Rut Tɔn 3 - mzwDBL

Rut jaa ɡaaɡa wa

¹ Awola bɛl, Naomi ŋɔ Rut be ŋɔ, “N bie, a chɛ kɛ ń nyin jaa tɛɛ ásɛ he ne ó so.

² Baa n liire aa lɔ o nɛɛ laanee Boas he ne o toli aa pɛa dɛɛ ɛ toma la, o ɛ ya lole. Fini jwaana nɔ ne o dɛ ba mea lɔe.

³ Anomanta, sɔ ne dɛ́ fɔɡle nosɔɔhsoma dɛ́ do he laaladɛɛɡa dɛ́ kaa bela. Bɛ ɡel o nae ka tel kɛŋɔ waa di kondikwaa dɛ nyɔ sen tonɛ mɔɔ.

⁴ Pese bela waa chɔ, ásɛ waa ba chɔ dom la, hé ka laa yal kpɔ o nakpale ta, dɛ́ chɔ o naa bɔr. Wɛɛ ŋɔ he bee ɡɛ haa ɛ.”

⁵ Asɛ Rut ŋɔ, “Mɛɛ ɛ wobɛlbwa haa bol n be nɔɔ.”

⁶ Anomanta, o la pɛla la ta jwaana la ne la, asɛ dɛ ka ɛ ɡɛ Naomi aa baɡlo la.

⁷ Boas aa di kondikwaa la dɛ nyɔ sen o sie lɛ la, o kaa chɔ mea baa boa a nyoa bil la jwɛh. Asɛ Rut ɛ bɔeeh dɛ ka laa yal kpɔ o nakpale ta dɛ chɔ bela.

⁸ Boas aa chɔa harambaŋa baah ta la, o jarɔ dɛ na kɛŋɔ haah chɔ o naa bɔr.

⁹ Anee o bɔɔ ŋɔ, “Umee nɔɔ?” Asɛ Rut chaŋe ŋɔ, “Menee he bitolo Rut. Haa ɛ n lole tenten nɔ, paɡri he yal la pera bɔle n nɛ.”

¹⁰ Asɛ Boas ŋɔ, “Korowii tɛɛ hɛɛra. He baɡle he nyina ɡwaa ɡɛ haa ɛa tɛ he helahaah la kwara. Bonɔɔna nɛɛ chɛ kɛ he fe ɛɛ pɛlɛ, hale ba dɔ suuɡa kɛɛ ba nyao. Kɛ he ta an ɡɛ ɛɛ.

¹¹ N bie, bɛ ɡel a hiaih. Mɛɛ ɛ wobɛlbwa haa dɛ nyinii tɛɛ, dɛkalkɛ nɛra baa lɔ bwɛɛ nɔ ta bwa jemɛ ɡɛ he wa aa do kaih.

¹² A ɛ kasinteŋ kɛŋɔ ya ɛ lolanar. Kɛ bɛl tɔ n sie mɔɔ n teŋɛ.

¹³ Chɔ n be bonɔ jwaana nɔ ne, ásɛ tɔɔ perɔ chɔɔ aa, ya na kɛŋɔ wɛɛ moe kɛɛ waa hen moɔ. O sɛoh ŋɔ wɛɛ kpɔe yaa, a fe wer kohona. Kɛ dɛ o ta sɛɛh yaa, n ŋwɛɛ Korowii waa lole saŋ bɛlbwa kɛŋɔ mɛɛ kpɔe. He te chɔ bonɔ ka tel kere chɔɔ.”

¹⁴ Anomanta, o chɔ o naa bɔr bela asɛ dɛ fel ir chɔmbibii bɛlbwa ta on nae, dɛkalkɛ Boas ŋɔ o be ŋɔ waa nyin kɛ nɛra jemɛ kɛŋɔ haah ba pɛla la ta.

¹⁵ Asɛ Boas ŋɔ o be ŋɔ, “Foo he batakaare ásɛ dɛ paɡru.” Waa paɡru la, asɛ o fuɡe mea dɛ ɛ kuruwa anue doo o kpɔ kaa dem.

¹⁶ Rut aa tel dem la, o helahaah bɔɔro ŋɔ, “Naomi ɛrɛɛ a ka chiɡ ɔ?” Asɛ Naomi baɡle waa baa la aa ɛa tɛo bwa.

¹⁷ O ŋɔ, “O tɛ mɛ mea nɔ ŋɔ ń kpɔ ba, dɛ ŋɔ a ta chɛɛ kɛŋɔ n valɛ nɔŋɡbala ba he be ɡɛ.”

¹⁸ Anee Naomi ŋɔ o be ŋɔ, “N bie, lawɛ bambile dɛ́ na ɡɛ aa ka chiɡ. Dɛ Boas ta waa nɔ sie nae fini naa, o ta ona dɔe.”