Nɛra Kura 27 - mzwDBL

Selofehad bihaahna

¹ Dɛ baa bɛl sɔne Selofehad, o mɛɛ sɔne Hɛfa. Hefa ɡe mɛɛ sɔne Gelead. Gelead ɡe mɛɛ sɔne Makir, Makir ɡe mɛɛ sɔne Manasɛ, Manasɛ ɡe mɛɛ sɔne Josef dɛ le Manasɛ dea. Selofehad dɔ bihaahna banue. Banee Maala ne Nowa ne Hoɡla, ne Milka dɛ Tirsa.

² Awola bɛl, haahna nɔ kpɔɔ ka bil Mosis ne sɔfo Eliasa ne Israel nomonome dɛ Israel tena la bwa sie, Korowii Dea Cheremibɔr doonyoa dɛ ŋɔ,

³ “Ya mɛɛ aa sewɛ pua hɛŋle ɡbo harɛ la ta la, o ta bibaala dɔe. O ta Kora ne o bala baa pɛ nyoa dɛ ɛ deŋnekpeɡ Korowii nɛɛ la bini jae. O wechɔɡa sewee o sewɛ.

⁴ Ɛrɛɛ waa ɡela ya mɛɛ sɔn he Israel tena bini nɔɔ? Waa wola bibaala dɔe waa kɛɛ? Tɛ yaa harɛ ɡɛ haa tɛ o lolanar baa le ya dea la, ásɛ ya mɛɛ sɔn bɛ he.”

⁵ Ate, Mosis kpɔ waa la ka bil Korowii sie,

⁶ asɛ Korowii ŋɔ o be ŋɔ,

⁷ “Waa Selofehad bihaahna aa bola la ɛ kasinteŋ. A chɛ kɛŋɔ hé tɛɛ ba harɛ la pera.

⁸ Ŋɔ Israel tena be ŋɔ, dɛ baa bɛlbwa sewɔ dɛ o ta bibaa dɔe yaa, bá kpɔ o harɛ tɛ o bihaah.

⁹ Dɛ o ta bihaah dɔe yaa, bá kpɔ harɛ la tɛ o nimanar.

¹⁰ O ta nimanar ɡe dɔe yaa, bá kpɔ tɛ o mɛɛ nimanar.

¹¹ O mɛɛ ta nimanar dɔe yaa, bá kpɔ tɛ o lole tenten ba dea la ta. Waa nɔɔ Korowii do Mosis a ɛ mmara dɛ chɔ le tɛ Israel tena.”

Josua chiɡ Mosis naa ta

¹² Awola bɛl, Korowii ŋɔ Mosis be ŋɔ, “Teeh kaa Abarim Bwejena dor, dɛ́ ka na harɛ maa kpɔa tɛ Israel tena.

¹³ Dɛ he kaa na harɛ la tonaa, he ɡee sewɔɔ ka ja he nɛra nɛɛ ɡɛ aa pu he dɔɔ Arɔn la.

¹⁴ He ne o bwaa fa vɛh n wa, he ta waa maa do heya a ta la ta teŋɛ dɛ yarada kpeɡri maa dɔa la.” Gɛ saŋee Israel tena la ɛ deŋnekpeɡ Mɛreba waa bɛne Kades dɛ do Sin pua hɛŋle ɡbo harɛ ta la.

¹⁵ Asɛ Mosis ŋɔ Korowii be ŋɔ,

¹⁶ “Korowii haa dɛ tɛ mkpa, mɔɔ haa kpo mɛ la, n poori le nɛn waa nyiŋi nɛra nɔ nɛ.

¹⁷ Naate waa kpɔ ba kaa dɛ berɛ ba ba ne, ásɛ he nɛra bɛ ɛ kɛŋɔ peera aa wola teɡre dɔe.”

¹⁸ Anee Korowii ŋɔ o be ŋɔ, “Kpɔ Nun bibaa Josua, onee N Doma so o nɛ. Kpɔ nɔn dawɛ o nɛɛ dɛ swee andɛɛɡa tɛo.

¹⁹ Kpɔɔ ka che sɔfo Eliasa ne nɛra la bwa sie, ásɛ dɛ kpɔ toma la do o nɔn ta.

²⁰ Tɛo kpeɡri haa dɔa la pera, ásɛ nɛra la bwa ɛɛ no o be.

²¹ Josua chɛ kɛŋɔ ó kpɔ o te dawɛ sɔfo Eliasa nɛ, dɛ́ che kwaa baa dɛ yera Urim ne Tumim ta, dɛ́ jemɛ waa men Korowii aa dɛ nyin kɛ wɛɛ ɛ. A ɡɛ taa sɔfo Eliasa ne Israel tena nɔ ɛɛ ba cheɡa, dɛ́ na ɡɛ baa dɛɛ ɛ.”

²² Mosis no Korowii waa la, dɛ kpɔ Josua la sɔfo Eliasa ne Israel tena la bwa baah ta.

²³ Mosis ɡbabir kpɔ nɔɔra dawɛ o nɛɛ dɛ kpɔ toma la do o nɔn ta, ɡɛ Korowii aa ŋɔ o be la.