Mumpar 44 - mzwDBL

Suuɡapoŋ numol wa

¹ Josef ŋɔ bonɔɔ waa dɛ nyiŋi dem bela la be ŋɔ, “Do kondikwaa baala nɔ bɔɡtɔre bini a suuɡi, ásɛ dɛ kpɔ bɛlbwa suuɡa vɔwɛ o bɔɡtɔ nyoa.

² Ásɛ dɛ kpɔ n suuɡapoŋ numol, ne bechala la suuɡa do o bone bini.” Asɛ o ɛ ɡɛ waa ŋɔa la.

³ Tɔ aa pera chɔmbibi la, ba ta ba ŋwɛnɛ ba ne ba keeɡore kaa.

⁴ Baa dɛ kaa baa wola bobɛlbwa tele mɔɔ la, Josef ŋɔ bonɔɔ waa dɛ nyiŋi dem bela la be ŋɔ, “Ɛ warane dɛ́ ti baala la. He kaa puu ba aa, hé bɔɔ ba ŋɔ, ‘Ɛrɛɛ he kpɔ wechɔɡa bɔ wedɛɛɡa kem nɔɔ?

⁵ Ɛrɛ waa he ŋwɛ n dɔɔ suuɡapoŋ numol nɔɔ? O nee wɛɛ nyɔ ne, dɛ che o ta dɛɛ jemɛ kerekere wa. Gɛ haa ɛa nɔ ɛ wechɔɡa kohona.’ ”

⁶ Waa ti ba dɛ ka puu ba la, ɡɛ waa laanee o bol ba be.

⁷ Asɛ ba chaŋo ŋɔ, “Nomoa, ɛrɛɛ hɛɛ nyin he chaɡle nɔɔ? Korowii ɛɛ kisi yaa, yaa ɡɛɛ ɛ.

⁸ Ya ta suuɡa yaa naa ya bone bini Keenan harɛ la berɛ ba tɛ heya aa? Ɛrɛɛ yaa ba wona ŋwɛ suuɡapoŋ kɛɛ suuɡaswɛm he nomoa dem ɔ?

⁹ Nomoa, ya bini bɛlbwa haa nao o be la, bá kpoo, ásɛ ya kar ɡe ɛ he yoma.”

¹⁰ Asɛ o sɛh ɡɛ baa bola la dɛ ŋɔ, “A wer, kɛ naate maa nao o be la ɡboo dɛ́ berɛ n yom, ásɛ he kabora te kaa.”

¹¹ Belaa bɛlbwa ɛ warane dɛ choɡ o bone cheɡ, dɛ laa a nyoa pur.

¹² Ate, Josef bonɔɔ la nyiŋi ba bone la bini. O pa mun le ba bini nomoa be dɛ ba tonɛ bechala la be, asɛ dɛ na numol la Bɛnjamen waa ɛ bechala la be.

¹³ A we ba nɛ, ba laa ba laala kɛɛ, a baɡle kɛ ba tea bini chɔɡɔ, dɛ kwaa vɔwɛ ba bone choɡ keeɡore la, dɛ laa berɛ ba bwɛjen la ta.

¹⁴ Juda ne o bala aa tel Josef dem la, dɛ o ta lole, asɛ ba ka ɡuŋu harɛ.

¹⁵ O bɔɔ ba ŋɔ, “Bɔkwa waa he ɛ ken? Haa jemɛ kɛŋɔ n won chaahna nae, dɛ́ jemɛ waa aa dɛ ba chiɡa kerekere kɛɛ?”

¹⁶ Anee Juda chaŋe ŋɔ, “N dɔɔ, ɛrɛɛ yaa ba he be bola ɔ? Ɛrɛɛ yaa ba wona tɔŋle ŋɔ ya laa ɔ? Ɛrɛɛ yaa ba wona ŋɔ ya waa dɔ kasinteŋ kpa ɔ? Korowii le ya mun ne. Taraken naate baa na numol nɔ o be ɡbo laa dɛ́ ɛ he yom, ya bwa ɛɛ ɛ he yomaa.”

