Nɛra Kura 24 - mzwDBL

¹ Balam aa naa kɛŋɔ a too Korowii tea kɛŋɔ o swee andɛɛɡa tɛ Israel tena la, o ta laŋɛ ka voɡɛ ɡɛ o fa aa dɛ ɛ la. O berɛ sie chaɡɛ pua hɛŋle ɡbo harɛ la ta.

² Balam ha sie dɛ na Israel tena la kɛŋɔ baa baŋre ba tɛnte deene dɛ so denaa ta. Korowii Doma baa so o nɛ,

³ asɛ o bol waa Korowii aa bol o be la ŋɔ, “Waa men Beɔ bibaa Balam aa noa le Korowii be, Waa waa naa chaahna ta kɛrɛdɛ ken,

⁴ nɛn waa dɛ no Korowii waa waa bola. Nɛn waa dɛ na waa Korowii Waa Ɛ Kpeɡri Bwa Dɔɔ aa pili a bini, dɛ chole chɔ harɛ o sie pili wɛɛ nyiŋi.

⁵ He na ɡɛ he tɛnte deene aa wera, Israel tena, he sobɔra wer.

⁶ A do kɛŋɔ fɛlembɔjena aa chɔa kaa, a wer kɛŋɔ bodɛɛɡa baa du daa a chɔ nee nyoa. A do kɛŋɔ Korowii aa du daa ane baa dɛ yera alore, ne peleme daa a cheɡɛ nee nyoa.

⁷ Bwaala ɛɛ nɛɔ taeh, ásɛ kwaa baa dua dɔ nee kohona. Ba kora ɛɛ do kanee ɡwaa Amalɛk Kooro Aɡaɡ. Ba harɛ do kan, dɛ́ dɔ jirima kohona.

⁸ Korowii laɡ ba le Ijipt harɛ ta, dɛ yo dɛɛ tɛɛ ba kɛŋɔ kpɔɡ bini nao ken. Ba pɔ ba dɔma nɛɛ dɛ kuuɡi ba hoɡa, dɛ yaɡ ba hɛma ne.

⁹ Ba do kɛŋɔ nyujente waa chɔa, nyujente nee chɔɔ waa, umee dɛ́ won lɔ bambile chumu wɔ? Nomɛlbwa waa swee andɛɛɡa tɛ Israel tena dɔ andɛɛɡa, nomɛlbwa waa taah ba la, á ɡure o ɡbaɡba nyu ta!”

¹⁰ Ate, Kooro Balak baah di Balam nɛ. O ume nɔɔra lɔ dɔŋa kohona dɛ ŋɔ o be ŋɔ, “N dɔma taahna waa n ka kpɔe ba, kɛ he berɔ swee ba andɛɛɡa kera atoro bwa.

¹¹ Le warane kaa bela haa lea! N ŋɔ n fe ɛɛ bɔe kemee kɛrɛdɛ ɡa, kɛ Korowii tɔa ŋwɛnɛ.”

¹² Asɛ Balam ŋɔ, “N ta nɛra haa tom ba n be la be ŋɔe ŋɔ,

¹³ ‘Hale dɛ Kooro Balak kpɔ o kara mun suuɡapoŋa ne suuɡaswɛm bwa tɛ mɛ naa, maa won le Korowii habɔɔ dɛ́ ɛ n bambile wa, dɛ́ ɡel anɔ la Korowii aa do mɛ ŋɔ n bɛ ɛ la. A wer oo, aa were oo, a ta chɛ kɛ ń ɛ anɔ la Korowii aa bola ɡbo aa?’

¹⁴ Taraken n berɔ dɛɛ kaa n nɛra be, kɛ ɡel ń ŋɔ he be waa Israel tena aa dɛ́ ba kpɔe ɛ he nɛra kerekere.”

Waa Korowii aa bol Balam be naarɛtena

¹⁵ Ate, Balam bol waa aa le Korowii be ŋɔ, “Waa aa le men Beɔ bibaa Balam be, n na waa chaahna ta kɛrɛdɛ ken.

¹⁶ Nɛn waa dɛ no Korowii waa waa bola la, dɛ́ dɔ waa mun noe le Nemenɛ Korowii be. Nɛn waa na wepila le Korowii Waa Ɛ Kpeɡri Bwa Dɔɔ be, dɛ chole chɔ harɛ asɛ n sie pili wɛɛ nyiŋi.

¹⁷ N na Israel tena wa aa dɛ ba bala kerekere, kɛ taraken laa. N nyiŋa, kɛ a ta men bɛnɛ. Kooro bɛl ɛɛ le Israel tena binii ba kɛŋɔ wewee ken. Nomoa bɛl ɛɛ ir ba binii, dɛ́ kpoŋe koodaŋɡbala. Wɛɛ kpoo Moab sitɔɔlaa, dɛ́ chɔɡ Sɛt naanar baa ɛ naɡrenyin tena.

¹⁸ Israel tena ɛɛ pɔ Edom tena nɛɛ, baa pɔ ba dɔma Sɛɛ tena nɛɛ. Kɛ dɛ ta do kpeɡri kɛrɛdɛ.

¹⁹ Kooro la ɛɛ le Israel tena binii dɛ́ ba kpoo nɛra baa ka bwɛjen la ta bwa.”

Waa aa ka mun Korowii bol Balam be

²⁰ Balam na Amalɛk tena wa chaahna ta dɛ bol ŋɔ, “Amalɛk tenaa fa kpeɡa harɛre bwa bini, kɛ a habɔɔ wɛɛ ba paɡroo kwara.”

²¹ O na Ken tena ɡe wa dɛ ŋɔ, “He soɡe bwea baah ta, he sobɔr do wer.

²² Kɛ ane a bwa, baa pɔ he nɛɛ, ásɛ Asiiria tena lawɛ heyaa laa ta kaa.”

²³ Balam berɔ ŋɔ, “Akwe, dɛ Korowii ɛ ken aa, umee dɛ́ dɔ o nyu ɔ?

²⁴ Stiimaere ɛɛ kpɔ nɛraa le Saepros harɛ taa ba, dɛ́ ba lɔ tɔ Asiiria tena ne Iba tena nɛ. Saepros tena ɡe kwara ɛɛ heo.”

²⁵ Balam aa tona la, o kaa o bwɛ. Kooro Balak ɡe kpɔ pera kaa.