-ewaaha enọ ndem awuọñọ ñkpọ ndomokeed, me ndem ado ñkpọ ndomokeed?

²⁰ Iyoo, ado uwa mme akpono ndem, ewa enọ ndiọi sịbidịd, iwaaha inọ Abasi, ndin ami ñyemme ndufo enie ewana ye ndiọi sịbidịd.

²¹ Ndufo ikemeke inwọñ ukpək Abasi ndian ye ake ndiọi sịbidịd ñko; ndufo ikemeke inie ewana ke akpokoro Abasi ye ke akpokoro ndiọi sịbidịd.

²² Ado nte eyem inam Abọọñ afịbe ufịb? Nte ñnyịn imikop uko ikan anye?

Ubọkọ mme andinịm ke akpanikọ

²³ Afo ate “Mmekeme adinam afịd ñkpọ,” ado idooho afịd ñkpọ anie ufọn. “Mmekeme adinam afịd ñkpọ,” ado idooho afịd ñkpọ awuọọñọ ñkpọ.

²⁴ Awo ndomokeed inaaha ayem ufọn idem amọ, ado ana ayem ufọn mbon mfen.

²⁵ Dia ñkpọ ake adodo e-enyamma ke udua; kuubiime mbịme ubaña.

²⁶ Sia, “Ekondo anie Abọọñ ye afịd ñkpọ se idọñọ ke esịd.”

²⁷ Adieke awo a-mmiinịmme Abasi ke akpanikọ ukoodo ndidia, dia ñkpọ ake adodo e-enịmme ke iso mfo, kuubịp mbịme a-aketuugho akikere esịd.

²⁸ Ado adieke awo abooho ate, “Ñkpọ ami ado ñkpọ uwa,” kuudia ke ntak awo u-udọkkọke fiin ye ke ntak akikere esịd.

²⁹ Ke ntak esịd awo ado, idooho ke ntak ake mfo. Ntak akikere esịd awo mfen akpebiireke ikpe abaña ubọkọ mmi-e?

³⁰ Adieke ñwanake ke ndidia ado ye esịd ekọọm, ntak a-ñkpenieeghe ubiomo ikpe ke ñkpọ a-nnọọhọ Abasi ekọọm-ọ?

³¹ Adieke afo adiaaha me ataaha, se afo ananam, nam afịd dịppe ubọọñ Abasi.

³² Kuunam nọ awo mfen aduọ, me Yuu, me Yentaid, me ufọkabasi,

³³ kpa naña ami ñnwana inam afịd awo ekop inemesịd ke afịd-afịd usʌñ. Sia ami ñyemme ufọn nnọ idem mmi, ado ñyem ufọn uwak awo, nọ ato do ammọ ebọ adinyaaña.