Wiile 3 - mzwDBL

Deŋnetɛra ne liire chara dɛ hwɛɡa dɔe wa

¹ Menee nɛn maa na wenaale kohona dɛ le Korowii bandia ta.

² O doŋ mɛ le o sie mɛɛ valɛ biro bini, ɡwaa kɛ n fe aa lɔ bɔchaah ta,

³ kasinteŋ, o teŋɔ dɛɛ lɔɔ mɛ waa wola ɡel tɔpebir bwa, o ta n nɛɛ sune.

⁴ O ɡelɔ n ɡwaŋɛ, n ta bwadabii dɔe kpa, dɛ kuuɡi n hoɡa.

⁵ O ɡelɔ suna dii ne wahala nae bar mɛ cheme, kɛŋɔ baa laɡ mɛ do dea ken.

⁶ O ɡelɔ n do biro ta kɛŋɔ nɛra baa serewa biɡri la ken.

⁷ O vɔɡ mɛ jɔɡrɔre ne, n do kɛŋɔ nɛn baa lawɔ do dea, n ta hwɛɡa bɛlbwa dɔe dɛ́ won lɛ n te.

⁸ Hale n kpɔ takpeɡ yerɛ dɛ soŋe Korowii ŋɔ ó cha mɛ kwaraa naa, waa n be no.

⁹ O kpɔ bwea tɔ mɛ bɔr, a ɡel n ŋwɛnɛre ɡole.

¹⁰ O sɔh kpɔɡ bini kɛŋɔ sisire, kɛɛ nyujente dɛɛ nyin mɛ dɛ́ lawɛ.

¹¹ O tuɡ mɛ le ŋwɛnɛ ta, dɛ peeɡe n ola, dɛ ɡel mɛ n ɡbo chɔ.

¹² O laa o to kpɔ, dɛ kpɔ o hɛma pa n nɛ, dɛɛ ta.

¹³ O ta o hɛma la a jooɡe n bwadabii bini.

¹⁴ A cheɡɛ a ta n nɛra kpɔ mɛ berɛ akwekwe nɛn, tɔpebir bwaa n mama ber ba yela baa ɡo.

¹⁵ Waa aa do kpeli ɡboo o kpɔ tɛ mɛ. A ɛɛ mɛ kondikwaa ne nee mɛɛ nyɔ.

¹⁶ O ɡelɔ n chole bwea kuuɡi n nyena, n chɔ bomboɡ ta.

¹⁷ N ta deŋnesɔɔhna bɛlbwa dɔe, dɛ soh ɡɛ silɛɛ kwara aa doa.

¹⁸ N hwɛɡa bwa tonɛ Korowii nɛ, n jemɔ kɛ aa biɡri n sewɛ.

¹⁹ N lii n wenaale ne ɡaaɡa maa dɛ ɡaaɡe aa, a do kɛŋɔ maa di tɛɡkpela ken.

²⁰ N dɛ lii a waa kɛrɛdɛ, asɛ n wee chwa le n bini.

²¹ Kɛ webeŋkpoŋ bɛlee n yon lii, ásɛ dɛ berɛ dɔ hwɛɡa.

²² Korowii nyina kohona aa wola tonɛ bwa, ne o tedoma nomanta, ya ta soɡe le, waa yaa ɡel bwa.

²³ Chɔɔ bɛlbwaa aa beɡre anfala. N Naa Korowii, he ɡbo waa dɔ kasinteŋ.

²⁴ Korowiirii n komɛlbwa, n hwɛɡa bwa lɔ o nɛ.

²⁵ Korowii wer tɛ nɛra baa dɛ hwɛɡɛ o nɛ, dɛɛ nyinu bambile bwa ne,

²⁶ anomanta, a wer kɛŋɔ nɛn lawɛ bambile dɛɛ kpa lɛɛ waa ba lɛ nɛra la.

²⁷ A chɛ kɛ nɛn hweli ɡɛ bambile nɔ lawa le o bonɔɔne kɛɛ toli saŋ.

²⁸ Gɛ nɛn la ɡbo so jeih dɛ́ kpɔ liire, dɛkalkɛ Korowiirii ɡela a ba o nɛ.

²⁹ Naate kpɔ nyoa teɡɛ harɛ, á baɡle kɛ o sɛh chɔɡre, hwɛɡa ane ken ta lole.

³⁰ Ó sɛh chɛɡa ne sihiih, dɛ lɔɔra bɛlbwa.

³¹ Korowii dɛ sune nɛra nɛ, waa won den vɛɛh ba ka tonɛ.

³² A lole kɛŋɔ wɛɛ ba suna dii nee, kɛ wɛɛ berɔ dɔ tedoma, o nyina aa wola jaɡa dɔe kan kohona.

