1 Bita 4 - Ñwed Abasi Ke Ikọ Ibibio Ayo Mfịn

Adidu uwem nnọọ Abasi

¹ Sia Krais akekịtte ukuud ke abʌkidem, ndufo ñko ekama ukem akikere ami esịne nte ñkpọekọñ, sia awo a-akịtte ukuud ke abʌkidem a-akweeñe mme idiọọkñkpọ.

² Ke ntodo, anye idatta ini a-asʌhọke anọọ anye ke ederimbod idu uwem ke idiọọk itọñ esịd abʌkidem, ado asana akeene naña uduak Abasi ado.

³ Sia ndufo emebiad umiañ ini ke edem e-enam se mbon ammiinịmme Abasi ke akpanikọ emek adinam, adidʌñ ndukpo ukpono ndem, use, idiọọk itọñ abʌkidem, ukpa mmịn mme adinam abʌd-abʌd ido.

⁴ Ndin idem akpa ammọ sia ndufo mmiinyịmmeke aba isaña ye ammọ nnañña atịme uwem ado, ndin ammọ anyʌñ isueñ ndufo.

⁵ Ado ammọ eyaenọ Abasi a-abeeñeke idem adikpe ikpe mme adu uwem ye mme akpañkpa ibọọrọ.

⁶ Sia ntak ado ke ekekwọrọ eti etob enọ mbon adooho ekpaña idahami, ma ekpe ikpe ammo nte mbon ekebaaha ke abʌkidem, ado ammọ edu uwem ekeene Abasi ke abaña sịbidịd.

⁷ Ado, utịd afịd ñkpọ asʌk akpere. Ke ntodo, ndufo enie eti iwuod, enyʌñ ifat idem, ma e-ekan ebọñ akam.

⁸ Akaakan afịd ñkpọ, enie ntọtəñọ ima ke ufọọd idem ndufo, sia ima afʌk uwak idiọọkñkpọ.

⁹ Idaara keed aken ke ufọk ndufo, ikiidukụụnọ.

¹⁰ Yak awo keed-a-keed adad enọ anye abọọhọ anam ñkpọ anọ keed aken, ke afịd esịd akpanikọ nte mme anie nsio-nsio mfọn Abasi.

¹¹ Awo akpeatañ ikọ, yak anye atañ nte atañ ata ikọ Abasi. Adieke awo anamma ñkpọ anọ emọ-emọ awo, yak anye anam ato ke adudu a-Abasi anọọhọ anye anam, nọ atoodo ke afịd ñkpọ etooro Abasi ato ke Yisọs Krais. Ubọọñ ye odudu enie anye ke nsi-nsi nsi-nsi, Amen.

Ufen ke adido awo Abasi

¹² Ndima mme ufan, ekiiyak idem ikpa ndufo ke ikañ-ikañ ufen a-asịmme ndufo, nte ebo ke asen ñkpọ atịppe inọọ ndufo.

¹³ Ado idaara naña ekeene ewana ke ndutʌkkọ Krais, ma idaara ndufo anekke akpon ke ini adiyaara ubọọñ amọ.

¹⁴ Ekpesọñ ndufo anyen ke ntak anyịñ Krais, afọfọn inọ ndufo, sia Sịbidịd ubọọñ ye Sịbidịd Abasi idoro ndufo ke idem.

¹⁵ Adieke abọọhọ ndutʌkkọ, yak akeedo nte awot awo, me nte inọ, me nte idiọọk awo, mme nte andisịn anyen ke ndubeghe awo mfen.

¹⁶ Ado adieke afo akịtte ndutʌkkọ nte awo Krais, kuukop abuud, ado tooro Abasi ke afo amekere anyịn ado.

¹⁷ Sia ini akem ikpe aditọọñọ ye ubon Abasi; ndin adieke atọọñọke ye ñnyịn, adiiba die ye mbon a-ammiinamma ikọ Abasi?

¹⁸ Ndin, “Adieke asọññọ adinyaaña nnen-nnen awo, adiiba die ye anana Abasi ye anam idiọọk ñkpọ.”

¹⁹ Ke ntodo, mbon e-ekịtte ndutʌkkọ akeene naña uduak Abasi ado akpena eyaak idem ammọ esịn ke ubọk Andibod ammọ esʌk ekaiso enam nti ñkpọ.