Yela 63 - mzwDBL

Korowii nyina ɡwaa mkpa

Kooro Devid yel

¹ N Naa Korowii maa dɛ tomɛ, n pɛla dɔe sibeɡra ne, n bambile lawɛ kɛ nyɔɡre aa dɛ kpo nɛn, wɛɛ nyin nee dɛ nyɔ, pua hɛŋle ɡbo harɛ ta, bela nee aa wola toole.

² N na ɡɛ he kpeɡri ne he jirima aa doa, he Dea bela.

³ He nyina aa wola jaɡa dɔe bwa la toole naa, nɛn toole wobɛlbwa bini, anomanta, mɛɛ kpɛɛree.

⁴ Mɛɛ kpɛɛree n soɡa bini bwa, mɛɛ ɡɔɔ n nɔɔraa nyundua, dɛ́ kpɔ n wesoŋa bil he sie.

⁵ N sie ɛɛ lɛo kɛ maa di silɛɛ kondikonjena dɛ vaɡɛ ken, dɛ́ ɡo silɛɛ yela kpɛɛ he sɔn.

⁶ N chɔ kalaŋ ta naa, n dɛ lii he wa, he waa dɛ do n bambile bini jwaana bwa,

⁷ dɛkalkɛŋɔ henee dɛɛ cha mɛ, he lɔɡaa n chwa baa sɔh, kɛŋɔ jal yon lawɛ o bii do lɔɡa la, mɛɛ ɡo silɛɛ yela.

⁸ Mɛɛ lawɛɛ kpoŋe kiŋkiŋ, ásɛ he tɔ n nɛɛ he kpeɡri ne.

⁹ Nɛra baa dɛ nyin n kpoe, ɛɛ serewoo kaa lalabwɛ.

¹⁰ Baa kpo ba laa taa, ásɛ kalampoŋare di ba ola.

¹¹ Korowii aa ɡela kooro pɔ o dɔma nɛɛ nomanta, o sie ɛɛ lɛo. Nɛra baa dɛ yerɛ Korowii sɔn bwa ɛɛ kpɛɛroo, kɛ nyosonteŋna te, wɛɛ tɔ ba nyoo.