Wepila 18 - mzwDBL

Babelɔn paɡra wa

¹ A habɔɔ la, n na nyundua torome bɛl o le nyundua dɛɛ tu. O dɔ kpeɡri kɛrɛdɛ. O jirima nomanta, harɛ bwa chaahnɔ.

² O nyɛɡɔ kohona ŋɔ, “O paɡrɔ oo, o paɡrɔ! Babelɔnjen la paɡrɔ, dɛ berɛ kwaa aa dɛ ir nɛra nɛɛ ne Bɔnsam kwaa te bɛlbwa ne jumbisale baa kia la dobɔr,

³ dɛkalkɛŋɔ o ɡelɔ harɛ ta nɛra bwa wedoŋa ne ba pɛlchɔɡa dɛɛ ba kɛŋɔ sen, asɛ ba waa fuh Korowii baah. Harɛ nɔ ta koranar ne o bɔ jwamane. O kondɔɔh kwaa nyina kohona nomanta, harɛ nɔ ta bonadiire cheɡɛ o nɛɛ dɛ dɛɡ.”

⁴ N berɔ no taa bɛl o le nyundua dɛ ŋɔ, “N nɛra, hé le o be. Maa nyin kɛ he ne o pɛ dɛ́ɛ ɛ wechɔɡa, dɛ́ pɛ na wahala maa dɛ ba ɡela o na la.

⁵ O wechɔɡa daŋɔ tel Korowii doa, Korowii kpaŋro bil.

⁶ O chɔɡra, hé ɛo ɡɛ o fa aa ɛa la. Hé bɔɔ o tonchɔɡa la kem kera anɛ. Sen la o yon ɛ tɛ nɛra bá nyɔ dɛ́ɛ dɛɛ la, hé ɡe ɛ ane tɛo á do kpeɡri ɡwaa ɡɛ kera anɛ ó ɡe nyɔ.

⁷ Gɛ o fa aa kpɔ o te ɛ nɛnjen dɛɛ di o nyu ɡa la, hé ɡel o na hɔhɔrɔwa dɛ́ di suna ɡe kɛrɛdɛ. O dɛ lii o nyu bini ŋɔ onee haŋkooro, o jaa ta sewɛ, o tea bini aa chɔɡ bwa.

⁸ Anomanta, tɔpebeŋkpoŋii wahala ne weela ne tebinichɔɡ ne lɔr ɛɛ ba o kpoe, ásɛ nii fuuh, dɛkalkɛŋɔ N Naa Korowii waa dɛ ba o waa bola dɛ́ pa bole laanee dɔ kpeɡri bwa.”

⁹ Harɛ nɔ ta koranar ba ne waa dɛ bɔ jwamane dɛɛ di ba bwara la, baa ba na o chuu kɛ o dɛ fuh la, baa wiu dɛ́ɛ dooɡe lɔŋɔre.

¹⁰ Baa che bojaŋee, dɛkalkɛŋɔ baa ɔmɛ o hɔhɔrɔwa waa dɛ na laanee dɛ́ɛ ŋɔ, “Akwe! Akwe! Bwɛjen Babelɔn la o tena fa aa dɛ di kpeɡri ɡa la, waa puu kerabeŋkpoŋ o paɡre.”

¹¹ Ásɛ harɛ nɔ ta bonadiire ɛɛ wiu dɛ́ɛ dooɡe lɔŋɔre, dɛkalkɛŋɔ nɛn toole dɛ́ yawɛ ba kwaa kpa.

¹² Nɛn toole dɛ́ yawɛ ba suuɡaswɛm, suuɡapoŋa, ne bwedɛɛɡa a yoɡ aa kpeɡa, ne yapondɛɛɡa bwa soo siwi, ne dasɔɔhsoma a yoɡ aa kpeɡa bwa soo siwi, ne kwaa baa kpɔ bala nyena ɛa, ne kwaa baa kpɔ dadɛɛɡa a yoɡ aa kpeɡa sɛah, ne anɔ la baa kpɔ ayaawa ne bune loɡa, ne anɔ la baa kpɔ bwedɛɛɡa ane soo siwi ɛa la,

¹³ ne konsɔɔhsoma bwa soo siwi, anɔ la baa dɛ fuh, ne anɔ la baa dɛ fɔɡle, ne sen, ne noo, ne mendɛɛɡa, ne mea, ne nae, ne peera, ne jaɡre, dɛ torɔɡore ba yon vɔwɛ pɛl la. Ba yoɡ nɛra ɡe kɛŋɔ kondɛɛra ken.