¹⁷ Anee Josef ŋɔ, “Akai, maa an ɡɛɛ ɛ bwa. Nemenɛ naate baa na numol la o be la ɡboo dɛ́ ɛ n yom. He kabora la te ɛɛ won kaa he mɛɛ be deŋnesɔɔhna ne.”

¹⁸ Ate, Juda suuh tel Josef, dɛ ŋɔ o be ŋɔ, “Nomoa, bɛ ɡel he baah di n nɛ. He do kɛŋɔ Ijipt kooro ɡbaɡba ken, kɛ n dɛ nyin kɛŋɔ he tɛ mɛ ŋwɛnɛ n ne he won bol wa.

¹⁹ Nomoa, he fa ta yaa bɔɔrɛ kɛ ya dɔ mɛɛ kɛɛ nime bɛl a?

²⁰ Asɛ ya chaŋe ŋɔ ya dɔ mɛɛ o hwɛɛh dɛ dɔ nime bɛl ɡe. Ya mɛɛ aa hwɛɛhra la taa o lolɔ, asɛ o dɔɔ o ne waa pɛ nya la sewɛ a ka o ɡbo, anomanta, o mɛɛ dɛ nyin o waa taeh.

²¹ He ŋɔ ya be ŋɔ ya la ka kpɔɔ ba he nao,

²² asɛ ya ŋɔ bie la aa won le o mɛɛ jwɛh, dɛkalkɛ o le o jwɛh aa, o mɛɛ la ɛɛ sewɔɔ.

²³ Asɛ he berɛ ŋɔ ya be ŋɔ haa nyin kɛ he na yaa dɛ ya nime la ta jae.

²⁴ Nomoa, yaa bera kaa ya mɛɛ be la, ya kaa bol waa bwa haa bola la o be.

²⁵ O berɔ ŋɔ ya be ŋɔ ya berɛ ba dɛ́ ba yawɛ kondikwaa tama.

²⁶ Asɛ ya chaŋo ŋɔ yaa won la. Ya ɡbo laŋɔ dɛ ya nime nɔ ta ya nɛɛ jae yaa, yaa won la o sie. Dɛ ya nime la ɛɛ lao tenaa, ya ɡee lao.

²⁷ Anee ya mɛɛ ŋɔ ya be ŋɔ ya ɡbabir jemɔ ŋɔ bibaala banɛ ɡboo Rakɛl lolɛ tɛo.

²⁸ Beŋkpoŋ te le o nɔn ta. O jemɔ kɛŋɔ kpɔɡ bini ola ka toɡri o bini, o ta on nae kpa ba le fini.

²⁹ Ya berɔ kpɔ onɔ le o nɔn ta taraken asɛ waane ka ɛɔ waa, waa hwɛɛhra tonɛ nɔ, tebinichɔɡ ɡboo dɛɛ ba o kpoe.”

³⁰ “Nomoa, taraken n berɔ kaa n mɛɛ be dɛ ya nime nɔ ta jae yaa, wɛɛ sewɔɔ. O dɛ nyinu kohona,

³¹ ɡɛ waa hwɛɛhra la, dɛ o ta ya nɛɛ jae yaa, sum ɡbo ɛɛ kpoo.

³² Anɔ la aa jaa laanee kɛŋɔ, n lɛ bie nɔ waa dawɛ n nɛ. N baɡɛ n mɛɛ nyoa kɛŋɔ dɛ n ta o ne balaa, menee waa dawɛ n nɛ n soɡa bini bwa.

³³ Anomanta, nomoa, n dɛ́ soŋe, mɛɛ chiɡ bie nɔ naa taa, dɛ́ so dɛ́ ɛ he yom, ásɛ o pu o dɔɔranar kaa.

³⁴ Dɛ bie nɔ ta n nɛɛ teŋaa, ɛrɛɛ mɛɛ ba ɛɛ dɛ́ won la n mɛɛ be nɔ? Maa won ka na wechɔɡa aa dɛ ba n mɛɛ nɛɛ bala.”