1 Bita 2 - Ñwed Abasi Ke Ikọ Ibibio Ayo Mfịn

¹ Ke ntodo, iduọọñọ afịd udu ye afịd ñkara, ye ndubịk ye ufịb, ye afịd idiọọk ibaaña;

² Nte nsek nditọ, iyem ata mmọọñeba Sịbidịd, ma ndufo edat anye ekọd esịm adinyaaña,

³ sia ndufo imaikitap idiọọñọ ibo ke Abọọñ afọn.

Aduuwem itiad ye mbon e-emekkemek

⁴ Daña ndufo ekeene anye, aduuwem Itiad, a-mme awo ekesịnne, ado a-Abasi akemekke, anyʌñ abat anye nte ñkpọuto,

⁵ eyaidat ndufo ñko nte mme aduuwem itiad, ebọppọ esịn ke ufọk ake Sịbidịd, enyʌñ enam ndufo edo mme ndisana aku, ediwa uwa Sịbidịd, a-Abasi adaarake abọ ato ke Yisọs Krais.

⁶ Sia ke Ikọ Abasi ebo: “Sese mmenịm itiad ke Sayọn, adimek ye nsọñudua itiad inuuk, ndin awo a-abuọttọ idem ye anye ididiaaha abuud ke nsi-nsi.”

⁷ Ndin ndufo e-enịmme, itiad ami ado nsọñudua. Ado amaado mbon ammiinịmme, “Itiad ami mme abọp ufọk ekesịnne a-akappa ado etubom inuuk,”

⁸ ye, “Itiad a-anamma nọ mme awo ye ekandịk ye itiad a-anamma mme awo eduọññọ.” Ammọ etuak ukod, sia ammọ mmiisuuhọ iwuod inọ ikọ Abasi; ado anyʌñ ado se ikinaa inọ ammọ.

⁹ Ado ndufo edoñño mbon e-mekkemek, edoñño mme aku edidem, edoñño adisana abio, edoñño mbon a-Abasi anịmme anọ idem amọ nọ ndufo eka eketañ mme ase amọ, anye a-akikoodo ndufo asio ke akịm asịn ke utịbe unwana amọ.

¹⁰ Ndufo, emmiikidooho mbon Abasi ke eyo ako, edido ikọd Abasi mfịn, e-mmikituaaha ndufo mbọm, ado mfịn, etua ndufo mbọm.

Adidu uwem awo Abasi ke atu mbon a-aminịmme ke akpanikọ

¹¹ Ndima mme ufan, mmibeeñe ndufo, nte mme isenawo ye mbon isañ ke ederimbod, nte yak ediañña idem ekpọñ idiọọk udọñ, a-anwanake ye ukpọñ ndufo.

¹² Edu eti uwem ke atu mbon a-amidiọọñọke Abasi, akpesʌk ado ammọ etañña ikọ ibiaad ndufo, ammọ eyaekịt nti ido ndufo enyʌñ enọ Abasi ubọọñ.

¹³ Isuuk idem ndufo ke ntak Abọọñ enọ afịd mme adaidaha e-enịmme ke atu awo; mme edidem, nte etubom mme andikara,

¹⁴ me mme mbọọñ mfen, e-esiooho edọñ ebo enọ mbon e-enamma idiọọk ufen enyʌñ etooro mme anam nti ñkpọ.

¹⁵ Sia ado uduak Abasi ate yak idat nti ido ikʌp inua mbon ndisịme, ammiidiọọñọke se ammọ etañ.

¹⁶ Edu uwem nte mbon e-enieeghe ubọkkọ ke idem ammọ ado ikiidat ubọkkọ ndufo ifʌk idiọọk ñkpọ, ado isaña nte mme anam utom Abasi.

¹⁷ Enọ afịd awo ukpono nte adotto ikpono afịd awo, ema ubon mme andinịm ke akpanikọ, ifeghe Abasi, ikpono adidem.

¹⁸ Ifʌn, esuuk iwuod enọ mme eteufọk ndufo ke ayọhọ ukpono Abasi, idooho mbon efọọnnọ ido enyʌññọ etua awo mbọm ikpọọñ, ado kpa ye mbon esọññọ ido ñko.

¹⁹ Sia ado ñkpọ itooro adieke awo abọọhọ ufen mme ndutʌkkọ anye miidotto ke ntak a-adooho anye adiọọñọke Abasi.

²⁰ Nso-o udod iba adieke ndufo ebọọhọ ntiim ato idiọọk ñkpọ ndufo enamma edime ime? Ado adieke ndufo emeeghe ime ke ini ekịtte ụkụd ke anamma nti ñkpọ, ami ado se inem Abasi esịd.

²¹ Ekikood ndufo ebo adinam ado; sia Krais ke Idem amọ amaakịt ufen ke ntak ndufo, anyʌñ akpọñ uwọt ñkpọ inọ ndufo, ate ndufo esañake nde ikpad Imọ.

²² “Anye ikinamma idiọọkñkpọ nte keed, ndin nsu nte keed ikibaaha ke inua amọ”

²³ Ke ini ammọ ekesueeñe anye, anye ikisueeñe ammọ usieene; ke ini anye abọhọ ufen, anye ikitañña ikọ ndịkke. Utu ke ado, anye ayaak Idem amọ anọ Akpe unen ikpe.

²⁴ Anye ke idem amọ amaabiom mme idiọọkñkpọ ñnyịn ke ikpọkidem amọ ke eto, nọ ñnyịn ikpa ikpọñ idiọọkñkpọ inyʌñ idu uwem inọ adinenido; ato ke unan amọ udọñọ akweeñe ndufo

²⁵ Sia ndufo ekesaña eduyo nte edọñ ewuọọñọke ekpọñ usʌñ; ado idahami emetịmme e-enyọñ ekeene Andibọọk ye Andikpeme ukpọñ ndufo.