¹⁴ Bonadiire la ɛɛ bol bwɛjen Babelɔn la waa ŋɔ, “Kwaa a pɛla aa dɔe la le he nɔn ta. He kondikondɛɛɡa ne kondɛɛɡa fuoh. Haa an na kpa bwa.”

¹⁵ Banɔ la ba fa aa yoɡ a ɡɛ kwaa dɛ dɔ suuɡa a ta la ɛɛ che bojaŋee, dɛkalkɛŋɔ ba dɛ ɔmɛ hɔhɔrɔwa aa puu la, dɛɛ wiu dɛɛ dooɡe lɔŋɔre,

¹⁶ dɛɛ wi ŋɔ, “Akwe! Akwe! Waa pu bwɛjen la o nɛra fa aa dɛ do yapondɛɛɡa a sie aa swɛɛra, dɛ do ɡimeɡime ne answɛɛma peihpeih, dɛɛ do baŋa kwa, ne deŋna kwa, ne nɔnloɡa baa kpɔ suuɡaswɛm dɛ bwedɛɛɡa bwa soo siwi ɛa la,

¹⁷ dɛkalkɛŋɔ o kwaa waa dɔa ɡa la bwa fuoh dɔŋhwere beŋkpoŋ.” Ásɛ nɛra baa dɛ kah stiimaere, ne nɛra baa jo a bini dɛɛ la bobɛla, ne nɛra baa dɛ ɛ toma a bini, ne nɛra baa dɛ ɛ toma bwa soo siwi mpo ta che bojaŋ.

¹⁸ Baa na ɡɛ waa dɛ fuh, ásɛ chuu ɛɛ le la, baa kpɔ takpeɡ ŋɔ, “Jo bɛ le! Bwɛjen nɔ dɔŋ toole wɛɛ fuh ɡɛ la.”

¹⁹ Ba loo ɛɛ kuu, bá ɛ teera ta ba nyuune ta, dɛ́ɛ wiu dɛ́ɛ dooɡe lɔŋɔre, dɛ́ ŋɔ, “Akwe! Akwe! Waa pu bwɛjen kondɔɔh aa su o bwa, dɛ ɡel nɛra baa dɔ stiimaere do mpo ta berɛ dɔɔhna la. O paŋɛ komɛlbwa dɔŋhwere beŋkpoŋ.

²⁰ Korowii doa tena ne Korowii nɛra he wa aa toɡra, ne Yeesu toroma, dɛ Korowii keamere, hé ɡel he sie lɛ a wa, dɛkalkɛ Korowii tɛr o deŋne wechɔɡa waa kpɔa ɛ heyaa la wa.”

²¹ Belaa nyundua torome bokpeɡa te bɛl ɡɔɔ bwe bɛl waa do kan kɛŋɔ nambwejen, dɛ kpɔ ta mpo ta, dɛ ŋɔ, “Kenii baa ba bwɛjen Babelɔn la kpɔe dɛ́ ta kpeɡri nɛɛ baa wola on na kpa bwa.

²² Baa nɛra baa dɛ lɔ janjela, ne banɔ la baa dɛ hoh kalipere ne bɛle, ne komɛlbwaa na he bini kpa. Gɛɛ baa wola nɛra baa dɛ sɛh kwa, ne nɛra baa dɛ sɔh kwa, ne banɔ la baa jemɛ toma bwa soo siwi he binii na kpa. Baa nambwe ɡe sii no bela kpa.

²³ Kandea bɛlbwa aa belaa chaah kpa. Baa hanfala ne ba jaranar taa no bela bwa. He bonadiire ɛ nɛnjena ba dɔŋa aa wola toole harɛ nɔ ta bobɛlbwa. He wono berɛ harɛ nɔ ta nɛra bwa liire, ba nyoɡre kɛŋɔ baa kpɔ tɛɡchɔɡa dɛɛ berɛ nɛn liire la.

²⁴ Korowii keamere ne o nɛra ba wa aa toɡra, ne nɛra baa kpoo ba harɛ nɔ ta bwa la, ba chalee bá na bwɛɛ la ta la.”