Sɛɡla 29 - mzwDBL

¹ Dɛ he dɛ ɛ lwɛmkpeɡ saŋ bɛlbwa ba kaeh kahonaa, he ne ba jara la, dɛ he dɔ wa, haa a nyoa tɛɛɡaa dɔ.

² Nɛndɛɛɡa baa di kora aa, nomɛlbwa sie dɛ lɛ, dɛ nɛnchɔɡa ɡe baa di aa, nomɛlbwa dɛ hime.

³ Nomɛlbwa waa dɛ nyin wejema la, o mɛɛ sie dɛ lɛ, kɛ nɛn o ne haahna baa dɛ bɔ jwamane nyoa aa pɛa la, dɛ he o kondɔɔh.

⁴ Kooro waa dɛ di kasinteŋ la, o ɡelɔ harɛ la wobɛlbwa ɛɛ maɡre, kɛ onɔ la o sie aa dɛ lɛ kɛ baa yawɔ sen te dɛ paɡre harɛ.

⁵ Nɛn waa dɛ pa o dɔŋ la, dɛ́ harɔ bel.

⁶ Nɛnchɔɡe bɛlbwa wechɔɡaa dɛɛ lawɔ, kɛ nɛn o wa aa toɡra te, silɛɛ ne hɛɡraa o bwa.

⁷ Nɛn o wa aa toɡra la jemɛ waa aa wera tɛ nyaa, kɛ nɛnchɔɡe te waane laa o wa.

⁸ Wejeremee won waa larawa, kɛ bammuɡli nɛn te won waa ne bwɛjen ta bala.

⁹ Dɛ wejereme kpɔ ɡɛne la kɔɔto aa, ɡɛne la dɛ mamɛ dɛ́ do ɡbɔɡa, dɛ́ ba chɛɡa ne.

¹⁰ Nɛra baa dɛ kpo nɛra hah nɛn o wa aa dɔ kasinteŋ, dɛɛ nyin nɛra ba wa aa toɡra dɛ́ kpo.

¹¹ Gɛnee dɛɛ baɡle o bandia nɛra baah ta, wejeremee dɔ bambile dɛ won o te lawa.

¹² Kooro waa dɛ do deŋna nyosone waa ta la, o nomonome bwa dɛ ɛ wechɔɡa.

¹³ Nɛn waa nyaa ne nɛn waa dɛ fiiɡi nyaa la te bwa beŋkpoŋ, Korowiirii tɛ bɛlbwa sie o kpɔ dɛɛ na wa.

¹⁴ Kooro waa bol nyaara waa dɛɛ tɛɛ ba aŋwɛnɛ ta la, o kora dɛ́ che dɛɛ biɡri.

¹⁵ Bechala deŋnetɛra wer dɛɛ tɛo wejema, kɛ he ta o nyu tɛo waa, o kpɔ sihiih dɛɛ kpo o nya.

¹⁶ Nɛnchɔɡa baa di kora aa, wechɔɡaa dɛɛ warɛ, nɛra ba wa aa toɡra ɛɛ so lee, dɛ́ na ba harɛ lɔe.

¹⁷ He do he bii kɛrɛdɛ naa, ba ɡelɔ hɛɛ dɔ deŋnesɔɔhna ne bambisɔɔhna.

¹⁸ Harɛ o nɛra aa wola Korowii waa kpɔe dawɛ ba nɛɛ la, bɛlbwa dɛ ɛ ɡɛ waa dɛ nyin, kɛ nɛra baa dɛ teŋɛ o Mmara ta la, ba na som.

¹⁹ Baa wobol ɡbo kpɔe dɛɛ do bonɔɔ, wɛɛ no a munii, kɛ o ken aa sie do.

²⁰ Hwɛɡa lɔ ɡɛne nɛ, dɛ ɡwaa nɛn waa dɛ bol waa waa wola lii mɔɔ.

²¹ He ɡbɛɡbɛ he bonɔɔ le o bechale saŋ aa, a habɔɔ o dɛ ba bambichɔɡ ne.

²² Nɛn o baah aa dɛ di warawara la, dɛ ba naɡra ne. Nɛn o baah aa dɛ di kohona dɛ ba wechɔɡa ne taeh.

²³ He dɛ maŋkura he te naa, harɛɛ hɛɛ lɔ, kɛ he pwɛr he te naa, he dɛ dɔ duure.

²⁴ He ne ŋwɛɛ dɛ bɔ aa, he ta he nyu, he bol kasinteŋ kɔɔto aa, ba dɛ tɛr he deŋne, he ta kasinteŋ bolɛ aa, Korowii dɛ taahne.

²⁵ Nɛwɛnyini ɔma do kɛŋɔ bel ken, nomɛlbwa waa dɛ yarada Korowii la, dɛ́ dɔ o nyu.

²⁶ Korowiirii dɛɛ pa bole aŋwɛnɛ ta, ɡwaa kɛŋɔ nɛra ɡalɡa aa dɛ nyin kɛ koranar nyin ba waa la.

²⁷ Gɛ nɛndɛɛɡe aa hah nɛn o wa aa wola kasinteŋ dɔe la, ɡɛɛ nɛnchɔɡe ɡe hah nɛn o wa aa toɡra.