1 Bita 5 - Ñwed Abasi Ke Ikọ Ibibio Ayo Mfịn

E-enọọhọ esọk mbiowo ye mme mbed

¹ Ke abaña mme ñyobioawo e-ebaaha ke atu ndufo, ami nnam ebeeñe ami nte keed ke atu mme ñyobioawo, ntiense ndutʌkkọ Krais ye awo keed a-adiikeene iwuana ke ubọọñ e-ediiyaara.

² Edoñño mme akpemedọñ enọ atu edọñ Abasi abaaha ke idak ndufo, ise ammọ nte mme ete-utom, idooho nte inyeenyịk, ado ke unyịmme esịd ndufo naña Abasi ayem ndufo eba; idooho ke idiọọk itọñ akʌk, ado sia emenie udọñ adinam utom;

³ ekiinyʌñ ifịk mbon e-eyakka isịn ndufo ke ubọk, ado inịm idem nte uwọdñkpọ inọ atu edọñ.

⁴ Ndin ke ini Ekamba Akpemedọñ adiyaara idem, ndufo eyaebọ anyanya ubọọñ a-mmiidibiarake.

⁵ Kpasʌk ke ukem ado, ñkparawa, isuuk idem enọ mme mbiowo. Afịd ndufo inyʌñ esesịne nsuukidem ke idem inọ keed aken, sia, “Abasi abiọọñọ mme mbon ntañidem, ado anọ mbon e-esuuho idem mfọn.”

⁶ Isuuk idem ndin ke idak akpọsọñ ubọk Abasi ma anye ibenne ndufo anịm ke enyọñ ke ekem ini.

⁷ Etop afịd mfịna a-atịmekede ndufo esịd idot ke anye, sia anye asʌk akere ñkpọ ibaña ndufo.

⁸ Inie mfadidem, inyʌñ ikpeme. Asua ndufo, setan ayoyo nte ekpe akuun ayem awo se anye ata.

⁹ Esọọñọ eda ke mbuọdidem inwana ye anye, sia emediọọñọ ke ubon mme andinịm ke akpanikọ ke afịd ekondo esʌk ebọ ukem ndutʌkkọ ami.

¹⁰ Ndin Abasi afịd mfọn a-akikoodo ndufo ate edidʌk ke nsi-nsi ubọọñ amọ ke Krais, ke ini ndufo emaekekịt ukuud ke etək ini, ayaamaana idʌt ndufo adat anyʌñ anam enie adudu, nsọọñọnda ye ñkaiso.

¹¹ Yak adudu anie anye ke nsi-nsi nsi-nsi, Amen.

Akpatre ekọọm

¹² Ñke unwam Saidas, a-ndatta nte anam akpanikọ ayịneka, mmewed imʌk-imʌk ñwed ami nnọ isọk ndufo, adisọọñọ ndufo ukod, ñnyʌñ inọ ndufo ntiense mmi nte ke ami ado ata mfọn Abasi. Esọọñọ eda ke ado.

¹³ Andiba ke Babidọn, e-ekemekke ye ndufo anọ ekọọm, ye Maak ayịn mmi anyʌñ anọ ekọm.

¹⁴ Ekọọm emọ-emọ ke utʌm inua ake ima. Emem anie afịd ndufo e-ebaaha ke Krais.