Yela 103 - mzwDBL

Korowii nyina wa

Kooro Devid yel

¹ N dɛ kpɛɛ Korowii n bambile bwa ne! N kpɔ n bwadabii bwa dɛɛ kpɛɛ o sɔn waa do ɡoroŋ la!

² N dɛ kpɛɛ Korowii n bambile bwa ne, maa o wedɛɛɡa la waa soh.

³ O kpɔ n wechɔɡa bwa dɛɛ kɛ mɛ, dɛɛ chah n weela ɡe bwa.

⁴ O lɛɛ mɛ dɛɛ le seo nyoa, dɛɛ swee mɛ andɛɛɡa o nyina ne tedoma waa dɔa tɛ mɛ ne.

⁵ O dɛ tɛ mɛ n konnyina n soɡa bini bwa, a ɡel n berɛ bonɔɔ dɛ do kpeɡri kɛŋɔ kee ken.

⁶ Korowii bol nɛra baa dɛ fiɡ ba waa dɛɛ tɛɛ ba, dɛ ɡel baa dɔ waa aa chɛ kɛŋɔ bá dɔ.

⁷ O kpɔ o waa baɡle Mosis, dɛ ɡel Israel tena na o wejena waa dɛ ɛ.

⁸ Nɛra waa dɛ domɛ Korowii tea wɛɛ sune ba nɛ, o baah aa di warawara, o nyina ɡe ta jaɡa dɔe bwa.

⁹ Waa teŋɛ dɛɛ pwah yaa, o baah diu waa, o dɛ sɔɔh warane.

¹⁰ Waa ya deŋne tɛr ɡɛ aa chɛa, kɛɛ dɛɛ bɔ yaa ya wechɔɡa kem.

¹¹ Gɛ harɛ ne nyundua baah aa do jaŋa la, ɡɛɛ o nyina do kan nɛra baa dɛ ɔmɔ la nɛ.

¹² Gɛ wee leebɔr ne wee cholibɔr baah aa jaŋa la, ɡɛɛ ya ne wechɔɡa waa laa kpɔ ya nɛɛ la baah do jaŋne.

¹³ Gɛ mɛɛ yon dɔ tedoma o bii nɛɛ la, ɡɛɛ Korowii tea ɛɛ domɔ nɛra baa dɛ ɔmɔ nɛ,

¹⁴ dɛkalkɛ o jemɛ ɡɛ yaa doa, o dɛ lii kɛŋɔ teera nee o ma yaa.

¹⁵ Kɛ nɛwɛnyina bwa do kɛ kpɔɡa, ba mkpa ɡe do kɛŋɔ kpɔɡa fee, kpɔɡa dɛ sewɛ a fee ɡe ɛɛ lee,

¹⁶ kɛ dɛ peu tao waa, a bwa dɛ hol o kaa a ne, bɛlbwa aa an na kpa.

¹⁷ Nɛra baa dɛ ɔmɛ Korowii la te, o nyina lɔ ba nɛɛ saŋ bɛlbwa dɛɛ la, asɛ dɛɛ ɛ ba bii ne ba naanar andɛɛɡa saŋ bɛlbwa dɛɛ la.

¹⁸ Banee nɛra baa dɛ teŋɛ fɔo o ne baa fɔwa ta, dɛ lii dɛɛ teŋɛ o Mmarare ta kasinteŋ ne la.

¹⁹ Korowii kpɔ o kookara cheɡ nyundua, dɛɛ di kora harɛ nɔ nɛra bwa nɛ.

²⁰ Nyundua toroma haa kana dɛ do kpeɡri, heyaa dɛɛ teŋɛ o Mmarare ta, hé kpɛɛ Korowii.

²¹ Korowii dɔm haa wara dɛ do o be nyundua, hé kpɛɛro.

²² Korowii kontaala bwa, hé kpɛɛro bela bwa waa dɛ di kora. N dɛ kpɛɛ Korowii n bambile bwa ne.