³³ O sie aa lɛ kɛŋɔ ó kpɔ wenaale kɛɛ suna dii ba ta nɛn nɛ.

³⁴ Nɛra tiɡri nɛra baa laɡ ba do dea do harɛ,

³⁵ dɛ tɔ ba waa baa dɔa kɛ ba ɛ ŋwɛnɛ Nemenɛ Korowii sie,

³⁶ dɛ ba berɛ nɛn waa sie kɔɔto aa, amɔ Korowii aa a ɡɛ waa nɔ bwaa na naa?

³⁷ Umee dɛ́ bol waa aa won chiɡ, dɛ Korowii laa sɛah kɛ a chiɡo?

³⁸ Nemenɛ Korowii nyoa laa wechɔɡa ne wedɛɛɡa bwa do aa?

³⁹ Ɛrɛɛ nɛn ta soɡe le dɛ dɔ deŋnetɛra o wechɔɡa wa aa, wɛɛ naɡre waɔ?

⁴⁰ Hé ɡel ya nyiŋi ya we-ɛɛla bini na, dɛ́ charɛ ya liire, dɛ́ berɛ ba Korowii be.

⁴¹ Hé ɡel ya pili ya bambili dɛ́ ir nɔɔra soŋe Korowii waa dɛ di kora nyundua ŋɔ,

⁴² “N Naa Korowii, ya ɛ wechɔɡa dɛ ɛɛ deŋnekpeɡ, he ta ya wechɔɡa kpɔe kɛ yaa.

⁴³ He bandia kohona ɡelɔ he ti yaa, dɛ kpoo yaa haa wola ya nɛɛ sune.

⁴⁴ He kpɔ bandia bɔle he te kɛŋɔ bam, ásɛ ya wesoŋa bɛ won tel he be.

⁴⁵ He ɡelɔ ya do kɛŋɔ puldoa haahra harɛre nɛra be.

⁴⁶ Asɛ ya dɔma bwa pili nyoo bol waa dɛɛ yaɡɛ yaa.

⁴⁷ Ya na ɔmewaa kohona, ba harɛ yaa nafuɡere, ba lawɛ yaa dɛ kpoo yaa.

⁴⁸ Siniire dɛ yɔɔ mɛ kɛŋɔ nenapale, kpoora baa kpoo n nɛra la wa.

⁴⁹ N siniire ɛɛ yɔɔ mɛɛ aa wola tonɛ bwa,

⁵⁰ ka tel kɛŋɔ Korowii ɡbaɡba aa le nyundua dɛ na.

⁵¹ N nyiŋi waa aa pu haahna bwa baa lɔ bwɛjen Jerusalam la aa, dɛ n bambile chɔɡɔ.

⁵² N dɔma hah mɛ pɛɛpɛɛ dɛɛ kpaah mɛ kɛŋɔ jumbie ken.

⁵³ Ba lawɛ n ne n siwi ta kɔlɔŋ bini, dɛ foɡ mɛ bwea, dɛ́ fee kpo mɛ.

⁵⁴ Ate, nee ba bɔle n nɛ, asɛ n lii ŋɔ n sewɔ tonɛ.

⁵⁵ N Naa Korowii, n wio noe le kɔlɔŋ la bini ŋɔ hé cha mɛ.

⁵⁶ He no n waa maa kpɔa bil he sie. Bɛ deŋna tɔɔɡe, no n wii, dɛ́ ba cha mɛ.

⁵⁷ He no n wesoŋa la, dɛ ŋɔ n be ŋɔ n bɛ ɔmɛ.

⁵⁸ N Naa Korowii, he baa che n habɔɔ dɛ lɛɛ mɛ.

⁵⁹ N Naa Korowii, he ɡbabir na wechɔɡa baa kpɔa ɛɛ mɛ. Ba bol n waa tɛ mɛ.

⁶⁰ He ɡbabir na ɡɛ n dɔma aa hah mɛ, ne ɡɛ baa dɛ vɔrɔwe n vɔrɔwa.

⁶¹ N Naa Korowii, he no chɛɡa baa dɛ chɛɡ mɛ, dɛ jemɛ n vɔrɔwa baa dɛ vɔrɔwe bwa ɡe.

⁶² Tɔpebir bwaa baa bol n wa, dɛɛ vɔrɔwe n vɔrɔwa.

⁶³ Ba kpɔ n waa berɛ yela dɛɛ ɡo chɔɔ ne jwaana bwa.

⁶⁴ N Naa Korowii, tɛr ba deŋne ɡɛ aa chɛa, ba waa baa ɛa la wa.

⁶⁵ Bɛ ɡel ba dɔ hwɛɡa bɛlbwa, ásɛ he nyotaahna do ba nɛ.

⁶⁶ Kpɔ bandia ti ba, dɛ́ chɔɡ ba le harɛ nɔ ta kwaraa!”