Yelsom 2 - mzwDBL

Hanfale la

¹ N do kɛŋɔ kpɔɡa fee aa lɔ Sarɔn harɛ waa chɔa kaa ta, dɛ do kɛŋɔ kpɔɡa fee aa lɔ nenabɔɔ bini.

Sɛno baa la

² Gɛ kpɔɡ fee aa wera dɛ do sɔɔhne baah la, ɡɛɛ haah maa dɛ nyinu do toli bini.

Hanfale la

³ Gɛ apol daa aa lɔ kɔr bini, dɛɛ nɔnɛ nɔndɛɛɡa la, ɡɛɛ baa maa dɛ nyinu do wer bonɔɔna bini. N sie lɛo kɛ ń so o chunchule lɔɡa, o nɔna som n nyoa bini.

⁴ O laɡ mɛ ba bela waa di kondikonjena dɛɛ lɛ o sie, dɛ baɡle o nyina waa dɔa tɛ mɛ.

⁵ Tɛ mɛ bokpeɡa ne bosɔɔhna, he daa nɔna aa hola ne apolre dɛ do som, dɛkalkɛ he nyina waa ɡboo lɔ n liire bini.

⁶ N kpɔ nyu dawɛ o nɔŋɡal ta, o nɔndiɡ ɡbaa mɛ pɛl o te.

⁷ Jerusalam haahna, n dɛ ŋɔ he be ŋɔ, hé ŋwɛɛ komɛlbwa sɔn ta baɡ mɛ kɛŋɔ, haa n ne n sɛnodɛɛɡe baahnee chɔɡ. He bɛ ya nyina chɔɡ, ka tel kɛŋɔ ya nyina aa tona.

Yel nɛɛte Hanfale la

⁸ N dɛ no n sɛno taa. O tuo le bwejena dor warane, dɛ chwa kpɔ deŋɡarere dor dɛɛ ba n be.

⁹ N sɛnodɛɛɡe ɡbaŋre kɛŋɔ chwae kɛɛ kweɡlibale, onee ka cheɡa pɛl danjwɛɛ dɛɛ nyiŋi tokorore ta la.

¹⁰ Baa maa dɛ nyinu ŋɔ n be ŋɔ, “Ir che, n sɛno, n sɛnodɛɛɡe, ásɛ n ne he kaa.

¹¹ Nyiŋi na, waa saŋ baa kaa, bwaala ɡe toole.

¹² Kpɔɡa dɛ fe harɛ ta bobɛlbwa, yela ɡoe saŋ telo name, asɛ bilore ɛɛ si harɛ ta bobɛlbwa.

¹³ Fiɡ daa nɔna pa mun dɛɛ ɛ bie, daa fee sɔɔh tɔ bobɛlbwa. Ir che n sɛno, ir ba n sɛnodɛɛɡe, ásɛ n ne he kaa.”

Sɛno baa la

¹⁴ He do kɛ bilo waa kaa sɔh bwebɔɔ bini. N dɛ nyin he wer haa doa la dɛ na, ɡel ń no he taa waa soma la.

¹⁵ Lawɛ kalampoŋare aa do jeɡre la mɔɔ á chɔɡ ya daa kooni aa dɛ ba fee la.

Hanfale la

¹⁶ Menee dɔ n sɛnodɛɛɡe, asɛ o ɡee dɔɔ mɛ. O ɡbo peeraa dɛɛ di kpɔɡa aa dɛ fe la bini.

¹⁷ Laa berɛ ba, n sɛnodɛɛɡe, ka tel kɛ bɔr aa chaahna biro bɛlbwa aa wola toole kpa, dɛɛ chwa kɛŋɔ chwae kɛɛ kweɡlibale, waa lɔ Bɛtɛr Bwejena dor.